إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

الوقت مناسب عشان كل واحد يجهز لفورمة الساحل من دلوقتي.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل السبت 3/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

عاطفيا انتا مش مهتم اساسا ف الاغلب ف قشطة.. انتا حر ف قلبك.. تغسله تنشره تكويه.. تحطه ف الفريزر.. انتا حر

برج الحمل عملياً

( الشغل والمذاكرة والتخطيط لبكرة ):

هتقول كلام مهم النهاردة قدام ناس كتير وهتبقى محط الانظار من الكل ماشاء الله.. حاول متضحكش ف النص بس وتبوظ كل حاجة مش أكتر..

برج الحمل صحياً

( نفسيا وجسمانيا وكل مايخص طاسة المزاج ):

صحيا انتا تمام بس حاسس بكسل عام ورغبة ف الأكل والهروب ف النوم وبس..

إعرف توافق برج الحمل مع باقي الأبراج النهاردة:

متوافق مع الإصرار علي إنكار أي حاجة وكل حاجة النهاردة زي إمبارح وأول إمبارح وكل يوم تقريبا..بس مسيرك هتواجه..

إعرف حظك اليوم برج الثور بالتفصيل السبت 3/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

مرهق النهاردة نفسيا وجسمانيا وبتحلم ف أحلامك انك بتجري وأرانب كتير بتجري وراك..

برج الثور عملياً

( الشغل والمذاكرة والتخطيط لبكرة ): 

متخافش من الأرانب البيضا اللي بتجري وراك ف احلامك.. انتا بس بقالك كتير بتعك ف الاكل قبل ماتنام.. مش أكتر..

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة انتا محتاج تسترخي كدة وتصفي ذهنك من اي مشكلة بتعترض طريقك وطريق احلامك وتفهم نفسك كويس جدا ان مفيش حاجة مهمة ولا في حاجة تستاهل تزعل عليها او منها اوي كدة.. روق يابرنس مسيرها تروق وتحلى ان شاء الله..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والترابية والمائية..

إعرف حظك اليوم برج الجوزاء بالتفصيل السبت 3/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إحمي قلبك النهاردة كويس جدا على قد ماتقدر ومتسرحش ورا المآسي والاحزان.. بلاش..

برج الجوزاء عملياً 

( الشغل والمذاكرة والتخطيط لبكرة ):

هتشوف النهاردة غالبا مآسي وأحزان قد البركان وخارجة من حدود الزمكان.. طنش وإعمل نفسك مشوفتش حاجة.. انتا مش ناقص نكد اساسا خالص.. طنش وملكش دعوة..

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة انتا كويس وماشي حالك بس ابعد عن النكد تماما بليز.. مش اكتر..

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والترابية والهوائية..

إعرف حظك اليوم برج السرطان بالتفصيل السبت 3/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إبعد عن الصعبانيات والنكد والحزن والشحتفة تماما النهاردة عشان انتا مش ناقص وفاضلك تكة وتعيط اساسا.. انتا حساس جدا جدا وبزيادة.. متنكرش دة من فضلك..

برج السرطان عملياً 

( الشغل والمذاكرة والتخطيط لبكرة ):

بص قدامك كويس النهاردة وانتا ماشي او سايق عشان متخبطش بنكدك ف سعادة حد وترجع تزعل وهو كمان يزعل وتبقى بصرة نكد ملهاش أي تلاتين لازمة..

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة محتاجة دفا وقهوة وفيروز وكتاب حلو عاطفي رومانسي ملوش علاقة بالواقع لا من قريب ولا من بعيد..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والكتكوتية والبرمائية والترابية والنارية والهوائية..

إعرف حظك اليوم برج الأسد بالتفصيل السبت 3/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

قلبك بخير وشغال وكل حاجة.. انتا اللي مش فاضيله غالبا فمن فضلك متلوموش عمال على بطال عشان دة ظلم ياكابتن..

برج الأسد عملياً 

( الشغل والمذاكرة والتخطيط لبكرة ):

إرحم اللي حواليك شوية من دور المراقب العام على أداء البشر دة حبة وركز ف حالك أحسن..

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة زي الفل على فكرة.. اي إحساس تاني ينتابك بخصوصها هيبقى وهم إلا لو وجع قوي مستمر بعد الشر عليك من الوجع القوي..

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والهوائية والنارية والترابية..

إعرف حظك اليوم برج العذراء بالتفصيل السبت 3/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

فك الخناقة اللي بين قلبك وعقلك بسرعة النهاردة وبشكل حاسم عشان طولت أوي وبوخت برضة أوي اوي..

برج العذراء عملياً 

( الشغل والمذاكرة والتخطيط لبكرة ):

متشمتش ف حد النهاردة مهما كان ظالمك زمان.. محدش يعرف بكرة فيه ايه وكمان دي مش قيمتك يامعلم ابدا.. انتا اكبر من كدة بمراحل والله..

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة تمام وزي الفل بإسثناء شوية برد محتاجين مسكن وشوية شوربة ونفسية عالية وكله هيبقى فل ان شاء الله..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والترابية والنارية..

إعرف حظك اليوم برج الميزان بالتفصيل السبت 3/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إختار التوقيت الصح الليلة عشان تتكلم ف اي حاجة تخص مشاعرك.. بلاش انانية ومتفترضش انك اهم من اللي بتحبه.. إقدر على روحك حبة عشان متخسرش كل حاجة..

برج الميزان عملياً 

( الشغل والمذاكرة والتخطيط لبكرة ):

إهتم بالوقت النهاردة جدا ف كل حاجة ومتروحش اي ميعاد متأخر بتاتا.. كمان ياريت تطلع من دور المظلوم دة حبة عشان مش لايق عليك بصراحة خالص..

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة اهتمام وأكل ف مواعيد منتظمة شوية وبكميات معقولة من غير عك او طفاسة..

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والسمكمكية والنيلية والفضية والنارية والبرمائية..

إعرف حظك اليوم برج العقرب بالتفصيل السبت 3/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

قاعد حاطط ايدك على خدك ومستني اوتوبيس الحب ولا ايه؟.. ماتقوم وتتحرك وتتحب براحتك.. مستني الحياة تتحايل عليك ولا ايه..

برج العقرب عملياً 

( الشغل والمذاكرة والتخطيط لبكرة ):

هتساعد حد النهاردة وهتنقذه من ورطة كبيرة ف الاغلب بحكمتك وطيبة أخلاقك.. هو دة الكلام يامعلم هو دة..

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة منك مساج ف الاغلب لرقبتك وضهرك يستمر لمدة ساعة وبعده دش سخن مولع وتنام وتحلم.. بس كدة

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والبرطمانية والنارية والترابية والمائية.

إعرف حظك اليوم برج القوس بالتفصيل السبت 3/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

قلبك ف أمان متخافش.. اللي بيحبك بس غتت حبة ومش عاوز يقولك انه بيحبك مش اكتر.. جايز بيلاعبك وجايز عاوز يقولك انه حبه هيبان ف التصرفات مش ف الكلام زي مانتا بتعمل.. جايز.. مين يعرف

برج القوس عملياً 

( الشغل والمذاكرة والتخطيط لبكرة ):

هتحاول تساعد حد يخرج من مشكلة ما عويصة وصعبة.. بس غالبا هتزهق ف النص وهتكتفي بشرف المحاولة وهتخلع ف الاخر.. قشطة عليك متحسش بالذنب ولا حاجة انتا عملت اللي عليك يابرنس.. المرة الجاية بس متفتحش صدرك بشكل تطوعي كدة عشان متغرقش حد بدون داعي..

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة تبتدي تجهز رياضيا وجسمانيا لفورمة الساحل من النهاردة

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والمائية والترابية والهوائية.

إعرف حظك اليوم برج الجدي بالتفصيل السبت 3/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حافظ على نفسيتك النهاردة ومترميهاش ف عب الحياة وتجري.. هترجع تزعل وتندم لو عملت كدة فعلا.. فرفش وتفاءل وثق ف قلبك حبة وبلاش تحدف طوب وانتا بتكلم حد بتحبه الليلة.. قلة الكلام أحسن لو ملكش مزاج تتكلم مع حد..

برج الجدي عملياً 

( الشغل والمذاكرة والتخطيط لبكرة ):

تحت أي بند متستحماش بمية ساقعة النهاردة خالص.. بلاش وإفتكر اني قولتلك بلاش

برج الجدي صحياً 

( نفسيا وجسمانيا وكل مايخص طاسة المزاج ):

صحتك تمام وزي الفل بس ياريت لو تتفسح حبة وتروش على روحك بأي حاجة حلوة على ذوقك.. الفلوس اتخلقت عشان الحاجات دي اساسا..

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والهوائية والنارية والبرمائية

إعرف حظك اليوم برج الدلو بالتفصيل السبت 3/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

هتولع ف ذكرياتك النهاردة وهتستفها وترصها وتنظمها صح عشان تعرف تفوق للي جاي براحتك.. ع البركة يامعلم.. المهم تبقى مبسوط مش أكتر..

برج الدلو عملياً 

( الشغل والمذاكرة والتخطيط لبكرة ):

الأزرق التركواز النهاردة لون تقدر تتفائل بيه ف كل حاجة بتحبها.. إمشي وراه وإنتا متطمن..

برج الدلو صحياً 

( نفسيا وجسمانيا وكل مايخص طاسة المزاج ):

صحتك تمام النهاردة وممكن تبقى احسن لو اهتميك بصحتك احسن من كدة حبة.. مهم تنام كويس.. مهم والله لنفسيتك ولمناعتك ولبشرتك..

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والمائية والبرمائية..

إعرف حظك اليوم برج الحوت بالتفصيل السبت 3/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

عاطفيا انتا مستني حد يقدرك ويقدر قدرتك على العطاء والحب بجد وبدون حساب بس للأسف لما بتيجي تتكلم بتبوظ الدنيا وبتفشكل كل حاجة.. فكر ف كلامك الأول كويس وخليه طالع من قلبك مش من عقلك خالص

برج الحوت عملياً 

( الشغل والمذاكرة والتخطيط لبكرة ):

متثقش ف نفسك بزيادة عشان متلاقيش ف اخر النور نفق ضلمة وانتا مبتحبش الضلمة وبتخاف منها جدا..

برج الحوت صحياً 

( نفسيا وجسمانيا وكل مايخص طاسة المزاج ):

صحيا النهاردة انتا كويس وزي الفل ومنتعش بس محتاج تتحب ومحتاج حد يفهمك من غير ماتتكلم..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والنارية والهوائية والترابية.