وأضاف شوبير، "مؤمن فتحلى قلبه وقالى الحدوتة كلها، قالى أنا بعاتب على مسئولى الأهلى، قولتله أيه طلباتك قالى عايز عقدى بس عشان أحس إن مراتى وابنى فى أمان لو حصل حاجة، قولتله الأهلى مش هايسيبك التأخير من الوزارة فى الموافقة على صرف العقد، وفعلا كلمت مسئولى الأهلى قالولى إحنا فى انتظار رد الوزارة وهنصرف أكتر من العقد كمان. "

وتابع شوبير، "مؤمن مش عايز حاجة إلا الدعم النفسى، عايز يحس أن الناس فاكراه وأن زمايله محدش منهم نسيه، انا عارف أن الخطيب مش بيتأخر فى المواقف دى، بس انا بقول للخطيب ولوزير الرياضة روحوا زورا مؤمن فى بيته، حسسوه أنه مهم وأنكوا جنبه فى الظروف الصعبة دى، النفسية أهم حاجة لمواجهة المرض".

وأضاف شوبير، "سيد عبد الحفيظ روح زور مؤمن فى البيت وخده فى إيدك يحضر التمرين ولو مكنش قادر خلى اللاعيبة كل أسبوع واحد يروحلوا البيت، لأن الولد متأثر أوى، أعضاء مجلس الاهلى ونجوم الاهلى لازم بينهم وبين بعض يجمعوا فلوس ويبعتوها لمؤمن، الطب بيتقدم فى العالم وبأمر الله يكون لمرضه علاج ويرجع أحسن من الأول".

وأكمل شوبير، "الأهلى لازم يبعت الفلوس لمؤمن فى 24 ساعة وينهى الاجراءات بعدها فى أسبوع مش مشكلة، حالة مؤمن المعنوية أهم ولازم يخرج وينزل مع صحابه وزمايله، هانى أبو ريدة أطلق مبادرة حلوة حتى لو متأخرة،

وأشار شوبير إلى أن "قمة الأهلى والزمالك خرجت بروح رياضية عشان فيديو مؤمن زكريا، والوزير لما كلمته قالى كنت شغال فى اجراءات الموافقة على صرف الاهلى لعقده وجت لقطة الفيديو فى نفس الوقت وهنساهم فى علاجه مع الاهلى ".

وأكمل شوبير، "قلبى موجوع عشان مؤمن زكريا هو أصغر من ولادى وعايز الناس كلها تدعمه، وبقول للصحفيين كملوا دعم بلاش يبقى أسبوع وننسى، أنا عضو فى جمعية اللاعبين القدامى والجمعية دى قائمة على تبرعات أهل الخير معندهاش أى ميزانية وبتعمل حاجات حلوة، فى المقابل جمعية اللاعبين المحترفين التى يترأسها لاعب دولى ليها ميزانية بالدولارات من الخارج متقبل أن تتوزع أموالها على الاندية ولكن لماذا لايتم النظر لحالة مؤمن زكريا ؟".

ووجهت جماهير الكرة المصرية رسائل الحب والدعم إلى اللاعب مؤمن زكريا، الذى ظهر يعانى من المرض، حيث تصدر اسمه هاشتاج باسم "مؤمن زكريا" قائمة الأكثر تداولا بموقع تويتر.

من جانب آخر، ووافق الدكتور أشرف صبحي، وزير الشباب والرياضة، على بدء الإجراءات المتضمنة بطلب النادى الأهلى والخاصة بسداد قيمة التعاقد الخاص باللاعب مؤمن زكريا، فى ضوء كافة القوانين واللوائح المنظمة لذلك، كما وجه وزير الرياضة المعنيين بالوزارة بالمساهمة المالية للوزارة فى علاج اللاعب.

وأكد صبحى حرص الوزارة على تقديم الدعم والرعاية لجميع أعضاء منظومة الرياضة المصرية، وفى مقدمتها اللاعبون، خاصة فيما يتعلق بمتطلبات العلاج والرعاية الصحية لجميع للاعبين.

يذكر أن الوزارة وافقت من قبل على المساهمة فى علاج اللاعب مؤمن زكريا، وفور تلقى طلب النادى الأهلى خلال الأيام الماضية بالموافقة على قيام النادى الأهلى بسداد قيمة العقد الخاص باللاعب قام الوزير على الفور بدراسة طلب النادى والموافقة على اتخاذ كافة. الإجراءات الخاصة بعلاج اللاعب واستقرار أوضاعه الصحية.