إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

كل واحد عنده مصيبة يحكيهالك وميعرفش نكتة واحدة تضحك بجد.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الأحد 4/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

يوم جميل ورايق وتقدر تتنطط وتزقطط وترقص براحة راحتك فيه.. حاول بس لما تعمل دة تعمله عشان انتا عاوز تنبسط مش كنوع من انواع الكيد ف حد متضايق منك

برج الحمل عملياً

( الشغل والمذاكرة والتخطيط لبكرة ):

اليوم مناسب للخروج وللفسح وللضحك وللفرفشة.. غير كدة متشغلش بالك بأي حاجة

برج الحمل صحياً

( نفسيا وجسمانيا وكل مايخص طاسة المزاج ):

صحيا انتا كويس وقشطة عليك.. حاول تستفاد من الحالة دي ف الخير على قد ماتقدر النهاردة..

إعرف توافق برج الحمل مع باقي الأبراج النهاردة:

متوافق مع الإصرار علي إنكار أي حاجة وكل حاجة النهاردة زي إمبارح وأول إمبارح وكل يوم تقريبا..بس مسيرك هتواجه..

إعرف حظك اليوم برج الثور بالتفصيل الأحد 4/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

قدامك فرص سانحة ف كل حتة للإنبساط والزقططة وانتا اللي مكسل.. خايف من ايه بالظبط؟ معقول خايف تنبسط!.

برج الثور عملياً

( الشغل والمذاكرة والتخطيط لبكرة ): 

متبصش على اللي فات.. إردم على الماضي وإنساه.. قدامك ايام حلوة جدا لسة هتعيشها وتعمل فيها ذكريات حلوة براحة راحتك.. إتقل بس كدة وتفاءل وهتشوف.

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة كل شيء على مايرام وتمام بس ياريت لو تعمل اي نشاط رياضي من اي نوع انشالله تتنطط مكانك حبة.

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والترابية والنارية والمائية..

إعرف حظك اليوم برج الجوزاء بالتفصيل الأحد 4/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متجريش ورا حد مبيجريش وراك.. مش مستاهلة.. خليك مكانك احسن بلا وجع دماغ..

برج الجوزاء عملياً 

( الشغل والمذاكرة والتخطيط لبكرة ):

عمليا النهاردة تقدر تملى طبق مية سخنة وتحط فيه شوية شاورچيل وتسقي فيه رجليك نص ساعة وبعد كدة تفعص بصوابع رجليك ف شراشيب اي سجادة تعجبك

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة تقدر تعمل اي حاجة تيجي ف بالك او بتحلم بيها من فترة.. اليوم مناسب للانبساط بشكل عام.. مش للنكد ولا للشحتفة.

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والترابية والنارية والهوائية..

إعرف حظك اليوم برج السرطان بالتفصيل الأحد 4/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إقرا علامات الحياة النهاردة كويس وخد بالك وخليك مفتح.. شغل دماغك كدة وبلاش تبقى حساس تجاه كل كلمة عشان اليوم يعدي بس مش اكتر..

برج السرطان عملياً 

( الشغل والمذاكرة والتخطيط لبكرة ):

عمليا انتا عارف اللي وراك كويس وبتحاول تنجز فيه على قد ماتقدر ودة جميل.. بس لازم تطور من نفسك وبسرعة عشان تواكب كل المتغيرات اللي بتحصل حواليك طول الوقت.. صفي دماغك كدة وروقها بحبة مزيكا بالليل وابتدي شوف انتا حابب تعمل ايه جديد ف حياتك.. الوقت مناسب

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة محتاجة منك شوية اهتمام بسيط خصوصا فيما يخص جيوبك الانفية

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والكتكوتية والبرمائية والهوائية..

إعرف حظك اليوم برج الأسد بالتفصيل الأحد 4/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

طول مانتا محتفظ بمشاعرك لنفسك مفيش حب هيقرب منك.. طول مانتا فاقس الناس بزيادة ومشغل دماغك عليهم مفيش حب هيكمل معاك.. إنسى

برج الأسد عملياً 

( الشغل والمذاكرة والتخطيط لبكرة ):

خليك لطيف النهاردة على قد ماتقدر وابتسم وشاور لأي حد رزل يضايقك ومتعبروش بكلمة.. ميستاهلش.

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة زي الفل على فكرة.. اي إحساس تاني ينتابك بخصوصها هيبقى وهم إلا لو وجع قوي مستمر بعد الشر عليك من الوجع القوي..

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والهوائية والمائية والترابية..

إعرف حظك اليوم برج العذراء بالتفصيل الأحد 4/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

راقب النجوم النهاردة حبة ف السما بالليل لوحدك.. راقبهم كويس جدا..

برج العذراء عملياً 

( الشغل والمذاكرة والتخطيط لبكرة ):

حاول تستخدم التكنولوجيا والتقدم الانساني العلمي بشكل عام ف خدمة أغراضك بذكاء وانتا تنجح وتتوفق.. أهم حاجة متخافش وتثق ف نفسك مش اكتر.

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها بس ياريت متقعدش مزنوق ف اخر كنبة ف الميكروباس خالص.

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والترابية والهوائية والنارية..

إعرف حظك اليوم برج الميزان بالتفصيل الأحد 4/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتتمسكن لحد ما تتمكن وتبرر لنفسك اي حاجة عشان توصل للي انتا عاوزه وخلاص ولما مبتعرفش تعمل كدة بتتقمص وتزعل وبتبقى عاوز العالم كله يزعل معاك ليه.. ايه المنطق اللي ف كدة بذمتك ياشيخ؟!..

برج الميزان عملياً 

( الشغل والمذاكرة والتخطيط لبكرة ):

متفخشش حد من تحت لتحت النهاردة.. إعمل شوية خير أحسن وبلاش شر ياعم الحاج.

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة اهتمام وأكل ف مواعيد منتظمة شوية وبكميات معقولة من غير عك او طفاسة..زي إمبارح بالظبط

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والنارية والهوائية والبرمائية..

إعرف حظك اليوم برج العقرب بالتفصيل الأحد 4/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتلمس السحاب ف أحلامك بطراطيف صوابعك بس بتصحى متلاقيهوش.. مسيرك تقفشه ف يوم وانتا صاحي متقلقش..

برج العقرب عملياً 

( الشغل والمذاكرة والتخطيط لبكرة ):

خد بالك النهاردة عشان ممكن جدا تكون أحلامك متجاوزة لقدراتك او للظروف المحيطة.. خليك واقعي حبة بليز.

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة كويسة وعنب.. كيرف الطاقة عندك عالي وتقدر تعمل بالطاقة دي اي حاجة تعجبك..

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والبرطمانية والترابية والهوائية والمائية.

إعرف حظك اليوم برج القوس بالتفصيل الأحد 4/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

هتسمع كلام النهاردة ممكن يكون عجيب ومش منطقي بس لو صبرت حبة إحتمال يبقاله منطق ويبقى مبلوع شوية.. ف كل الأحوال متعلقش بتسرع وخليك كوول ورايق ف نفسك.

برج القوس عملياً 

( الشغل والمذاكرة والتخطيط لبكرة ):

كل شيء هادي وعادي النهاردة على المستوى العملي.. على وضعك.. على وضعك

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة شوية مشي ع الكورنيش مع ونس لطيف بالليل

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والمائية والترابية والهوائية.

إعرف حظك اليوم برج الجدي بالتفصيل الأحد 4/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متلومش حد على افعالك من فضلك وواجه وشيل المسئولية كويس.. انتا معدتش صغير خلاص.

برج الجدي عملياً 

( الشغل والمذاكرة والتخطيط لبكرة ):

ركز ف حياتك العملية حبة بشوية تفاؤل ومجهود وبطل تلوم اللي حواليك على المصايب اللي انتا السبب فيها.. عيب والله اللي بتعمله دة

برج الجدي صحياً 

( نفسيا وجسمانيا وكل مايخص طاسة المزاج ):

صحتك تمام وزي الفل.. يعني معندكش حجة وتقدر تشتغل بقوة وتنجح وتخلص اللي وراك

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والهوائية والبرمائية

إعرف حظك اليوم برج الدلو بالتفصيل الأحد 4/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتسقي ف شوربة خيالك اليومين دول بقوة وإندفاع.. قشطة طالما مبسوط وبتعمل اللي عليك.. محدش لاقي خيال حلو اساسا اليومين دول.

برج الدلو عملياً 

( الشغل والمذاكرة والتخطيط لبكرة ):

طول مانتا بتعمل اللي عليك وزيادة حتة ومبسوط بيه يبقى متقلقش من اي حاجة.. السعادة شيء أو?ر ريتيد اساسا متشغلش بالك بيه

برج الدلو صحياً 

( نفسيا وجسمانيا وكل مايخص طاسة المزاج ):

صحتك تمام النهاردة.. اضرب عصير بقدونس واتمشى حبة قبل ماتنام بس مش اكتر

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والمائية والترابية والبرمائية..

إعرف حظك اليوم برج الحوت بالتفصيل الأحد 4/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

علاطول خايف ومرعوش وحزين وبتثق ف الناس بسهولة.. طبيعي تحس انك ضحية ف اخر كل قصة لأنك مش واخد بالك انك انتا اللي بتأيف الدور دة لنفسك.. انتا اللي بتزق اللي قدامك دايما لدور الظالم بالعافية لمجرد انك بتحب تحس انك مظلوم بدل ماتحاسب نفسك صح وبشكل عادل

برج الحوت عملياً 

( الشغل والمذاكرة والتخطيط لبكرة ):

ركز ف مستقبلك وبس النهاردة ومتركزش مع حد تاني عشان متتعبش.. بلاش

برج الحوت صحياً 

( نفسيا وجسمانيا وكل مايخص طاسة المزاج ):

صحيا النهاردة مهم تخلي بالك من نفسك وخصوصا من اي حد بيكح او بيعطس حواليك.. ميكروب البرد طاير ف الجو بيدور على ضحايا طول الوقت خد بالك..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والنارية والترابية.