حاورت كاميرا دوت مصر الفنان الصاعد حمادة صميدة بعد تعرضه للتنمر وموجة من السخرية على السوشيال ميديا قائلا، تعرضت لأذى كبير من تنمر البعض عليا وجها لوجه لدرجة ان واحد قالى شكلك وحش وسنانك عايزة سمكرة دي خلقة ربنا سبحانه وتعالى وانا راضى وفرحان بيها ومحدش ليه فى نفسه حاجة.

انا بضحك الناس وجوايا جرح كبير بعد موت ولادى قدام عينى بعد ما تعبوا فجأة وجريت بيهم على المستشفيات ومحدش كان حاسس بيا وفى الوقت ده كنت بطلع وبضحك الناس لانها ملهاش ذنب باللى انا فيه

انا انسان بسيط جدا ومش غنى وعايش فى منطقة شعبية فى شقة ايجار، خرجت من محافظة الفيوم وانا شغال بياع انابيب كنت بطلع لحد الدور ال ١٢ شايلها على متفى عشان لقمة العيش وعمرى ما خجلت من مهنتى ديه ولو جار عليا الزمن هرجعلها تانى لان الشغل مش عيب

واستكمل، حطيت قدام عينى هدف وحلم انى امثل وروحت وسعيت كتير على الحلم ده لحد اما ربنا حققهولى وبقيت ممثل وكوميديان، انا بحب كل الناس وعمرى ما اذيت حد ونفسى الناس تسيبني فى حالى لان شكلى ده خلقة ربنا عز وجل .