نداء إلى كل عروسين مقبلين على الزواج.. ألف مبروك ويلا نفرش البيت.

مشهد رومانسى حالم.. شاب وفتاه وقصة حب ودبل وشبكة وفستان أبيض ومأذون وزغاريد وفرحة العمر ومشروع زواج وبيت وأطفال،  الجواز سهل أهوه بس محتاج شوية حاجات عشان يكمل. 

جرت العادة وبحكم الطقوس المتوارثة أننا بنلاقي حاجات كتيرة في بيوتنا محدش بيستخدمها، حاجات للفرجة فقط، ناقص بس يتعلق عليها يافطة بتقول  "ممنوع اللمس"! بس لازم ولابد نجيبها في الجهاز.

 النيش.. أكبر عقبة في تاريخ جوازاتنا!  النيش هو قطعة مهمة جدًا من أثاث غرفة الطعام، قطعة لا يُمكن تتم أي جوازة بدون تواجد تلك القطعة في البيت، النيش ده هو الفاترينة اللي هنفرج الضيوف عليها طول عمرنا، واللطيف بقى في موضوع ضرورة وجود النيش فى البيت هو أن  90% من الناس مبيستخدموش النيش غير فى "المنظره"،  9% بيستخدموه كمخزن لأطقم الصيني والأكواب الكريستال "بتاعة الجهاز" اللي خايفين عليها من الاستخدام، "فبيحنطوها" في النيش،  والـ 1% الباقيين بقى غالبًا ناسيين أن عندهم فى البيت نيش.

معركة النيش هي معركة وجود، معركة كل اتنين قرروا يتجوزوا،  مع أن غرفة الطعام "السفرة"  بنحتاج فيها لترابيزة عشان ناكل عليها، وكراسي عشان نقعد عليها وإحنا بناكل على الترابيزة، وهنحتاج "إذا توفرت المساحة" إلى دولاب صغير للأطقم الصيني والكريستال. بس كده!

ليه بقى أشتري نيش بمقاس كبير، كتله طويلة عريضة وبفلوس كتيرة وتزحم البيت، وكل شوية ننضف فيه، ونحتاس بيه، ونضيق مساحة البيت "اللى هي صغيره أصلاً"،  ليه نشتري قطعة أثاث عشان نحنطها في البيت!

طيب أهلنا زمان كان بيوتهم واسعة، فلوسهم حاضرة، وكان سعر الأثاث مناسب لكل الناس، لكن دلوقتى ممكن جوازه تبوظ عشان النيش! النيش اللي ممكن أصلاً نستغنى عنه، عادات متوارثة أصبحت قوانين واجب تطبيقها بدون تفكير.

لما مساحة البيت تبقى 60 متر مسطح وأحياناً أقل، مينفعش أفكر أصلاً فى "النيش" حيث إن النيش قطعة غير أساسية، وجودها أو عدمه مش هيفرق كتير.

فالأساسيات الواجب تواجدها فى أي بيت اللى هي بتتيح له إمكانية الحياة بعملية وسهولة، يعني الكنبة فى الليفنج ضرورة، السرير فى غرفة النوم ضرورة، دولاب الملابس كمان مهم جداً، لكن النيش وغرفة الطعام كلها ممكن نستغنى عنها لو مساحة البيت والإمكانيات المادية محدودة.

ودلوقتي هنحاول نتخيل أيه الحاجات اللى محتاجها البني آدم عشان يقدر يعيش في بيت:
- مدخل البيت (رف صغير أو أدراج ومرآة). 
-  غرفة النوم (سرير، دولاب ).
-  غرفة الليفنج ( كنبة للجلوس، مكتبة صغيرة للكتب والتليفزيون، ومكان صغير للعمل أو المذاكرة).
-  المطبخ ( قطعة أثاث صغيرة لتخزين الأطباق وأدوات الطهي).
-  الحمام ( حوض وتواليت وبانيو صغير ومرآة).

لازم نفكر قبل ما نقلد، لازم نشغل عقولنا وندور على سبل الراحة والعملية، لازم نشوف الحياة محتاجة إيه عشان تتعاش بصورة مريحة، يعني اشتروا اللى يخليكم تعيشوا وتستريحوا، مش اللى يخليكوا تتمنظروا قدام الضيوف.