بعد 29 عاما من ظهور الجزء الأول لمسلسل "أبو العلا البشري"، عاد مستخدمو مواقع التواصل الاجتماعي لتداول مقطع صوتي للفنان محمود مرسي، ضمن أحداث المسلسل، يتحدث فيه عن معنى "الحب المثالي"، عندما كان له معنى كبير بين المرتبطين.

وجاء المقطع كالآتي:

- أنا بتكلم عن الحب المثالي.. بعذريته برومانسيته بلمسة الطهر اللي فيه بروح الشاعرية اللي جواه، زمان كنا بنحب زي ما نقرأ الشعر أو نسمع مزيكا أو نتفرج على لوحات ناجي وصبري ومحمود سعيد، كانت لمسة من الإيد مجرد لمسة تغيبنا عن الوجدان، كانت نظرة من العين تسهرنا للفجر، وكانت رعشة الكلمة الحلوة على الشفايف تبكينا، تصوّري.. إحنا كنا بنخاف من القرب أكتر ما بنخاف من البعد، وفي البعد طبعا بنرجع نحن للقرب تاني، كانت الأشياء البسيطه جدا في الحياة بيبقى ليها قيمة كبيرة أوي، وشوشة الريح في الشجر، نور القمر في المكان اللي حواليه، كل حاجة كان يبقالها معنى وطعم ومتعة، أغاني أم كلثوم كنا نقعد نسمعها بالساعات ومنتكلمش خالص في نفس الوقت بنقول كل حاجة، عشان كده الحب كان بيفضل وبيعيش كمان مهما فصلت بين المحبين بلاد وفرقت بينهم جبال حتى، أنا حبي لطنطك نعمات استمر لأكتر من تلاتين سنة رغم إنها .. إنها يعني .. افترقنا وهيا راحت اتجوزت واحد تاني، لكن أول لقاء بينا بعد السنين دي كلها كان له فرحة أول مرة اعترفنا لبعض فيها.

- حضرتك يا عمي بتقول كلام عمري في حياتي ما سمعت أحلى منه.

- ومع ذلك الكلام ده كله مبيعبرش أبدا عن التجربة الحقيقة اللي إحنا عيشناها.

- طب ليه إحنا كمان منعيشهاش.

- لأنكم شيلتوا الفواصل يا نجوى، اختصرتوا المسافات واتحول الحب لاتفاق سريع مباشر كل حاجة فيه سهلة، مقابلة وتلامس واندماج، مبقاش فيه حاجة غالية ولا عزيزة أبدا، مبقاش يستحق حتى المحاولة بقى.. بقى زي ساندوتش تاكلوه وإنتوا ماشيين في السكة وتهضموه قبل ما توصلوا.. لما الحب بيبقى صعب بيفضل يا بنتي بيعيش.

وعبر المستخدمون عن إعجابهم بالمقطع، وبصوت الفنان الراحل محمود مرسي، مؤكدين على أن الزمن الحالي بحاجة إلى هذا الحب والاحترام.

مسلسل أبو العلا البشري، بطولة الفنان محمود مرسي، وسيمون، ووفاء صادق، وكريمة مختار، ولطفي لبيب، ووحيد سيف، وعادل أمين، ومن إخراج محمد فاضل، وتأليف أسامة أنور عكاشة.