إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

الحب مش محتاج عيد خصوصا وإن معظم البشر على كوكب الأرض مبتحبش إلا نفسها.   

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الأربعاء 14/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

مستني معجزة تحصل عشان كل حاجة حواليك تتغير وتدغدغ مشاعرك وتبسطها ازاي لما انتا اساسا بتكشر ف وش كل فرصة فرح متاحة بتفكر تقربلك اساسا؟.. مش كفاية جنان بقى ولا ايه؟.. شوية منطق ف حياتك الله يباركلك.. شوية منطق

برج الحمل عملياً

( الشغل والمذاكرة والتخطيط لبكرة ):

يوم مليان حاجات تفرح وتدي أمل ف بكرة.. إبعد بس عن التشاؤم وعن اقتناص فرص النكد ببراعة مطلقة لا تتطلق من كل حاجة حلوة وتقعد لوحدك بجد.

برج الحمل صحياً

( نفسيا وجسمانيا وكل مايخص طاسة المزاج ):

صحيا النهاردة انتا محتاج تقوم من السرير وتخرج تشوف الشمس حبة وتتمشي كدة وتعمل شوبينج بسيط ان شالله تجيب كيس عيش وايس كريم وتطلع تاني.. براحتك.. انتا حر

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والنارية والهوائية..

إعرف حظك اليوم برج الثور بالتفصيل الأربعاء 14/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

خليك مصحصح ومتفاءل النهاردة عشان في فرص كتير حلوة وعلي مقاسك ف الطريق ومش محتاجة منك اكتر من انك تصدق ف نفسك حبة ومتتشائمش بدون سبب قوي وجيه

برج الثور عملياً

( الشغل والمذاكرة والتخطيط لبكرة ): 

صحيا النهاردة انتا محتاج مساج لرقبتك وقفاك وودانك زي إمبارح بالظبط..

برج الثور صحياً 

( نفسيا وجسمانيا وكل مايخص طاسة المزاج ):

غذائيا النهاردة تقدر تتجه للخس والخيار والجبنة والقوطة والعدس والبصل الاخضر..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والمائية والنارية والبرمائية..

إعرف حظك اليوم برج الجوزاء بالتفصيل الأربعاء 14/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

النهاردة يوم خطر علي مشاعرك ف من اوله كدة تشوف هتعمل ايه بعيد عن الناس وعن مظاهر الاحتفال بأي حاجة ناقصة ف حياتك سواء بقرارك او غصب عنك.

برج الجوزاء عملياً 

( الشغل والمذاكرة والتخطيط لبكرة ):

عمليا انتا علي وشك نجاح كبير ف حاجة جايز تكون بسيطة ف نظر الناس بس ف منتهى العظمة ف نظرك انتا ودة المهم بصراحة..

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة حاول تاكل كويس وبنفس وفكك من وهم الدايت دة خالص..

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والنارية والترابية والهوائية..

إعرف حظك اليوم برج السرطان بالتفصيل الأربعاء 14/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متخافش واليوم هيعدي عادي خالص.. حاول بس تبص لكل حاجة حلوة ف حياتك.. مش الحاجات اللي ناقصة او الحاجات اللي انتا خسرتها وطفشتها بمزاجك وبتطاردك ف احلامك من ساعتها.. متخافش.. اليوم هيعدي.

برج السرطان عملياً 

( الشغل والمذاكرة والتخطيط لبكرة ):

ركز ف الحاجات اللي انتا حابب تعملها النهاردة بمزاج لأن اليوم مناسب وحاول تفكر حبة قبل ماتصرف اي فلوس ف اي حاجة انتا مش محتاجها بشكل ضروري..

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة محتاجة مزيكا وفرفشة ورقص ودندشة بينك وبين نفسك كدة بعيد عن عيون الناس تماما..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والبرمائية والكتكوتية والهوائية والنارية والمائية..

إعرف حظك اليوم برج الأسد بالتفصيل الأربعاء 14/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

فكر ف مصلحتك بالعقل عشان الموضوع دة لما بيبان للناس ف حالتك بيطفشوا منك تماما.. خليك عاقل وذكي واتصرف صح عشان متخسرش..

برج الأسد عملياً 

( الشغل والمذاكرة والتخطيط لبكرة ):

هتقابل حد مهم ومؤثر ف حياتك النهاردة ف الاغلب.. حاول تخف حبة من حالة التعالي اللي جواك عشان انتا ف الاغلب محتاج الشخص دة اكتر ماهو محتاجك بمراحل.

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة شوية هدوء واسترخاء ودلع وياحبذا لو مددت كدة ف البانيو ف مية سخنة لساعة او اكتر من ساعة.. هتنبسط وتفرفش

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والترابية والنارية والمائية..

إعرف حظك اليوم برج العذراء بالتفصيل الأربعاء 14/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

عيد الحب بالنسبالك عيد على نفسه وبس ف الاغلب بس لو لقيت فرحة هتشارك فيها.. انما مش هتبقى انتا البادي بيها ابدا.. قشطة.. خلي برودك ينفعك

برج العذراء عملياً 

( الشغل والمذاكرة والتخطيط لبكرة ):

جميل النهاردة وواثق ف نفسك.. على الاقل من برة متماسك قدام الناس.. حاول تداري الخوف اللي بيزحف جواك وبتحاول تصدره من تحت لتحت لكل واحد انتا فاكره ضدك او بيحاربك.. لأنه ف الحقيقة محدش مهتم بتاتا.

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة تمام بس حاول تبتسم حبة ومتتطمنش للجو او للناس بزيادة.. بلاش

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والنارية والهوائية والمائية..

إعرف حظك اليوم برج الميزان بالتفصيل الأربعاء 14/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

انتا محتاج تشتكي وتعيط وتتشحتف لحد ثقة تقدر تحكيله براحتك الدنيا عملت معاك ايه الفترة اللي فاتت دي بدون اي خوف او لجلجة او قلق.. انتا محتاج امان وحضن يسع بركان.

برج الميزان عملياً 

( الشغل والمذاكرة والتخطيط لبكرة ):

نقي كويس هتنكد علي مين النهاردة خصوصا وانك اناني جدا فيما يتعلق برغبتك ف الشكوى وممكن ميفرقش معاك بشلن نفسية اللي بتشتكيله من همومك لمجرد انك متضايق وطالبة معاك تشكي وتحكي وتبكي.. ف نفس الوقت بتجري هوا تنبسط بعيد عن نفس الشخص دة بعدين ولا كأنه موجود.. مش كدة ولا انا ظالمك..

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة تبطل دلع وتشوف اللي وراك بدون كسل ولا حجج ملهاش لازمة ولا عازة..

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والهوائية والنارية والبرمائية..

إعرف حظك اليوم برج العقرب بالتفصيل الأربعاء 14/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

فخامة ودلع ف الاجواء مع نوع من انواع الفرفشة المجانية المعلقة الطايرة ف ذرات الهوا حواليك النهاردة.. واضح انك هتنبسط الليلة بشكل مبالغ فيه.. يابختك.

برج العقرب عملياً 

( الشغل والمذاكرة والتخطيط لبكرة ):

قدامك تختار تنبسط او تتنكد.. ف الحالتين انتا الكسبان على فكرة سواء انبسطت وفرفشت واستمتعت باليوم بمزاج او لو قعدت لوحدك واستخبيت من كل الناس

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة تمام وماشي حالها بس ياريت تهتم حبة بحركتك ف الفراغ المحيط بشكل أكبر من كدة..

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والكهربائية والبرطمانية والكهرمانية والهوائية والبرمائية والنارية..

إعرف حظك اليوم برج القوس بالتفصيل الأربعاء 14/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

هتتحب بشدة اليومين دول.. حاول تحط الكلمتين دول ف اعتبارك وانتا بتاخد قرار طناش اللي بتحبه ف عيد الحب..

برج القوس عملياً 

( الشغل والمذاكرة والتخطيط لبكرة ):

اتفرج النهاردة اكتر ماتتكلم.. دة مهم جدا لروقانك الشخصي ولحالتك المزاجية ولقلبك برضة.

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة تمام ومنتعشة وتمام زي إمبارح.. حاول بس تضرب حلبسة بالليل ومتنساش زي إمبارح

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والمائية والهوائية والنارية..

إعرف حظك اليوم برج الجدي بالتفصيل الأربعاء 14/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بلاش يأس عاطفي النهاردة خالص.. اليوم حلو غصبا عن الحب وعن عيد الحب وعن الناس اللي فاكرة ان للحب عيد اساسا المفروض يحتفلوا بيه مع بعض بهدايا ودباديب.

برج الجدي عملياً 

( الشغل والمذاكرة والتخطيط لبكرة ):

اجتهد وابذل اقصى ماعندك ومتسيبش حد يكسر مقاديفك النهاردة لمجرد انه غيران من انك عاوز تنجح ف حياتك او على الاقل تستقل بدماغك وحياتك..

برج الجدي صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها بس ياريت تهتم حبة بمفاصلك وبالتنوع الغذائي اللي جسمك محتاجه..

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والكشرية والبرمائية والترابية والنارية..

إعرف حظك اليوم برج الدلو بالتفصيل الأربعاء 14/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

اليوم هادي وعادي ومفيش فيه اي داعي للنكد من اي نوع بإستثناء شوية افكار ضغنتتة قد الحشرات كدة ف الحجم.. بس متقلقش.. شوية زقططة وفرفشة بالعند ف نكد الحياة والافكار دي هتدبل وتموت مكانها.. قبل ماتتحرك اساسا ف اتجاهك..

برج الدلو عملياً 

( الشغل والمذاكرة والتخطيط لبكرة ):

ابعد عن التفكير ف الاحزان قدر الإمكان وحذاري من الناس اللي بتعتبر مهمتها تنشر الطاقة السلبية والتشاؤم حواليك.. كمل ف طريقك ومتقفش عشان حد.. بلا وجع دماغ.

برج الدلو صحياً 

( نفسيا وجسمانيا وكل مايخص طاسة المزاج ):

صحتك اليوم فل بس ياريت سوائل كتير حبة وشوية اهتمام ببشرتك وبشعرك وبطرطوفة مناخيرك..

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والكتكوتية والبرمائية والمائية والنارية والترابية..

إعرف حظك اليوم برج الحوت بالتفصيل الأربعاء 14/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

احتفل بحبك لنفسك النهاردة احسن ماتحاول تحتفل بحب حد تاني ليك وهو اساسا مش مكمل ف حياتك لفترة طويلة.. بلاش.. انتا أهم بمراحل منه

برج الحوت عملياً 

( الشغل والمذاكرة والتخطيط لبكرة ):

أعصابك محتاجة شوية هدوء وإسترخاء ونزهة ف اي حتة بعيد عن غابات الاسمنت ونفسيات البشر الرمادي..

برج الحوت صحياً 

( نفسيا وجسمانيا وكل مايخص طاسة المزاج ):

صحيا انتا كويس بس حاول تبعد عن شحتفة عيد الحب لأنه ممنوش فايدة واضحة تذكر غير انه بيفكرك انك يا اما بتحب ومش مبتتحب او انك مش بتتحب اساسا..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والكتكوتية والمستحية والنارية والترابية.