فيه مشهد من فيلم "الشيماء"

بـ يظهر فيه الحوار ده بين اتنين كفار:

من قتل نساءكم؟
خزاعة

من سرق أموالكم؟
خزاعة

من فشخ أطفالكم؟
خزاعة

بغض النظر عن إن الفيلم ده تحديدا حاجة فنية مالهاش علاقة قوي بـ التاريخ، بس خزاعة دي حاجة مهمة في التاريخ الإسلامي ولعبت أدوار مهمة في مراحل تاريخية مهمة، خصوصا وقت النشأة.

طب مين خزاعة؟
خزاعة دي قبيلة، جت مكة قبل الإسلام بـ مئات السنين، استوطنوا جنب الكعبة. لما نقرا أصل قبيلة خزاعة عند المؤرخين، هنلاقيها من قحطان، لما نقرا تاريخها عند المحدثين (علماء الحديث) هنلاقيها من عدنان، طب وهي تفرق؟

الحقيقة تفرق شوية، لأن النسب العربي للنبي إسماعيل، بحسب النسابين، جي من ناحية عدنان، يعني المفروض إن عدنان هو جد قريش، وعدنان هو حفيد إسماعيل. والعرب بـ يعرفوا تاريخهم لـ حد عدنان أو قحطان، وبعدين يقفوا، لأن اللي بعد كده مش واضح.

عدنان زي ما إحنا عارفين هو جد النبي، واللي بيسمعوا مننا السيرة، أكيد سمعوا تعبير النبي العدنان، أو سيد وليد عدنان. يعني، خزاعة دي قبيلة مؤسسة لحاجات كتير، وكان ليها أدوار محورية في التاريخ، ومهم بالنسبة لناس كتير إنها تبقى من ولاد عدنان، ومهم كمان إن تاريخ الكعبة يبقى عدناني. بس مش قضية.

المهم، لما خزاعة وصلت مكة، كانت الكعبة تحت سيطرة قبيلة جرهم، اللي العرب مؤمنين إن النبي إسماعيل اتجوز منهم وبدأت السلالة العربية. خزاعة طردت جرهم من البيت، بعد قتال وسيطرت هي على البيت الحرام.

خزاعة فضلت تحكم البيت، وتحكم كعبة مكة ييجي بتاع 300 – 500 سنة كده، مكنش فيه تاريخ دقيق زي ما إحنا عارفين، وكان عمرو بن لحي الخزاعي أول واحد نصب أصنام في الكعبة، بحسب الروايات والأخبار اللي بـ تقول كده، وبـ تقول كمان إن عمرو ده هو اللي جاب "هُبل"، جابه منين؟

جابه من الشام.

خد الشام دي واحفظها، وخد بالك كل ما يتكرر اسم الشام في الأحداث.

عمرو ده محطة تاريخية فاصلة، هو مش بس جاب هُبل، لكنه كان أول واحد يخلي مكة سنتر تجاري، ودي كانت البداية لكل شيء.
مركز التجارة العالمي وقتها كان اليمن، كل حاجة رايحة من أي حتة لأي حتة كانت بـ تعدي عليها، وده يمكن اللي خلاها مطمع للجميع، فرس .. روم .. حبش، وده اللي خلى دخول الصحراء بالتجارة أمر ضروري.

(ياريت يكون معاك خريطة وإنت معانا) 
عمرو بدع فكرة إن كل واحد يجيب "إلهه" ولا تمثاله، ويعمل له صنم في الكعبة، والناس تيجي تحج لآلهتها، وهو كمان اللي عمل فكرة ضيافة الحجيج، وإن ضيافة الحجاج تبقى هي علامة الحكم والسيطرة على البيت.

عمرو خلف ولد سماه كعب، وكعب هو مؤسس اللغة، اللي هتبقى لغة قريش، اللي هينزل بيها القرآن، ومؤسس مش يعني اخترعها، لكن هو اللي خلاها "اللغة الرسمية" واللي جم بعده اتكلموا بيها.

فضلت خزاعة تحكم مكة حكم وراثي، جيل بعد جيل، وحصلت غارات كتيرة عليهم لطردهم زي هم ما عملوا ما جرهم، لكن كل الغارات دي كانت بتفشل، بس لأن كل شيء له نهاية، وله بداية، كان ضروري بعد قرون من الصمود إن خزاعة ييجي عليها الدور، وتقع وييجي غيرها يتولى الموضوع، وسبحان من له الدوام.

مين اللي عمل فيها كده؟
مين اللي شرد أبناء خزاعة؟
دي اللي هنشوفها الحلقة الجاية
الحلقة الرابعة من ليالي قريش. 

استنونا