تداولت صفحات التراث القديم على "فيس بوك" فيديو نادر لرسالة صوتية للفنان الراحل عبدالحليم الحافظ، وهو يوجه رسالة عتاب إلى الملحن الراحل محمد الموجي، ويطالبه بالعمل وعدم الالتفات للانتقاد، داعيا إياه لتوصيل رسالة إلى زوجته، والتي تدعى أم أمين، قائلا "قول لأم أمين ماتزعلش مني، دي أختي وأمي، وهو معقول الأخت تقدر تأذي أخوها أو ابنها".

وقال العندليب في رسالته، التي ذكرت صفحة الإذاعة والتليفزيون على اليوتيوب أنها كانت خلال لقاء إذاعي قديم "كل سنة وإنت طيب يا محمد وأولادك طيبين، كنت عايز أقولك مبروك على أعمالك الأخيرة، إنت إنسان مخلص لفنك ولأصدقائك، لكن أنا مش عايز أفكرك يا محمد بالحاجات الحلوة اللي عملتها زمان، وأكيد فيه حاجات أحلى هاتطلع منك في المستقبل، بس ليه مابقتش تشتغل وتركز في شغلك زي ما كنت، وشاغل نفسك بالناس اللي بتهاجمك، ليه بتتهم الناس".

وتابع العندليب "أنا هافترض معاك أن الناس بتهاجمك، مش يبقى أحسن دفاع عنك هو فنك، تفتكر كلامك أقوى من فنك ولا فنك أقوى؟، جواك فن حلو ورقيق، وكل مطرب يتمنى يغني من ألحانك، هو الموجي لو عمل لحن وجالي بيه هارفضه أكيد لأ طبعا، أنا نفسي إنك تشتغل وتشتغل، ولو حد هاجمك سيبه يهاجمك واهتم ببيتك وأولادك وألحانك، خصوصا إنهم بقوا كبار وفي المدارس والجامعة، وربنا يخليهوملك وكل سنة وإنت طيب يا محمد".