إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

كنا بنعمل مغارات وقصور بشلت كنب الانتريه.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الأربعاء 28/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

المشكلة كلها ف التعود وف الحق المكتسب.. حاجتين الناس مع الوقت بتضايق بعضها بيهم وبتملا مساحات من الفراغ وبتحتلها ف حياتك ويبتدوا يزرعوا محصول العشم ف ساعتها.. بعدها بتيجي المطالبات الغير منطقية والدوشة وسوء الفهم والخسارة وبس.. كل دة ليه بقى.. عشان انتا سكتلهم من الاول.. عموما ملحوقة.. متسكتش لحد النهاردة.. متسكتش لحد خالص

برج الحمل عملياً

( الشغل والمذاكرة والتخطيط لبكرة ):

مهم تنام كويس عشان لما تقوم تبقى فايق ومركز وتعرف تبدع ف الحاجة اللي انتا بتعملها او على الاقل تخلصها بتفاصيلها بدون غلطات كتير

برج الحمل صحياً

( نفسيا وجسمانيا وكل مايخص طاسة المزاج ):

صحيا النهاردة محتاجة نوم بزيادة حبة ومحتاجة تاكل كويس مش لما تفتكر انك نسيت تاكل طول اليوم وبس

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والمائية والترابية والهوائية..

إعرف حظك اليوم برج الثور بالتفصيل الأربعاء 28/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

حاول تشغل نفسك بحاجة النهاردة غير الخوف والمرازية.. حاول مش اكتر.. الموضوع دة عمره ماكان اجباري بالنسبالك.. بس لو حابب تبتدي ترجع تحس بالسعادة ف حياتك اعتقد لازم تعمل كدة.. ولا انتا شايف ايه بالظبط

برج الثور عملياً

( الشغل والمذاكرة والتخطيط لبكرة ): 

معقول هتعيش حياتك كلها بتحارب العالم كله عشان خايف منه ولا ايه؟

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة انتا تمام او على الاقل بتعرف تداري اوجاعك كويس

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والبرمائية..

إعرف حظك اليوم برج الجوزاء بالتفصيل الأربعاء 28/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

القلب هو الحاجة الوحيدة اللي متقدرش تختار تديها لحد او لأ.. ولا حتى هو بيختار.. ممكن واحدة تعدي تخطف قلبك من غير مانتا تحس ولا هي كمان تحس..حاجة غريبة جدا.. متقدرش تاخد قرار ابدا بانك متحبش حد ابدا..متقدرش

برج الجوزاء عملياً 

( الشغل والمذاكرة والتخطيط لبكرة ):

انتا محتاج غزل بنات ف حياتك النهاردة ومحتاج تدقق ف شكل السحاب حبة برضة وتصوره

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة انتا محتاج تلعب اي جيمز على بي سي مش موبايل لمدة ساعة على الاقل

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والسمكمكية والترابية والهوائية والنارية..

إعرف حظك اليوم برج السرطان بالتفصيل الأربعاء 28/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محدش يخش حياتك ويقولك رأيه ببجاحة ف الوان الحيطان ولا لون السجاجيد ولا ذوقك ف الهدوم ولا ف الاكل.. اللي يخش حياتك دة مجرد ضيف..ياخد واجبه ويمشي وبس.. مش أكتر ولا أقل

برج السرطان عملياً 

( الشغل والمذاكرة والتخطيط لبكرة ):

مهم تسعى حبة النهاردة بزيادة ف الجانب العملي من حياتك عشان تاخد وضعك بالشكل اللي يليق بيك وبشطارتك

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة محتاجة منك تهتم بسنانك وبوزنك حبة

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والبرمائية والكتكوتية والمائية

إعرف حظك اليوم برج الأسد بالتفصيل الأربعاء 28/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

الملوخية تتشرب بالطبق بعد ما تهزر معاها بكام ودن قطة معمولة من عيش بلدي طازة وبعد كدة تبتسم براحتك لكل الناس اللي مبتحبكش وتوريهم بقايا الملوخية وهي ملحوسة سنانك.. بس كدة

برج الأسد عملياً 

( الشغل والمذاكرة والتخطيط لبكرة ):

كل حاجة ماشية تمام وزي مانتا عاوز على الاقل ظاهريا.. محتاج ايه تاني بالظبط؟

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة شوية اهتمام خصوصا من الصداع ومن قشف البشرة

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والكرِيبّية والنارية والهوائية والإستحواذية والهوائية..

إعرف حظك اليوم برج العذراء بالتفصيل الأربعاء 28/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بنات افكارك النهاردة ممكن تضحكلك وممكن تعزمك على شاي وبعد مانتا تتطمن وتقعد ف الصاالون هتخش هي بصينية الشاي وهتضحك ف كسوف وهتبصلك وهتدلقها ف حجرك.. خد بالك كويس من الموضوع دة

برج العذراء عملياً 

( الشغل والمذاكرة والتخطيط لبكرة ):

مش كل حاجة بتلمع حواليك تبقى مستحقة لإعجابك.. جايز في حاجات مبتلمعش وف منتهى القيمة وانتا مش واخد بالك

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة عاوزة منك تنزل تتمشى وتبتسم ف وش الناس حبة.. مش أكتر

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والهوائية والبرمائية..

إعرف حظك اليوم برج الميزان بالتفصيل الأربعاء 28/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مستغرب ليه؟.. مش منطقي الناس تثق ف حب بيقلب لكره ف ثانية..أو العكس.. مش منطقي ابدا

برج الميزان عملياً 

( الشغل والمذاكرة والتخطيط لبكرة ):

ركز ف انك تنجح مش ف انك تضيع الوقت بتشتكي من انك مش عارف تنجح وانتا بتنجح جوة ف الدرا.. الاسلوب دة هيخسرك ناس كتير خلي بالك.. او اقولك متاخدش بالك ولا حاجة.. مش فارقة خليك اناني زي مانتا.. براحتك

برج الميزان صحياً 

( نفسيا وجسمانيا وكل مايخص طاسة المزاج ):

صحتك كويسة وزي الفل بس انتا بتحب تدعي المرض النفسي كتير اوي عشان تصعب على الناس.. ودة مرض ف حد ذاته ومالوش علاج

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والبربئية والنارية والهوائية..

إعرف حظك اليوم برج العقرب بالتفصيل الأربعاء 28/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

عسول وطيوب ف نفسك النهاردة جدا جدا.. يارب دايما ياخويا والله.

برج العقرب عملياً 

( الشغل والمذاكرة والتخطيط لبكرة ):

محتاج تشتغل على مهاراتك حبة النهاردة بدل ماتضيع الوقت ف الكلام

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة تمام وقشطة.. حاول تستفيد من الموضوع دة حبة وتخرج وتتفسح وتنبسط حبة..

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والكهربائية والبرطمانية والكهرمانية والبرمائية والهوائية والنارية..

إعرف حظك اليوم برج القوس بالتفصيل الأربعاء 28/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مسير كل واحد ظلمك ياخد لفته ف الحياة ويجيلك من تاني.. الكوكب بيلف تحت رجلينا كلنا بس للأسف محدش بياخد باله.. كبر دماغك واهتم بصحتك ومزاجك وبس الليلة

برج القوس عملياً 

( الشغل والمذاكرة والتخطيط لبكرة ):

محتاج تصدق ف نفسك وف شطارتك جدا اليومين دول ومتركزش مع اي كلام سلبي ممكن تسمعه من حد ف الاغلب غيران منك مش اكتر

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها بس خد بالك من انك غالبا بتقعد كتير جدا ومبتفردش ضهرك كويس.. حاول تعمل مساج وتهتم حبة بالحركة اكتر من الثبات..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والهوائية والترابية والنارية..

إعرف حظك اليوم برج الجدي بالتفصيل الأربعاء 28/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

هتساعد حد النهاردة محتاج مساعدتك وممكن جدا يكون مكسوف يطلبها.. بادر انتا وساعده طالما تقدر وطالما يستاهل المساعدة دي وهيقدرها مستقبلا.

برج الجدي عملياً 

( الشغل والمذاكرة والتخطيط لبكرة ):

مش كل شاطر بيوصل وبينجح للأسف عشان في حاجات تانية غير الشطارة مطلوبة ويمكن اهم بالنسبة لسوق العمل ف الكوكب دة.. حاول تبقى مرن حبة معلش لحد ما نشضوف كوكب تاني ناسه بيقدروا المجهود والشطارة مش بيتفرغولها اصلا عشان يخترعولها مطبات وعوائق لمجرد انهم غيرانين منها وبتاكل ف نفسيتهم من جوة..

برج الجدي صحياً 

( نفسيا وجسمانيا وكل مايخص طاسة المزاج ):

صحتك النهاردة زي الفل ونفسيتك برضة زي الفل.. احنا اللي مش كويسين انتا ملكش ذنب

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والكشرية والهوائية والنارية..

إعرف حظك اليوم برج الدلو بالتفصيل الأربعاء 28/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

ف كل مكان ف العالم في حد ميعرفكش بشكل شخصي وجايز ميعرفش اي حاجة عن اي حاجة اصلا ومع ذلك ممكن جدا يكون جاهز يختلف معاك وخلاص ف اي حاج بتقولها ويعتبرك عدو لمجرد انك شكلك مبسوط من برة وهو لأ.. مش أكتر.. عشان كدة متهتمش وكبر دماغك وكمل ف طريقك وبس.. اتس تايم تو موف أون يابرنس.. تايم تو موف أون

برج الدلو عملياً 

( الشغل والمذاكرة والتخطيط لبكرة ):

روق بالك وشوف مصلحتك النهاردة وبس..

برج الدلو صحياً 

( نفسيا وجسمانيا وكل مايخص طاسة المزاج ):

صحتك اليوم بتتحسن بس لسة محتاج اهتمام ومراعية اكتر معلش لحد ما تخلص خالص من اي حاجة ممكن تضايقك صحيا او تمنعك من النوم بشكل عميق وصافي زي زمان..

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والكتكوتية والبرمائية والكبريتية والجنية والمائية والخيالية..

إعرف حظك اليوم برج الحوت بالتفصيل الأربعاء 28/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتفكر كتير ودايما بتوصل لناتج واحد بس.. انك محتاج حاجات كتير ناقصاك ولو كملت بيها وكملت بيك هتنبسط وهتضحك من قلبك وترتاح ومش هتحتاج تجري ورا اي حاجة او حد تاني.. معاك حق على فكرة.. الانسان عايش يحتاج وبس.. وف الاخر الواحد محتاج ايه يعني غير يدوبك كل حاجة...كل حاجة.. بس تقريبا دة حق الانسان ف الحلم وبس.. مش ف الحياة

برج الحوت عملياً 

( الشغل والمذاكرة والتخطيط لبكرة ):

مهم تعرف قيمة كل حاجة عندك النهاردة قبل ما تبص من الشباك على اي حاجة ف ايد اي حد ومش عندك

برج الحوت صحياً 

( نفسيا وجسمانيا وكل مايخص طاسة المزاج ):

صحيا الدنيا ماشية تمام ناقصك بس تلعب حبة ايروبكس الصبح اول ماتصحى بدل ما تفضل مسنتح ف السرير ومكسل تقوم

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والكتكوتية والمستحية والنارية والترابية والهوائية