كشف الإعلامي باسم يوسف، مواقف لوالديه مع نظام الرئيس الأسبق، محمد حسني مبارك، عبر تدونيه، له على موقع التواصل الاجتماعي الـ"فيس بوك"، مساء اليوم الثلاثاء، قائلًا: "في العام 2000، والدي كان رئيس محكمة القضاء الإداري في مجلس الدولة، وساعتها كانت انتخابات مجلس الشعب، وسنتها والدي أصدر 28 حكمًا ببطلان ترشيح نواب تبع الحكومة والحزب الوطني".

وتابع، "من دول كان وزير الإنتاج الحربي، سيد مشعل، ساعتها الراجل ماصدقش إزاي قاضي يقف في طريق ترشيحه لكرسي مضمون، بعت لوالدي ناس ورسايل، بالحنية مرة والتهديد مرات، والرئاسة اتوسطت، وأبويا كان بيرد إنه يصدر فتاوى قضائية تعزز الحكم، وتغير وجه الانتخابات للأبد".

وأضاف باسم، "الحكومة مالقتش حل إلا أنها تعمل حركة نص كم، حيفتكرها اللي واعي لانتخابات 2000، ألا وهي أنها تعمل استشكال لتنفيذ الحكم قدام محكمة عابدين، عشان أقرب الموضوع، ده زي ما يكون كده فيه حكم قدام محكمة جنائية، وتروح أنت تستشكل قدام محكمة الأسرة، طبعًا ده كان استهبال، بس للأسف نفع، حتى كان فيه كاريكاتير رسمه مصطفى حسين أيامها بيوضح إزاي الحكومة تاخد الحكم من مجلس الدولة، وتروح من الباب الخلفي لمحكمة عابدين".

وأشار إلى أنه "في العام 2001 والده طلع معاش ومعاه في نفس السنة طلع معاش برضة القاضي بتاع عابدين، أبويا اتغضب عليه طبعًا في حين إن التاني مسك محافظ".

أما عن والدته، فقال باسم، "بعديها بسنتين أمي خاضت معركة استمرت لحد طلوعها على المعاش مع رئاسة الوزراء، برئاسة عاطف عبيد، لأن زوجته مسكت القسم بتاعها في أكاديمية السادات، وأمي وقفت لقرارتها غير القانونية، ورئاسة الوزراء عملت على اضطهادها، وحرمتها من الترقية لدرجة أستاذ في آخر أيام شغلها قبل المعاش".

وأضاف الإعلامي باسم يوسف، "أمي كسبت ثلاث قضايا ضد زوجة رئيس الوزراء، ولم يتم تنفيذهم طبعًا، المهم نفس الأب والأم، دول اللي قاموا بفعل ثوري قبل ما نعرف يعني إيه معنى الكلمة دي، زي ما أيدوا التغيير بعد 2011، اتغيروا واتحولت انتماءاتهم زي أهالي ناس كتير مننا بسبب كبر السن، أو الخوف علينا أو التأثر بالإعلام".

وتابع، "والدي على مدى كل حلقاتي في المسرح مافوتش حلقة واحدة، كان مكانه المفضل الصف التاني على يميني، وبالرغم من اختلافاتنا، وخصوصًا بعد 30 يونيو، كان بييجي ويتفرج ويضحك، وكنت أنا كتير أرمي الإفيه وأبصله وأشوفه مبسوط، كتير كنت باختلس النظر له في التصوير عشان أشوف رد فعله، وكان دايمًا مبسوط، اللي يلاحظ في الحلقات كنت بابص على يميني كتير".