إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

الحياة ممكن تديك بعد كل بوسة قلم..بس نادرا ما هتديك بعد كل قلم بوسة للأسف.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الخميس 1/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

بدل ما تتقمص وتزعل من نفسك ف الخباثة ومن الدنيا كلها ف العلن طب ماتتعرف على نفسك بجد فعلا وتعرف ايه يريحها وايه مطالبها ف الحياة وتسعى لتحقيقها من غير ما تزعل منك حد وأهو ساعتها يبقى اسمك عملت حاجة ف مشاكلك بدل مانتا قاعد حاطط ايدك على خدك كدة.

برج الحمل عملياً

( الشغل والمذاكرة والتخطيط لبكرة ):

بطل قمصة وقوم افرح وزقطط وصالح نفسك وصالح العالم وإتصرف صح من هنا ورايح.. مش عيب تغلط.. كلنا بنغلط ياكتكوت

برج الحمل صحياً

( نفسيا وجسمانيا وكل مايخص طاسة المزاج ):

كتكوت الابراج النهاردة.. مبروك عليك.. تقدر تحتفل براحتك الليلة..

إعرف توافق برج الحمل مع باقي الأبراج النهاردة:

متوافق مع الإصرار علي إنكار أي حاجة وكل حاجة النهاردة زي إمبارح وأول إمبارح وكل يوم تقريبا..بس مسيرك هتواجه..

إعرف حظك اليوم برج الثور بالتفصيل الخميس 1/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

النهاردة إنتا محتاج ف حياتك بطاطس كتير ومعاملة وإهتمام ودلع أكتر وأكتر.. بس مكسوف تقول.. مكسوف ليه ومن إيه بالظبط؟.

برج الثور عملياً

( الشغل والمذاكرة والتخطيط لبكرة ): 

قدامك فرصة سفر بس انتا مكسل غالبا.. واضح انه سفر نفسي داخلي جوة ذاتك وأحلامك عشان كدة انتا مش مهتم..

برج الثور صحياً 

( نفسيا وجسمانيا وكل مايخص طاسة المزاج ):

صحتك تمام بس حاول تاكل كويس عشان هفتان وشكلك محتاج تتغذى كويس الفترة اللي جاية دي

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والترابية والمائية..

إعرف حظك اليوم برج الجوزاء بالتفصيل الخميس 1/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مواجهة مابينك وبين حد بتحبه النهاردة غالبا أو إعجاب متبادل أو حب من طرف واحد أو طرف تالت.. حاجة من دول هتحصل الليلة.. خد بالك ومتبصش لحد ف عينيه خالص.

برج الجوزاء عملياً 

( الشغل والمذاكرة والتخطيط لبكرة ):

إجمد النهاردة كدة وركز عشان مهم تتألق وتبان ف أفضل حال.. تتشيك وتحط برفان قبل ماتنزل وتقرر تنجح من جواك وميهزكش حاجة ولا حد.. هتنجح وهتنبسط متقلقش.

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة انتا تمام بس محتاج تنام وحاسس انك اتخنقت من الزحمة وعاوز تهرب من كل الناس ف حتة بعيدة جدا وتقعد لوحدك..

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والهوائي والترابية

إعرف حظك اليوم برج السرطان بالتفصيل الخميس 1/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول مترزعش ف الأبواب والشبابيك والادراج والضلف بتاعة نملية المطبخ لمجرد انك متوتر ومش لاقي حاجة تفش فيها غلك ياكابتن.. ثم لو حاجة فيهم اتكسرت هتزعل وهتتأثر أوي.

برج السرطان عملياً 

( الشغل والمذاكرة والتخطيط لبكرة ):

مفقوع من ايه بالظبط؟.. حياتك واختياراتك وصوتك من دماغك ومبيعجبكش العجب اساسا واحنا ساكتين وعمالين نقول مسيره يعقل.. مسيره يهدى.. بس واضح مفيش فايدة..

برج السرطان صحياً 

(نفسيا وجسمانيا وكل مايخص طاسة المزاج ):

صحتك كويسة النهاردة وغالبا دة اللي مخليك حاسس انك عاوز ترازي العالم كله طول الوقت

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والكتكوتية والبرمائية والمائية والترابية..

إعرف حظك اليوم برج الأسد بالتفصيل الخميس 1/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مترقدش لحد النهاردة من جواك.. بلاش شر وافتكر اني قولتلك بلاش.

برج الأسد عملياً 

( الشغل والمذاكرة والتخطيط لبكرة ):

حاول متلعبش ف دماغ حد النهاردة لمجرد انه في فرصة تعمل كدة.. بلاش شر العالم مش ناقص اشرار والله..

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة واخدة برد غالبا بس الميكروب كامن ولسة ما أعلنش عن وجوده.. ياللا مبروك عليك الميكروب..

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والهوائية والمائية والترابية..

إعرف حظك اليوم برج العذراء بالتفصيل الخميس 1/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتراقب العالم في صمت ليه.. وإزاي مش واخد بالك انه هو كمان بيراقبك وساكت ليه.. ثم هتفضلوا مكسوفين من بعض كدة لحد إمتى بالظبط طيب؟.

برج العذراء عملياً 

( الشغل والمذاكرة والتخطيط لبكرة ):

ابعد عن الاماكن الضلمة النهاردة خالص ياريت.. خليك ف النور وبس ف كل حاجة.. ف كل حاجة..

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة تمام وتقدر تعمل اي حاجة نفسك فيها..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والترابية والمائية..

إعرف حظك اليوم برج الميزان بالتفصيل الخميس 1/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

هتضطر النهاردة تسمع نصايح من حد اكبر منك ف السن غالبا ومنفصل عن الواقع المحيط بكل تأكيد.. إسمع وهز راسك وإبتسم ومتعلقش خالص.

برج الميزان عملياً 

( الشغل والمذاكرة والتخطيط لبكرة ):

محتاج تسمع مزيكا وأغاني هادية النهاردة بالنهار وتتنطط على السرير وتسمع ميتال بالليل.. حاول بس متخشش ف اي حرب مخدات بينك وبين اي حد لأي سببا كان

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها بس ممكن تحس بحبة كحة.. سلك زورك بجنزبيل وعسل ولمون وبلاش ادوية من اللي بتوصفها لنفسك عمال على بطال.. انتا مش دكتور يابيه ولا ينفع تبقى طبيب نفسك

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والسمكمكية والنيلية والفضية والترابية والنارية والبرمائية..

إعرف حظك اليوم برج العقرب بالتفصيل الخميس 1/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إجتماع على مستوى القاعدة الليلة مابين عقلك وبين قلبك.. سيبهم هما الاتنين يصفوا خلافاتهم سوا براحتهم وإخرج إنتا وإتفسح ياشيخ بلاش كلام فاضي.

برج العقرب عملياً 

( الشغل والمذاكرة والتخطيط لبكرة ):

قدامك حاجات حلوة كتير وناس حلوة كتير بس اتنتا منشن على شخص واحد بس ليه؟..

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها بس ياريت تاخد احتياطاتك كويس ضد البرد عشان الجو ممكن يقلب فجأة وبدون اي تحذيرات مسبقة

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والبرطمانية والنارية والترابية والهوائية.

إعرف حظك اليوم برج القوس بالتفصيل الخميس 1/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

هتقول كلام حكيم اوي النهاردة ماشاء الله وهيعجب كل الناس بما فيهم انتا ماشاء الله ولا حول ولا قوة الا بالله..

برج القوس عملياً 

( الشغل والمذاكرة والتخطيط لبكرة ):

حاول متقعش ف غرام صوتك وانتا بتتكلم ف التليفون النهاردة او وانتا بتنظر نظريات جديدة ف الحياة.. الكوكب من ناقص إيجو.. أكتر من كدة هيفرقع بينا والله

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة هتيجي على العصاير والسندوتشات مش الطبيخ خالص..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والمائية والهوائية.

إعرف حظك اليوم برج الجدي بالتفصيل الخميس 1/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

الذكي المفروض بالمنطق البسيط يستخدم ذكائه.. مش يتطمن انه ذكي ويروح يعمل تصرفات مش ذكية.. كدة ايه فايدة الذكاء ف حياتك بالظبط؟.. بتطمن بيه نفسك وبس مثلا ولا ايه؟.

برج الجدي عملياً 

( الشغل والمذاكرة والتخطيط لبكرة ):

شغل خلايا مخك حبة ف الخير لمصلحة نفسك ومتعاندش لما تسمع نصايح من ناس انتا عارف كويس انهم بيحبوك عشان هتزعل اكتر مانتا زعلان والله

برج الجدي صحياً 

( نفسيا وجسمانيا وكل مايخص طاسة المزاج ):

صحتك تمام وزي الفل.. استغلها النهاردة ف الخير علي قد ماتقدر

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والهوائية والبرمائية

إعرف حظك اليوم برج الدلو بالتفصيل الخميس 1/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

عينيك حلوة ومؤثرة النهاردة جدا ماشاء الله.. مهم تتصور النهاردة وتحط صورتك على الفيسبوك وتكيد بيها الأعادي..

برج الدلو عملياً 

( الشغل والمذاكرة والتخطيط لبكرة ):

على وضعك النهاردة زي مانتا يامعلم.. علي وضعك يابرنس..

برج الدلو صحياً 

( نفسيا وجسمانيا وكل مايخص طاسة المزاج ):

صحتك تمام النهاردة وماشي حالها.. حالو تهتم بأي وجع تحس بيه ف جسمك ومتهملش.. كمان ياريت تعمل ماسك خيار وزبادي لبشرتك وحاول متاكلش الخيار والزبادي من على وشك زي كل مرة.

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والمائية.

إعرف حظك اليوم برج الحوت بالتفصيل الخميس 1/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج تعمل مراكب ورق وتعومها ف سلطانية مية بسكر النهاردة عشان تفك كل العكوسات اللي معمولالك من نفسك عليك

برج الحوت عملياً 

( الشغل والمذاكرة والتخطيط لبكرة ):

كل حاجة هتمشي زي الفل لو صفيت نيتك الليلة وعبرت عن إحترامك وحبك لكل واحد يستاهل الاحترام والحب دة.. حاول متكونش انتقائي.. حاول يعني الموضوع مش إجبارى

برج الحوت صحياً 

( نفسيا وجسمانيا وكل مايخص طاسة المزاج ):

صحيا النهاردة انتا محتاج تلعب حبة ضغط ولو ف السرير من غير ماتقوم وحاول متتمشاش علي البلاط حافي عشان كعوب رجليك متسودش وتتبقي سودة زي الكحل

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والنارية والمائية والترابية.