حلم مذيع ..هو الحلم الذى يراوده منذ طفولته كأى طفل من صغره له أحلام وطموحات، ولكن كان يحلم دائما أن يكون مذيع مشهور، وعلى الرغم من الكلمات المؤلمة التى كانت تسمعها والدته من المقربين لها عن حالة ابنها واستحالة ان يكون شخص ناجح كونه من اصحاب الهمم لكنها اصرت أن تكمل طريقها وتعلم طفلها الصغير حتى أصبح الأول على الثانوية العامة وأول طالب يلتحق بجامعة بنها نظام الدمج .

عبد الرحمن عرام طالب بالصف الثانى فى كلية تربية نوعية قسم إعلام بجامعة بنها، عانت والدته سنوات طويلة حتى وضعته على الطريق الصحيح ، شارك فى العديد من الحفلات أمام الرئيس عبد الفتاح السيسى وكان سفير التدريب والتشغيل لذوى القدرات الخاصة، ومن أبرز هواياته الشعر وحلم حياته أن يكون مذيع.

"لما تقعدى معاه فى البيت تحسى ان معاكى ملاك على شكل بشر"هو ما قالته والدته عن عبد الرحمن وقالت"اكتشفت مشكلة عبد الرحمن وهو عنده 6 سنين كان كل المدرسين بيشتكوا من عدم تركيزه وعدم تفاعله من الناس بعدها بفتره والده توفى وده أثر عليه نفسيا لانه كان متعلق بيه ، لما عملت له اختبار ذكاء كان عمره العقلى أقل من عمره بخمس سنين أو اكتر".

وأضافت"بدأت ادخل معاه الفصل واعرف أخد ايه واذاكرله، كان المنهج حتى بعد نظام الدمج صعب عليه لكنى كنت بقعد اكررله الكلام كتير لغايه ما الحمد لله نجح وطلع الاول على الثانوية العامة بمحافظة القليوبية نظام الدمج".

وتابعت "كنت بقعد أسأله كتير نفسك تطلع ايه كان يقولى مذيع ونفسى أدخل جوا التلفزيون قلتله عشان تبقى مذيع لازم تذاكر كتير اوى وفعلا كنت معاه فى المذاكرة عشان احقق له حلمه، وعشان اثبت لكل الناس أنه يقدر يكون شخص ناجح ، لأن كل اللى كانو بيشوفو عبد الرحمن قالولى كفاية يقرا ويكتب وخلاص وابقى اعملى له شهادة اعاقة ويشتغل بنظام الـ 5% .

واستطردت حديثها قائلة"بدأنا نوديه كورسات إعلام واذاعة وطلع فى حفلات أمام الرئيس عبد الفتاح السيسى وقال قدامه شعر وعجبه جدا وصفق له، طريقته فى الشعر مميزة ده غير ان عبد الرحمن فى البيت طيب وحنين اوى عاوز يساعدنى وحاسس بيا دايما وكأنه ملاك عايش معانا فى البيت".

وقال عبد الرحمن عرام  لـ اليوم السابع "اخدت شهادات كتير فى الدراسة والشعر، وحلم من أحلامى انى اكون مذيع وشاعر، وفى يوم من الايام هوهب حياتى للوقوف بجانب اصحاب الهمم واتكلم دايما عنهم فى الشعر والاذاعة .

السيسى,مذيع,طالب دمج,قصة نجاح