كتب- محمد حسين الشيخ:

في مثل هذا اليوم 27 ديسمبر من عام 1921 ولد الطبيب المفكر والأديب الدكتور مصطفى محمود. وهو الرجل الذي خاض رحلة بحث وتنقيب عن سر الحياة ووجود الله، حتى وصل إلى الإيمان بعد 30 عاما كما كان يقول. هذه الرحلة التي حولته من طبيب أمراض صدرية إلى مفكر وأديب، قرر أن يعطي عصارتها بشكل مبسط إلى الجمهور، فقدم برنامج "العلم والإيمان" في التلفزيون المصري لمدة 18 عاما.



في فترة من حياة مصطفى محمود، مارس طقوس تصوف الهندوس، الداعية إلى وحدة الوجود، حيث "الخالق هو المخلوق والرب هو الكون، وهو الطاقة الكامنة في جميع المخلوقات"، ومن هذا المنطلق التوحدي، قررت أن أتوحد مع الدكتور مصطفى محمود، لأجعله ينطق على لساني هذه الحلقة التاريخية !



أهلا بيكم، الحقيقة أنتو وحشتوني لأني سبت دنياكم من 5 سنين تقريبا، فحبيت أقدملكوا الحلقة دي من " العلم والإيمان"، بمناسبة عيد ميلادي.
من أهم أحداث النهارده " 27 ديسمبر" هو تأسيس جريدة الأهرام – انتو عارفين كنت باكتب فيها- ودا كان سنة 1875، وسبحان الله اتأسست يوم ميلادي على شان اكتب فيها..ها هّـــا هه..حاجة لازم نقف قدامها ونتأمل !.. ومن العجايب إن الجريدة أول ما طلعت كانت 4 صفحات بس وكانت بتصدر من الإسكندرية لما أسسها بشارة وسليم تقلا اللبنانيين، سبحان الله أصبحت بعد كدا أكبر جريدة في مصر، وهي أعرق جريدة كمان موجودة النهارده.

دايما الناس بتعادي الفكر الجديد، لأنها تخاف ما تجهله، أنا مثلا لما تكلمت عن شفاعة الرسول وإن مافيش حد هيدخل الجنة بالشكل اللي فيه واسطة دا، كان فاضل شوية ويكفروني أو تقدروا تقولوا إنهم كفروني فعلا، نفس الكلام دا حصل مع شيخ الأزهر، مصطفى عبدالرازق، اللي اتولى منصبه زي النهارده سنة 1945، لما أصدر مجلة " السفور" – سفور كلمة لما الناس بتسمعها بييجي في بالها على طول خلع المرأة للحجاب- الناس بقه هاجت وقالتلك دا فيه مسيحيين ومبشرين ورا المجلة دي، وإن مصطفى عبدالرازق دا رجل ها هّـــا ها ضال يعني... وكل الحكاية إن فيه فكر مستنير ينظر للإسلام بشكل عصري كان وراء المجلة.

عاوز أقول إن سنة 1945 كانت مهمة جدا في تاريخ العالم الحديث، لأن السنة دي انتهت فيها الحرب العالمية التانية، والناس اللي انتصرت فيها " أمريكا، الاتحاد السوفيتي، بريطانيا، فرنسا" شكلوا نظام عالمي جديد... قالك نعمل حاجة اسمها الأمم المتحدة تدير أمور العالم، ونعمل تبعها بقه هيئات متخصصة في الاقتصاد والصحة والثقافة وخلافه... زي النهارده بقه 27 ديسمبر، أسست الأمم المتحدة البنك الدولي وصندوق النقد الدولي، ودول ليهم حكايات بقه مع مصر، أشهرها لما رفضوا يمولوا مشروع السد العالي، لكن عبدالناصر ماغلبش.



عبدالناصر راح وقع اتفاقية مع الاتحاد السوفيتي زي النهارده برده سنة 1958 على شان بناء السد.. طبعا انتوا عارفين هما قالوا إن السد العالي " من أموالنا بعيد عمالنا" ولكن السوفييت كانوا شايلين الشيلة، أكيد حد من حضراتكم هيقول إني باتجنى على عبدالناصر لأنه ساب القضاء يحاكمني ويصادر كتابي " الله والإنسان" اللي الأزهر كان هيكفرني بسببه، لكن صدقوني أنا باقول الحقيقة.



نرجع بقه لسنة 45 تاني، انتوا عارفين إن العالم بقه قطبين بعد الحرب العالمية التانية، واحد أمريكي والتاني سوفييتي، وكانت اليابان بتحتل كوريا، ولما الحلفاء انتصروا عليها في الحرب العالمية الثانية، طردوها من كوريا، وبعد كدا اتفق السوفييت والأمريكان على تقسيم كوريا لجزئين، واحد شمالي شيوعي تابع للسوفييت، والتاني جنوبي ليبرالي تابع لأمريكا. اتفاقية التقسيم دي كانت زي النهارده سنة 1945.



طبعا انتو عارفين موقفي الرافض للشيوعية وللاتحاد السوفيتي، وأنا كنت شايف إنه كيان لازم ينهار، وبالفعل اتحل الاتحاد السوفيتي، لكن روسيا كانت الوريث الشرعي ليه، وزي النهارده 27 ديسمبر سنة 1991 حصلت روسيا على المقعد الدائم في الأمم المتحدة، واللي بيمنحها حق الفيتو أو النقض أو الاعتراض على قرارات المنظمة الدولية... طبعا هي خدت المقعد كوريث للاتحاد السوفيتي، اللي كان بيملكه.



قبل ما أختم عاوز أقولكوا حاجة مؤثرة جدا، ودي كانت قبل ما أموت بشهور بسيطة، تحديدا زي النهارده من سنة 2008، إسرائيل بدأت عملية عسكرية على قطاع غزة سمتها " الرصاص المصبوب"، طبعا الذريعة كانت حركة حماس، ولكن اللي يعنيني إن العملية دي نتج عنها 1315 قتيل و5340 جريح، وبالتأكيد أغلب الضحايا دول مش من حماس، ناهيك عن الدمار اللي حصل، هتشوفوا في الفيديو اللي هعرضوا لحضراتكم دا حاجات فظيعة !



مش قولتلكم.. حاجة صعبة.. عموما تصبحوا على خير، ولا صباح الخير، حسب ما هتقروني بقه ولا تتفرجوا عليا ها هّـــا ها.