فى الكثير من الأوقات يفضل أن يبقى الرجال مقدار مرتبهم ودخلهم غير معروفا لخطيبته أولزوجته، ولكن هناك الكثير من الرجال الذين يفضلون مصارحة شريكة حياتهم بكل شئ عنهم منذ البداية، وفى أوقات أخرى تبادر الزوجة بالسؤال عن مقدار المرتب، وهذا الأمر قد يسبب القلق لكثير من السيدات اللاتى يقعن فى حيرة هل يحق لهن السؤال عن مرتب الزوج فى مرحلة الخطوبة أو بمجرد أن يتم الزواج، وهو ما دفعنا لسؤال عدد من الفتيات والسيدات المتزوجات وجاءت إجابتهن كالتالى:

معرفة راتب الزوج

قالت فيفيان :"من وإحنا مرتبطين وكنا بنناقش كل حاجة خاصة بعملنا، وقالى مرتبه من نفسه، ولو فى أى خطوة خاصة بالعمل كان لازم يأخذ رأيى فيه، وبعد الزواج بقى يقبض ويدينى الفلوس كلها".

وأكدت فيبى معرفتها مرتب زوجها قائلة :"قبل الزواج اتفقنا نحوش سوا، فعشان كده عرفت مرتبه وأحنا فى الخطوبة، لاننا كنا حابين نريح أهلنا شوية لأنهم تعبوا من المصاريف جدا".

المشاركة والتخطيط لمصاريف المنزل سويا

وأوضحت ياسمين :"أنا رأيى أن دى حاجة لازم هو يقولها من بدرى، علشان نخطط سوا وبعد الزواج نعرف هنمشى البيت أزاى، ونصرف الفلوس فى أيه وفقا لأولوياتنا، والموضوع ما فيهوش أى حساسية ومن حقنا نعرف المستوى اللى هنعيش فيه، الفكرة مش رقم، لكن دى حاجة بتتبنى عليها حياة فيما بعد".

ومن جانبها قالت فاطمة:"انا مايهمنيش أعرف المرتب كام، عمرى ما سألت ولا هسأل، طالما عايشين كويس ومش محتاجين أى حاجة وكمان بنحوش يبقى هعرف ليه، وهو لو عاوز يقول كان قال من الأول".

معرفة راتب الزوج

وعن أحقية الفتاة فى السؤال عن مرتب زوجها قالت ميريهان :"أنا شايفة أنه من حقى ومن حق أهلى يعرفوا بنتهم هتعيش أزاى بعد الزواج، علشان ولا أنا أضحك عليه ولا هو هو يضحك عليا، ويكون فى وضوح من البداية فى مسألة الماديات، خصوصا مثلا لو أنا بشتغل هل أبقى محتاجة اشارك معاه ولا لأ، هل هقدر أعيش فى المستوى ده ولا لأ، دى حاجات لازم فيها الموضوح، علشان كمان امشى نفسى وحياتى على قد إمكانياته".

مرتب الزوج