وجه على عبد الخالق، والد المقاول الهارب محمد على، رسائل شديدة اللهجة لابنه الهارب في أسبانيا، خاصة بعد خروج "المقاول" في فيديو طالب فيه رئيس تركيا رجب طيب أردوغان بحماية زوجته وبناته.

وقال على عبد الخالق في تصريحات خاصة لـ"اليوم السابع"، "دلوقتى محمد منزل فيديو بيطالب فيه أردوغان يحمى ولاده، طيب ما ولادك كانوا موجودين فى أسبانيا ومعاك، وأنت اللى طردتهم واتجوزت على مراتك السورية، وطردت الأولاد وبهدلتهم ورميتهم فى تركيا اللى هى دولة معادية.

وأضاف والد المقاول الهارب، "طب فى أسبانيا إنت قاعد فى أمان وهما جانب منك.. أنت السبب.. انت اللى مرضتهم، وهم هناك كلمونى إنهم متهانين جداً ومتبهدلين جداً، مفيش شقة قاعدين فيها وبيناموا على كنب، ومتهانين مادياً.. طيب ما أنت السبب.. هم عشان ولادك رفضوا السكة الغلط اللى إنت ماشى فيها".

وأكد والد المقاول الهارب في رسالته لابنه، "لا أردوغان وقف جنبهم، ولا الرئيس السيسى هاجمهم، ولا حد مصري هاجمهم، بالعكس دول واقفين جنبهم هناك.. التجارب اللى إنت عايش فيه ده، وتعلق الشماعة على حيطان دايبة.. أمر مرفوض تماماً.. هم قعدوا معاك في أسبانيا، وأنت رفضت إنهم يقعدوا معاك، عشان رافضين السكة اللى انت قاعد فيها.

وقال " يا بابا غلط.. ضربت الأولاد، ومراتك قالت غلط فطلقتها وإتجوزت عليها.. طب ايه المطلوب.. ايه المطلوب.. فوق لنفسك، انت بتتكلم أي هبل وأي هرتلة".

ووجه والد المقاول الهارب سؤال لأبنه وقال له "مين هايحميهم؟.. أردوغان؟؟.. يحميهم من السيسى؟,, الى بيحميهم هناك المصريين اللى واقفين جانبهم.. اللى إنت رميتهم، وهم اللى قعدوهم المصريين.. انت منعت المصاريف، واللى بيصرف عليهم المصريين، مجبتلهمش إقامة، واللى بيقعد معاهم المصريين، فانت السبب في كل ده، وجاى النهاردة تشتكى؟، وتشتكى لمين.. لأردوغان!.. أردوغان هو اللى هايقف جانبهم!.. أردوغان هو اللى هايحميهم؟.. إنت الأب الغلط.. إنت الأب العاق لأهلك وبيتك وأبوك وأخواتك وولادك ولبلدك".

وأضاف "طب إنت لما طلعت وواخد سكة غلط لما رفضوها طردتهم، ولما مراتك إتحايلت يا محمد بلاش مشاكل وكلمتنى وأنا كلمتك، النتيجة عملت إيه، طلق وإرمى في الشارع.. ورحيمة جاية تكلمك إضرب وإرمى في الشارع.. مالهومش مكان يقعدوا فيه في أسبانيا.. إذا كان أبوهم طردهم، مين هايخدهم؟.. المصريين هم اللى خدوهم، اللى إنت بتخاف عليهم من المصريين هم اللى خدوهم، وهم اللى أوهم، وهم اللى بيصرفوا عليهم، وهم قاعدين.. إنت الشماعات بتعتك رخيصة أوى.. يعنى بتطالب أردوغان يحميهم، طب الأئمن في أسبانيا ولا تركيا؟.. يعنى إنت في أسبانيا قاعد ماشاء الله، ولسانك أطول منك في الغلط وفى قلة الأدب، و التجنى على الشعب ورئيس البلد وعلينا وعلى الأهل وعلى الدنيا كلها، ومحدش كلمك، وأنت سهل خالص في أسبانيا تيجى وإشمعنى لما راحوا تركيا،  البلد المعادية، اللى انت أصلاً طردتهم فيها، وبتطالب بحماية من أردوغان.. طب ماكانو معاك في أسبانيا.. مين اللى طردهم من أسبانيا؟.. مين اللى رماهم في الشارع؟.. مين اللى رمى مراته ورمى ولاده وإتجوز عليها؟.. إنت اللى عملت الغلط ده".

وقال " بالنسبة ليا، وبالنسبة لأهلك، وبالنسبة لإخواتك وولاد إخواتك، وعايشين في أمان قمة الأمان، وبقولك أنا بكلمك، وإنت عارف أبوك، وعمرى في حياتى ما هاجى على نفسى.. عايش في قمة الأمان، وبتحرك في البلد براحتى، وبتكلم براحتى، وأى برنامج معايا  مش مجبر إن أنا أقول ايه، أنا بتكلم إاللى أنا عايزه، مفيش إجبار خالص".

" أنت للأسف واخد صورة سيئة لأنك إنت سيئ وتفكيرك سيئ، فكل صورة قدام منك سيئة، لعلمك عشان يبقى عندك خلفية، وبقولهالك وافهمها كويس جداً، الأسلوب اللى إنت ماشى بيه رخيص، ومفضوح، ورخيص جداً لأى حد".