إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

صورة نادرة لأسيوطوصوروس.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الخميس 8/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

سعادتك جزء منها سعادة اللي حواليك.. مهم تاخد بالك من الموضوع دة ومتبقاش فردي.. مفيش حد بيعرف ينبسط لوحده طول الوقت

برج الحمل عملياً

( الشغل والمذاكرة والتخطيط لبكرة ):

فترة الليل هتبقى فترة نشاط زايد.. حاول بالنهار ماتنساقش ورا الهموم والمشاكل اللي بتفتكرها اول مابتصحى من النوم.. كمان ياريت تنام كويس وبلاش إهمال ف صحتك.

برج الحمل صحياً

( نفسيا وجسمانيا وكل مايخص طاسة المزاج ):

صحيا انتا تمام.. ممكن يكون في رشح او برد بس لو نمت كويس هتخف وهتبقى فل..

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والنارية والترابية والهوائية..

إعرف حظك اليوم برج الثور بالتفصيل الخميس 8/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

الحب مهم للإنسان بس لو هيجيبله وجع دماغ وقلة نوم وشحتفة ومشاكل ورسايل مش كويسة ف اوقات مش كويسة يبقى بلاش منه احسن

برج الثور عملياً

( الشغل والمذاكرة والتخطيط لبكرة ): 

مهم تحدد النهاردة بينك وبين نفسك انتا عاوز ايه من الحياة بشكل واضح عشان تعرف تخطط وتنفذ الخطط اللي هتخططها دي او ممكن تطنش كل دة اساسا وتنزل تسهر مع اصحابك الليلة وتفرفشوا وتعاندوا ف نكد الحياة قدر الإمكان.

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة كله بونو وماشي حاله وقشطة عليك..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والترابية والمائية والبرمائية..

إعرف حظك اليوم برج الجوزاء بالتفصيل الخميس 8/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

صراع داخلي بسيط ف بداية اليوم هتخرج منه حالك أفضل وأحسن وهتفوق وتشوف اللي وراك بشكل كويس ومنتظم.. حاول بس تستغل فترة الليل ف تمشية بسيطة بلا اي هدف.

برج الجوزاء عملياً 

( الشغل والمذاكرة والتخطيط لبكرة ):

عمليا النهاردة تقدر تعمل اي حاجة بتحلم بيها براحتك المهم متضايقش حد وانتا بتعمل الحاجة دي وخصوصا نفسك

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة هتحتاج تثق في نفسك حبة عشان اليوم يعدي عليك على خير..

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والنارية والترابية والهوائية..

إعرف حظك اليوم برج السرطان بالتفصيل الخميس 8/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متستسلمش لأي إستفزاز عابر من الحياة أو من الناس النهاردة.. كبر دماغك وعلى الأخر.

برج السرطان عملياً 

( الشغل والمذاكرة والتخطيط لبكرة ):

متدورش على اعجاب الناس بفكرك او بكلامك او بسكوتك عشان احيانا السكوت دة بيبقى دليل على الفراغ اللي مالي الدماغ مش على الحكمة ولا مؤاخذة..

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة محتاجة شوية مساج ورا ودانك لمدرة ربع ساعة..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والبرمائية والترابية والمائية والهوائية..

إعرف حظك اليوم برج الأسد بالتفصيل الخميس 8/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

ابعد عن اي زحمة النهاردة عشان النهاردة انتا رقيق ومش مستحمل اي دوشة

برج الأسد عملياً 

( الشغل والمذاكرة والتخطيط لبكرة ):

مشاوير نفسية كتير النهاردة معظمها تايه ومش باين بالظبط بيحصل ليه او فايدته بالنسبالك ايه.. فكر كويس دة بيحصلك ليه وايه سببه.. هل انتا السبب ولا في حاجة مضايقاك بقالها فترة وانتا بتتجاهلها وكبرت جواك ف كواليس عقلك وبقت مشكلة كبيرة

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها بس انتا محتاج ف الاغلب تلعب جيمز الليلة ولو لساعة مع حد من اصحابك..

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والهوائية والترابية والنارية..

إعرف حظك اليوم برج العذراء بالتفصيل الخميس 8/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

الونس الحلو مهم النهاردة.. الحكي مع حد بتحبه وبيحب يسمعك هيبقى مثير وجميل ومنعش لمشاعرك النهاردة بشكل كبير جدا..

برج العذراء عملياً 

( الشغل والمذاكرة والتخطيط لبكرة ):

قدامك تنبسط وتغطس وتقب ف بحور السعادة وقدامك تسقي ف شوربة الإكتئاب.. نقي هتعمل ايه كويس وإختار اللي يفيدك فعلا مش اللي يعظم من احساسك الداخلي الدفين بإنك ضحية للاخرين وللحياة.. فوق كدة وخد حقك ونصيبك ف الانبساط.. الحياة مليانة حواليك فرص مينفعش حد يشاورلك عليها الا دماغك انتا وبس..

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها وكويسة بس حاول تهدى حبة ف استهلاكك للملح والسكر..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والترابية والمائية والهوائية..

إعرف حظك اليوم برج الميزان بالتفصيل الخميس 8/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

جميل النهاردة بشكل إستثنائي وكيوت.. ماشاء الله ماشاء الله.. حاول تستفيد من الموضوع دة بشكل عام ف الحياة.. مهواش عيب ابدا..

برج الميزان عملياً 

( الشغل والمذاكرة والتخطيط لبكرة ):

متقفش ترغي او تتكلم ف حاجة انتا مش فاهم فيها بشكل كويس لمجرد انك حابب تفرح حبة بإحساس انك على مسرح وسط الناس

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة ممتازة.. ياريت تصحى من بدري تستفاد من الصحة دي بشكل كويس..

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والترابية والنارية والهوائية والبرمائية..

إعرف حظك اليوم برج العقرب بالتفصيل الخميس 8/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

المزيكا النهاردة هتبقى مهمة جدا ف حياتك سواء العاطفية او العملية لو لمجرد شغل وقت الفراغ اللي انتا غالبا بتضيعه ف التفكير ف الاحتمالات الأسوأ وف أحلامك اللي مش عارف تحققها بسلاسة بالرغم من انك بتتعب عشانها جدا.

برج العقرب عملياً 

( الشغل والمذاكرة والتخطيط لبكرة ):

هتنجح وهتعمل كل اللي انتا بتحلم بيه قريب متقلقش.. ادي نفسك بس فرصة واهدى عليها حبة مش اكتر..

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة اي نشاط رياضي بسيط ف اول اليوم عشان تفرفش وتنتعش.. بلاش قهوة الصبح بس

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والبرطمانية والترابية والهوائية والهوائية والنارية..

إعرف حظك اليوم برج القوس بالتفصيل الخميس 8/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

ركز ف التعبير عن حبك بشكل حلو يدعم نفسية اللي بتحبه مش ف انك تشد انتباهه على الفاضي وخلاص عشان فاكره انشغل عنك بحاجة اهم منك..

برج القوس عملياً 

( الشغل والمذاكرة والتخطيط لبكرة ):

إختار الامكان اللي تستاهل التواجد فيها النهاردة كويس ومتروحش ف اي حتة كدة وخلاص.. إنتقي اللي يناسبك واللي يقدر قيمتك ووجودك وبس.

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها وتقدر تعتبرها كويسة ف حالة واحدة بس.. لو سقيت بقسماط كتير ف الشاي وانبسطت.. اما لو عملت كدة ومنبسطتش يبقى تعرف انك ف المود ومزاجك مش رايق.. اما لو كوباية الشاي نفسها وقعت على السجادة ف دة فال مش كويس للسجادة مش ليك انتا خالص..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والمائية والهوائية والنارية..

إعرف حظك اليوم برج الجدي بالتفصيل الخميس 8/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

عاطفيا انتا محظوظ بالحب بقالك فترة ومدكن كل حاجة عشان خايف لتتحسد تقريبا.. عموما ربنا يسهلك ياسيدي وتنبسط..

برج الجدي عملياً 

( الشغل والمذاكرة والتخطيط لبكرة ):

إتفرج على الشاطرين وإتعلم منهم إزاي مبيزهقوش من المحاولة مهما فشلوا ومهما وقعوا ومهما إتفشلوا من ناس تاني عن عمد ورغم كل دة برضة لسة عندهم أمل وبيقاوموا ومصدقين ف نفسهم وف قدراتهم.. انتا محتاج الإلهام دة ف حياتك العملية النهاردة.

برج الجدي صحياً 

( نفسيا وجسمانيا وكل مايخص طاسة المزاج ):

صحتك كويسة وزي الفل.. خد بالك من التراب العالق ف الجو عشان ممكن يضايقك حبة خصوصا بالنهار..

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والنارية والهوائية والكشرية والبرمائية

إعرف حظك اليوم برج الدلو بالتفصيل الخميس 8/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

"مش مهم".. جملة مهمة جدا النهاردة بالنسبة لقلبك.. ف متشغلش بالك اوي بأي حاجة بشكل حقيقي النهاردة أكتر من الاسترخاء والراحة..

برج الدلو عملياً 

( الشغل والمذاكرة والتخطيط لبكرة ):

اسمع كويس لإحساسك وميبقاش رد فعلك سابق لتفكيرك المتأني.. ادي كل حاجة وقتها بس وهتنبسط ف الاخر.. ثق ف كدة.. إبعد بس عن الفشل والفاشلين النهاردة قدر الإمكان.. مش اكتر.

برج الدلو صحياً 

( نفسيا وجسمانيا وكل مايخص طاسة المزاج ):

صحتك اليوم محتاجة حبة اهتمام وسوائل زيادة وعدد ساعات نوم معقولة والاهم بعد تام عن القلق والتوتر ومسبباتهم ف حياتك

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والمائية والهوائية والنارية والكتكوتية والبرمائية..

إعرف حظك اليوم برج الحوت بالتفصيل الخميس 8/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متدورش على الحب بشكل يبين انك مش هتعرف تعيش من غير الحب دة عشان الحياة هتلاعبك بزيادة لو خدت بالها من الموضوع دة

برج الحوت عملياً 

( الشغل والمذاكرة والتخطيط لبكرة ):

مهم تاكل كويس النهادرة وتتغذى عشان تعرف تحارب وتنتصر على أعدائك التخيليين ف أحلامك.

برج الحوت صحياً 

( نفسيا وجسمانيا وكل مايخص طاسة المزاج ):

صحيا النهاردة مزاجك لازم يبقى رايق ولازم وحتما تبتدي اليوم بشكل نشيط ومشجع..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والنارية والهوائية والمستحية والترابية.