تحدث سامح مرضي، خريج بكالوريوس تربيه نوعية، من محافظة البحيرة ويعمل رسام وهو الذى رسم شعار النادى على جدران شقة العريس، لـ" اليوم السابع"، عن هوايته الفنية وكواليس رسم شعار نادى الزمالك، حيث قال:" أنا بحب الرسم من طفولتى وطورت من موهبتى، سواء بنفسى أو من خلال دورات تدريبية، ومع الوقت قدرت أوصل للمستوى اللى يرضينى، ومازلت بتعلم وبطور من نفسى، وأنا أصلاً زملكاوي وبحب الزمالك جداً ورسمت الشعار قبل كده كتير فى شقق عرسان وكانوا مبسوطين جداً".

تابع :"وآخر عريس طلب منى رسم الشعار في الصالون وتحديداً عند المكتبة الخاصة بالتليفزيون ورسمت اللوجو على مدخل الشقة و رسومات الغرف التانية كانت علي ذوق العروس زى غرفة الأطفال وغرفة النوم".

وعن إهتمام العريس بموافقة العروس على رسم شعار النادى الذى يشجعه، قال سامح:" الفكرة أتعرضت علي العروسة، وعجبتها وفرحت جداً لما شافتها، ومش شرط دايماً أن العروسة تبقى موافقة على رسم شعار النادى لأنها مشجعة للنادى لكن بتكون متفاهمة مع خطيبها وبالتالي بتوافق".

وعن طلب مقبلين على الزواج رسم شعار نوادى الرياضية في منازلهم، قال سامح:" أطلب منى رسم شعارات نوادى كتير في شقق عرسان منها نادى الأهلى ورغم إنى زملكاوى بوافق على رسم شعار أي نادى منافس".

وعن الطلبات الغريبة الخاصة بشعارات النوادى الرياضية، قال سامح:"من الطلبات الغريبة الخاصة بشعارات الأندرية اللى اطلبت منى، فيه ناس طلبت منى رسم شعار الفريق على واجهة عمارة وده مش بيتعمل بسبب إن السكان بيرفضوا سواء لأنهم مش بيشجعوا كورة أو النادى ده بالذات وفيه ناس طلبت منى رسم شعار الأهلى والزمالك في شقته عشان يمنع التعصب الكروى".

وعن رد فعل الناس على رسم شعار النادى في شقة عريس، قال سامح:" بصراحه الأغلبية من أصدقائي بيقدروا الفن جداً والمجهود ودايماً بيشجعوني وبصراحة بحبهم جدا وبيحبوني وفيه منهم ناس متعصبة كروياً بس الأغلبية أصدقاء وأخوات ودايماً بلاقي دعم حتي من الأهلوية".

وعن أمنية سامح التي يحلم بتحقيقها على أرض الواقع، قال :"نفسي ربنا يوفقني في شغلي وناس كتير تشوف لوحاتى وتعجبهم لأن ده بيخلينى مبسوط، وكلامهم بيأثر فيا وبيشجعنى، ومع الوقت والإجتهاد هحقق كل احلامي ان شاء الله ويكون عندي شركة ديكور وبتضم ناس موهوبة وحابة شغلها ونكمل بعض كشباب طموح عايز يعمل حاجة".

صورة أخرى داخل الشقة

صورة أخرى

رسم شعار النادى

الرسام سامح

صورة أخرى لسامح