مشاعر متناقضة مر بها الكابتن مجدى عبد الغنى عضو مجلس إدارة اتحاد كرة القدم المصرى السابق، خلال يوم واحد، ما بين الفرح والحزن، فكان الزمان يوم الجمعة الموافق 28 فبراير 2020، والمكان عزاء يليه حفل زفاف، الأمر الذى جعل بعض الأصدقاء يطرحون عليه سؤالًا، حول كيفية الفصل بين هذه المشاعر المتناقضة فى فترة زمنية قصيرة جدًا لا تتخطى الساعات.

ونشر الكابتن مجدى عبد الغنى، مقطع فيديو ، كان يرد فيه على سؤال كيفية فصله بين البكاء فى عزاء الرئيس الأسبق محمد حسنى مبارك، والضحك والشعور بالسعادة بعض وقت قصير جدًا فى ذات اليوم أثناء حضوره حفل زفاف نهلة مدحت شلبى، ابنة الفنانة شيرين وجدى والإعلامى مدحت شلبى.

وسألته إحدى المشاركات فى الحوار، "أنت معيط فى العزا يا كابتن.. أنت بتفصل إزاى"، فرد عليها مجدى عبد الغنى: "يعنى أنا هفضل أعيط على طول.. أفصل إيه دا الناس أبوها بيموت ويكونوا حاجزين صالة وبتخاف العربون يروح فبيدفنوا الراجل ويروحوا يعملوا الفرح.. بتقولى فصلت إزاى.. فصلت إيه هو أنا هفضل أعيط على طول.. هو أنا لما روحت عيطت لحظة هتفضلى تعيطى طول عمرك".

ويشار إلى أن مجدى عبد الغنى عضو مجلس إدارة اتحاد كرة القدم المصرى السابق، كان قد حرص على بث مقطع فيديو عبر قناته الرسمية يوضح فيه حقيقة تأثره وبكائه فى عزاء الرئيس الراحل محمد حسنى مبارك، وسر حضوره لحفل زفاف نجله المعلق الرياضى مدحت شلبى بعدها بساعات.

وقال عبد الغنى فى مقطع الفيديو "الرئيس السابق كان بيحبنى الله يرحمه، وأنا فى فترة حكمه تقلدت ألقابا وأوسمة كتيره جدا، وعلاقتى مع أولاده فى منتهى الاحترام، لأنى بعزهم جدا على المستوى الشخصى وبحبهم، وأعتقد إن أنا فى العزاء  المشاعر فرطت مني، وخرجت عفوية، وملهاش أى نوع من أنواع المصالح".

وأضاف عبد الغنى "لا سيادة الريس الله يرحمه هيرجع يدينى وزارة ولا هيرجع يدينى منصب تانى، يعنى أستاذ علاء ابتسامته دى علشان يهديني، بصراحة انا افتكرت كل الأيام الحلوة الى لما لعبنا مع بعض كورة، وافتكرت الريس لما حبيت أقابله وقالهم مجدى طبعا ييجى بسرعة، وقالى انت لسه ياض يا مجدى مربى دقنك".

وتابع عبد الغنى قائلا  "وضع طبيعى جدا لعزاء لواحد انا بحبه جدا، وفى فرح بعده لواحد انا بحبه جدا وبعزه جدا، إيه المشكلة، انا ولا رقصت ولا حاجة، كل الى عملته روحت قعدت ساعة مع ابني، وخدنا بعضنا ومشينا، كابتن مدحت شلبى أخ كبير ليا"، وأختتم حديثه قائلاً "انا سعيد جدا بالاهتمام دا، يعنى دلوقتى لو دخلت على جوجل هتلاقينى تريند، لو دخلت على أى حاجة هتلاقينى انا نمرة واحد، فضل من عند ربنا، مع إنى مبعملش بالكلام دا فلوس، معرفش بيتعمل منه فلوس إزاى يعني، انما اهى دى شهرة".