قالت حبيبة ايمن  أنا عند ٢٠ سنة وطالبة في  كلية الآثار بالفرقة الثالثة  كنت في الصيف بنزل تدريبات كتير تبع المتحف  الجو بيكون شمس و حر، وكنت عايزة أشتري كاب بس كنت عايزاه يكون مميز مش تقليدي و شكله حلو كدا وللأسف ملقتش اللي كنت بدور عليه في مصر  و حتي اللي لقيته كان علي مواقع أجنبية و مش بنفس الشكل حتي اللي كنت متخيلاه

اضافت حبيبة شفت فيديوهات كتير بتعلم مبادىء التطريز و كانت المشكلة اللي بتواجهني ان مفيش فيديوهات عملية علي كابات  كان كلها علي طارات و قماش و طبعا خامة الكاب تقيلة جدا جدا إبرة مش بتدخل فيها بسهولة بس قدرت اجرب واستخدم الأدوات المناسبة لحد ما قدرت اشتغل علي الخامة دي، و بدأت أعرض شغلي و اتفاجئت بكمية الأقبال و الأراء الايجابية علي الشغل و اد ايه هو جديد و مكنش موجود قبل كدا

اكدت حبيبة أكتر حاجة كانت محتاجة تفكير هي السعر لإنه كان هدفي إن أي حد عجبه الشغل يشتريه و إن السعر ميكونش هو العائق انه ميجبش الحاجة اللي عجبته، و قللت السعر جدا علي قد يدوب الأدوات  و صحابي و أهلي كانوا شايفين إني كدا مش بكسب و اني بتعب علي الفاضي

لكن حقيقي بحس إن مكسبي لما حد يستلم مني الشغل ويكون مبسوط، دي أول مرة أحس بمعني ان المكسب مش شرط يكون فلوس لكن الكلمة الحلوة حقيقي هي اللي بتعوض عن التعب

يكفيني ان يكون الناس عارفة اني من أوائل اللي رسموا بالخيط علي الكاتبات في مصر بشكال فرعونية