إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

مش اي حد شكله حلو يبقى ذكي وإلا كان اي حد لابس صوف يبقى متصوف.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الاثنين 5/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

طوفان حنية وحب جاي ف طريقك وإحتمال تتهادى هدية حلوة كمان ياعم.. ياللا إنبسط وزقطط وفرفش براحتك بقى

برج الحمل عملياً

( الشغل والمذاكرة والتخطيط لبكرة ):

نشن على الحاجات اللي تعلي مزاجك وتروقه الليلة.. مزيكا أكل خروج شوبينج فاكهة مكرونة بالبشاميل.. اللي يعجبك وييجي ف مزاجك روحله براحتك..

برج الحمل صحياً

( نفسيا وجسمانيا وكل مايخص طاسة المزاج ):

صحيا انتا منتعش ومزقطط.. حاول بس متقعدش مع حد نكدي او كشر وبيكسل يبتسم ف وشك.. مالوش لازمة اساسا

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والترابية والهوائية..

إعرف حظك اليوم برج الثور بالتفصيل الاثنين 5/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

قلبك محتاج شوية إهتمام يابيه.. ياريت متهملوش اكتر من كدة عشان ميعملكش قلق وأزعرينة ع الفاضي..

برج الثور عملياً

( الشغل والمذاكرة والتخطيط لبكرة ): 

ايا كان اللي هيعترض طريقك وطريق مزاجك وسعادتك النهاردة ممكن ينهزم ويدوب مكانه بشوية ثقة وثبات ومثابرة وبرود.. دة الميكس الحقيقي الوحيد اللي بينفع ف الدنيا دي ومع العالم دي.. مش الهروب ف النوم ولا العصبية المفرطة..

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة انتا تمام بس خد بالك من جيوبك الانفية حبة واغسلها بمية دافية وملح قبل ماتنام.. مش اكتر..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والترابية والمائية والبرمائية..

إعرف حظك اليوم برج الجوزاء بالتفصيل الاثنين 5/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متحطش حد ف دماغك.. مش مستاهلة فعلا والله.. سيبه والحياة هتخليه ينفجر لوحده قريب.. ثق ف دة

برج الجوزاء عملياً 

( الشغل والمذاكرة والتخطيط لبكرة ):

تقدر تنام براحتك النهاردة ومتشيلش هم اي حاجة خالص.. المهم بالك يبقى رايق ومتقعدش تخترع حاجات تخوف نفسك بيها قبل ماتنام..

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة مهم تسبح ف البانيو حبة مع البطة البلاستك الصفرا بتاعتك..

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والنارية..

إعرف حظك اليوم برج السرطان بالتفصيل الاثنين 5/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

الامور العاطفية مستقرة او ملهاش وجود اساسا ف حياتك الا من بعيد لبعيد.. قشطة انتا حر ف قلبك وبراحتك..تتحب او متتحبش انتا حر ف كل الاحوال.. احنا مالنا..

برج السرطان عملياً 

( الشغل والمذاكرة والتخطيط لبكرة ):

لو حسيت بحرارة زيادة النهاردة او حسيت ان ضغطك عالي يبقى تشرب كركديه ساقع كتير..

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة ماشي حالها وكويسة بس نفسيتك مشمئنطة وواخدة جنب من الحياة حبة كأنك على وشك تتقمص بس مبتتقمصش للأخر محدش عارف ليه..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والكتكوتية والبرمائية والترابية والهوائية..

إعرف حظك اليوم برج الأسد بالتفصيل الاثنين 5/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

تعاطفك مع الناس حاجة كويسة وتتحسبلك والله بس مش لازم ترازي نفسك عشانهم.. انتا مش سوبر هيرو ابدا والله..

برج الأسد عملياً 

( الشغل والمذاكرة والتخطيط لبكرة ):

فكر ف مصلحتك بشكل براجماتي عملي وبس.. العواطف والاخوة والصداقة ملهاش مكان ف الشغل ولا ف تعاملات الفلوس

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها بس حاول متممقش عينك ف الموبايل طول اليوم.. ريح رقبتك وعينيك حبة بليز عشان متصدعش..

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والهوائية والترابية..

إعرف حظك اليوم برج العذراء بالتفصيل الاثنين 5/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إيقاع سريع وكيرف طاقة عالي النهاردة ماشاء الله.. منتعش ومفرفش أوي على ايه بالظبط..

برج العذراء عملياً 

( الشغل والمذاكرة والتخطيط لبكرة ):

عمليا الليلة هتخطط لمشروع مهم وفكرة حلوة جدا وييجي منها.. ثق ف نفسك واكتب كل حاجة على ورق عشان متنسهاش ابدا..

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة ف الاوكيه.. استفيد من الطاقة الزيادة اللي عندك ف الخير ياريت ومتضيعش الوقت ف رغي وكلام ممنوش رجا..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والترابية والهوائية..

إعرف حظك اليوم برج الميزان بالتفصيل الاثنين 5/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خليك ف حالك النهاردة ومتشغلش بالك بحد ولا بمصايب حد.. حل مشاكلك الاول ياخويا وبعد كدة ابقى اتبرع بحلول لمشاكل الاخرين

برج الميزان عملياً 

( الشغل والمذاكرة والتخطيط لبكرة ):

قدامك تختار طريق الانبساط والروقان والمزاج الصحي السليم.. ايه بقى اللي يوديك ناحية النكد؟

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها.. حاول بس تعمل الحاجات اللي تحسن من مودك ومزاجك وتفرفشك وبس

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والترابية والبرمائية..

إعرف حظك اليوم برج العقرب بالتفصيل الاثنين 5/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متخشش نفق النكد والاوفرثينكينج برجليك وبإختيارك.. عيب.. إنتا اوعى من كدة بمراحل..

برج العقرب عملياً 

( الشغل والمذاكرة والتخطيط لبكرة ):

قدامك فرص كتير للنجاح النهاردة.. ركز كدة واتصرف صح ونقي كلامك كويس وبلاش لا زهو مفرط ولا غرور مقرف..

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة تمام بس ياريت تهتم حبة برقبتك بشكل استثنائي وتعملها مساج او تدليك يخليها تفك حبة

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والبرطمانية والترابية والهوائية والنارية..

إعرف حظك اليوم برج القوس بالتفصيل الاثنين 5/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محادثة بناءة مع حد بيفهم وانتا بتستريحله النهاردة وهتسفر ف الاغلب عن شوية افكار حلوة وقناعات جديدة بالنسبالك بس كما هو العادة.. هتسمع وهتعمل نفسك بتفكر ف الكلام وبس.. على بالليل هتنسى كل حاجة بما فيها الكلام دة..

برج القوس عملياً 

( الشغل والمذاكرة والتخطيط لبكرة ):

هتعمل اللي ف دماغك برضة مفيش فايدة.. انتا مبتقتنعش بكلام حد اساسا.. لما بتسمع حد بينصحك بتشغل القرد اللي بيصقف جوة دماغك وتركز معاه وبتبتسم للي بيكلمك وبتهز دماغك وبس..

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة شوية مشي ع الكورنيش مع ونس لطيف بالليل

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والمائية والترابية

إعرف حظك اليوم برج الجدي بالتفصيل الاثنين 5/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متعملش نفسك متفاجئ النهاردة والنبي.. انتا عارف كويس ان اللي حصل دة لازم كان هيحصل.. دة بديهي المفروض يامعلم..

برج الجدي عملياً 

( الشغل والمذاكرة والتخطيط لبكرة ):

اللي بيزرع بطيخ لازم يحصد بطيخ.. مش فراولة ولا ملوخية.. ادي نفسك وقت وهتستوعب وتعدي وترجع تاني تفرفش وتتألق.. حبة وقت بس مع نفسك كدة وهتبقى فل متقلقش..

برج الجدي صحياً 

( نفسيا وجسمانيا وكل مايخص طاسة المزاج ):

صحتك كويسة بس محتاج تاخد احتياطاتك ضد البرد حتى لو حسيت ان الجو بالنهار بدأ يحرر تاني..

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والهوائية والنارية والبرمائية

إعرف حظك اليوم برج الدلو بالتفصيل الاثنين 5/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إضربهم نفسيا وبقوة النهاردة.. مترحمش حد بتاتا.. خصوصا العفاريت الزرقا اللي بتتنطط ف خيالك طول الوقت دي

برج الدلو عملياً 

( الشغل والمذاكرة والتخطيط لبكرة ):

متسكتش لحد النهاردة.. رد وبقوة ومترحمش حد بيآذيك.. كفاية لحد كدة سكوت وطناش بلا بتاع ياجدع

برج الدلو صحياً 

( نفسيا وجسمانيا وكل مايخص طاسة المزاج ):

صحتك تمام النهاردة.. اضرب عصير بقدونس واتمشى حبة قبل ماتنام بس مش اكتر زي إمبارح بالظبط بس التمشية الليلة ممكن تكون أقل حبة من تمشية إمبارح..

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والمائية والترابية والهوائية والبرمائية..

إعرف حظك اليوم برج الحوت بالتفصيل الاثنين 5/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متتسرعش النهاردة ومتبقاش مندفع.. خليك كوول ورايق على قد ماتقدر عشان في حاجات حلوة ليك ولقلبك جاية ف سكتك قريب.. إستعد كويس

برج الحوت عملياً 

( الشغل والمذاكرة والتخطيط لبكرة ):

اليوم ملائم للهدوء وللدلع وللمزيكا وللتمشية من الصالة للبلكونة ومن البلكونة للصالة..

برج الحوت صحياً 

( نفسيا وجسمانيا وكل مايخص طاسة المزاج ):

صحيا النهاردة انتا كويس وصحتك ماشي حالها.. حاول تحافظ على مزاجك رايق بقى عشان تكمل الحالة المثالية اللي بتحبها..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والنارية والهوائية والترابية.