نحاول خلال هذه الأسئلة البسيطة وإجاباتها الأبسط الإجابة على حكاية دعم البنزين من الألف إلى الياء:

هل زيادة الأسعار لازم تحصل كل سنة؟

الزيادة مرتبطة بأسعار البترول العالمية مش بتوقيت معين

زيادة الأسعار المرادي سببه ارتفاع أسعار البترول عالميا

كل دولار زيادة في سعر برميل البترول بيكلف الدولة 4 مليارات جنيه في الموازنة

رغم الزيادة الجديدة هيصل دعم الطاقة بالموازنة الجديدة إلى 105 مليارات جنيه

طب هل الهدف هو إلغاء الدعم ورفع الأسعار؟

رفع أسعار منتجات الطاقة لا يعني أبدا إلغاء الدعم

لأن الدولة ملتزمة بتحمل دعم الطاقة لمساعدة محدودي الدخل

الحكاية كلها هو تعديل منظومة الدعم الحالية اللي أثبتت عدم وصوله لمستحقيه

وعشان كده مقابل زيادة الأسعار فى الطاقة بنلاقي توسع في محطات الكهرباء

ومشروعات كبيرة تضمن استمرار تقديم الخدمة وتوفير مصادر الطاقة

طيب ليه منأجلش رفع الأسعار سنتين تلاتة؟

الأزمة إن ده بالظبط اللي كان بيتعمل طول السنين اللي فاتت

لحد ما وصلنا لمرحلة مبقاش ينفع معاها التأجيل

وبعدين بصراحة كده.. لو إنت مش قادر تتحمل الإصلاح.. عايز أولادك وأحفادك هما اللى يتحملوا كل الفاتورة دى لوحدهم؟ أكيد لأ

وبعدين متنساش إن كل ما بتأجل الحل.. كل ما تنفيذه بيكون أشد وأصعب

طيب بس أنا كده كمواطن هتضرر جدا من زيادة الأسعار دي

تعالى كده نحسبها بالراحة

أولا في 3 شرائح يتم مراعاتهم تماما في زيادة أسعار الكهرباء

والزيادة عادة بتستهدف اللي استهلاكهم كبير مش اللي استهلاكهم على القد

ثانيا بالنسبة للبترول والبنزين فزيادتهم هتأثر على محدودي الدخل بنسبة قليلة

وبالورقة والقلم.. الزيادة هتكلف المواطن بالكتير 2 جنيه للفرد في اليوم

ومن الأخر أي زيادة مبالغ فيها هيكون سببها جشع التجار وده اللي لازم نواجهه

طب وإزاي الدولة هتساعدنى أنا كمواطن بسيط هيتأثر بالزيادة؟

الدولة بالفعل أخذت خطوات كتيرة لدعم محدودي الدخل بالاتجاه الأفضل

زي تقديم علاوة اجتماعية 7% للمخاطبين بقانون الخدمة المدنية

ده غير علاوة استثنائية 7% لمواجهة الغلاء

أما غير المخاطبين بقانون الخدمة المدنية فليهم علاوتين

الأولى دورية بنسبة 10%

والتانية برضه استثنائية لمواجهة الغلاء بنسبة 10%

مش بس كدا

فيه كمان زيادة في دعم السلع التموينية اللي كان 15 ثم 21 ودلوقتي 50 جنيه للفرد و200 جنيه للأسرة المكونة من 4 أفراد

وده كله غير زيادات المعاشات ودعم نظام تكافل وكرامة اللي بيخدم ملايين المواطنين من اللي ملهمش مصدر دخل

طب ليه مرفعناش الدعم من زمان؟ واشمعنى مصر اللي بيحصل فيها كده؟

للأسف لو كنا عملنا كده فعلا من زمان كان المشكلة أتحلت

لكن إحنا بقالنا 15 سنة بنأجل حل المشكلة لحد ما وصلنا للوضع الحالي

لكن كمان مش مصر بس اللي بيحصل فيها زيادات

في دول كتير سبقتنا في الإصلاح وده خلاهم كمان سبقونا في التنمية

لكن إحنا نقدر طول ماحنا واعيين ومدركين إننا نكمل مشوار الإصلاح وننفذ خطة التنمية