يحتفل العالم غدا، 14 فبراير 2015 بعيد الحب، وتختلف طرق الاحتفال به من دولة إلى أخرى، بل من منطقة إلى أخرى داخل الدولة الواحدة.

وفي مصر توجهت كاميرا "دوت مصر" إلى الصعيد لسؤال الأهالي عن عيد الحب، وكيف يحتفلون به، سألنا بعض الصعايدة، الذين يقطنون محافظة أسيوط، فجاءت إجاباتهم، بعفوية شديدة.

- بحب مراتي وأجيب لها كل اللي بتحبه

يقول عم مختار، أحد أهالي أسيوط: "أنا بحب مراتي قوي، وربنا يخليها لي، وهجيب لها نايتي وجلابية وقميص، وكل الحاجات الحلوة اللي بتحبها، وربنا يخلينا مع بعض على طول".

- عيد الحب والفطير والهدية بقرة

وتقول إلهام، ربة منزل: "أنا بعمل لجوزي حبيبي، حامد، الفطير الأبيض، اللي بيحبه في الفرن البلدي، وبقول له كل سنة وإنت طيب يا حبيبي، بمناسبة عيد الحب".

وتؤكد إلهام أنها لا تعرف أي شيء عن الهدية المرتقبة من زوجها حامد، ولكن تتمنى منه هدية بعينها وتقول: "عايزاه يجيب لي بقرة نسترزق منها أنا وعيالي".

- عيد الفقر والمركوب

وبسؤال عم أحمد أبوسديرة، عن عيد الحب، رد بعفوية وتلقائية: "بلا حب بلا بتاع، ده عيد الفقر، وأنا هجيب لها مركوب، أجيب من فين يعني؟".

ومواطن آخر عند سؤاله عن عيد الحب قال: "أنا مراتي ماتت، وأنا ما صدقت، بلا حب بلا طين".

- عيد الحب واللحمة والفراخ والبسبوسة

ووجه أحد الصعايدة رسالة لزوجته قائلا: "كل سنة وإنتي طيبة يا مراتي، وربنا يخليكي ليه، إنتي والعيال، وإن شاء الله هنجيب فرخة، ونتعشى بيها كلنا، وهتكون ليلة هنية".

ويقول عثمان تمام: "أنا بحب مراتي، وعارفين كل حاجة عن الفلانتين داي، وهجيب لها كيلو لحمة، عشان أنا وهي بنحب اللحمة قوي قوي".

ومحمد المتر يقول لزوجته: "كل سنة وإنتي بخير، وهيجيب لها بسبوسة، عشان بتحبها قوي".