الشلل الدماغى لم يكن بالنسبة له مرض أو إعاقة  تقف أمام أحلامه وطموحاته ولكنها كانت منحة وليست محنة كما يعتقد الكثيرون، منحة جعلته من الطلاب المتفوقين في الثانوية العامة وحصوله على مجموع 93.5% ، جعلته شاعر واجتماعي وحارس مرمى في أرض الملعب..

 

 

"مش كل حالات الشلل الدماغى ليها علاقة بالمخ انا واحد من الحالات ،الحمد لله متفوق دراسيا وبتعامل بشكل طبيعى حتى وانا على كرسى متحرك"، هو ما قاله محمد سيد الذى يبلغ من العمر 18 عام حيث قال ،" يمكن في البداية كان الوضع صعب كونى على كرسى متحرك مكنتش بتعامل مع أي حد ومكنتش بخرج بس مع الوقت اتعرفت على أصدقاء كتير وبمساعدة والدتى وأصحابي قدرت اتعامل بشكل طبيعي وكنت شعبة أدبى و بذاكر 4 ساعات في اليوم بس كنت بركز فيهم والحمد لله جبت 93.5 في الثانوية العامة".

 

وأضاف، "كنت بحاول أوفق بين مذاكرتى وبين الجلسات اللى بروحها ومكنتش بأثر في أي حاجة، عندى مشكلة في عضلات أيدى لأنها ضعيفة بس كنت بحاول أذاكر وأركز واتحدى نفسى والحمد لله كنت أد التحدى وأحسن كمان".

 

وتابع"الكرسى المتحرك عمره ما كان عائق قدامى بالعكس بتعامل بشكل طبيعى ونفسى أطلع معد برامج رياضية واقابل شيكابالا لأنى من عشاق الزمالك، غير كد أنا بحب الشعر وبكتب خواطر دايما".

 

وراء كل رجل عظيم أمرأة عظيمة وكانت المرأة العظيمة في حياة محمد والدته التي بدأت معه المشوار وقررت أن تجعل منه إنسان ناجح ومتفوق ومحبوب بين الجميع ، وقالت والدة محمد" أول ما محمد أتولد قالولى مش هيعيش ده عنده شلل دماغى، قطعت كل التقارير الطبية وقلت ابنى هيعيش وأنا هفضل وراه لغاية ما يبقى حاجة، وبدأت معاه واحدة واحدة بقيت اكلمه وهو مش بينطق ولا بيركز معايا لغاية ما عدى أول سنة وبدأ يتفاعل، ومع مرور الوقت قدمت له في المدارس الخاصة وكلهم رفضوه، والمدير قالى هاتى لنا تقرير طبى يثبت ان حالته دى مؤقته وهيخف، قلتله هاتلى انت تقرير طبى بيقول انك هتعيش للسنة الجاية".

وأضافت"بعد رفض المدراس الخاصة ليه قدمت له في مدرسة حكومي والحمد لله اتقبل وكل سنة كان بيطلع من الأوائل وبياخد شهادات تقدير ، ومكنتش بسيبه في المذاكرة وكانت خالته بردو بتذاكرله دايما، لغاية ما ربنا عوض صبرنا خير وجاب مجموع كبير في الثانوية العامة".

وتابعت"محمد هيبقى في يوم من الأيام حاجة كبيرة أوى وانا واثقة في دة وهو الخير والبركة اللى في بتنا وعوض ربنا ليا، انا فرحان بنجاحه وواثقة انه هيفرحنى دايما