العرب كانوا ماشيين بـ الشهور القمرية، اللي هي دلوقتي محرم، صفر، ربيع أول وتاني، جمادى أول وتاني، رجب، شعبان، رمضان، شوال، ذو القعدة، ذو الحجة، ومكنوش مهتمين قوي بـ السنين، مفيش سنة 35، سنة 47، .... إلخ.

الشعوب اللي بره، ونخص بـ الذكر اللي مشاركين في التجارة، كانوا ماشيين بـ الحساب الشمسي، السنين مهمة، والشهور مش ماشية مع القمر، وإنما الشهور اللي نعرفها دلوقتي: يناير، فبراير، مارس، .... ديسمبر.

تخيل معايا إن واحد محرم جه مع واحد يناير، السنة اللي بعدها واحد محرم مش هـ يبقى واحد يناير، هـ يبقى 19 أو 20 ديسمبر، لأن الـ 12 شهر القمري، مش بـ يعملوا سنة كاملة، وإنما أقل بـ 11 يوم تقريبا، وده اللي بـ يخلي الشهور القمرية تلف، ورمضان مثلا كل سنة بـ ييجي بدري 11 يوم.

طيب، السنة اللي بعدها، واحد محرم هـ يبقى تقريبا 8 أو 9 ديسمبر، والسنة اللي بعدها، واحد محرم هـ يبقى أواخر نوفمبر، عارف ده معناه إيه؟

معناه إن موسم التجارة، وموسم الحج، مش هـ يبقى ماشي مع حركة التجارة العالمية، اللي كانت بـ تخلي المتاح لـ مكة، موسمين: موسم طويل في الشتا، لمدة تلات شهور (نوفمبر، ديسمبر، يناير) وموسم قصير في الصيف (يونيه).

طيب، العرب علشان يظبطوا دي مع دي عملوا إيه؟

عملوا حاجة اسمها النسيء.
تعال نرجع للكلام اللي فات.
لو واحد محرم جه مع واحد يناير، والسنة اللي بعدها، محرم جه في التلت الأخير من ديسمبر، واللي بعدها جه في التلت الأول، لـ حد الآن مفيش مشكلة، مازلنا في الشتا، في السنة الرابعة، واحد محرم هـ يبقى أواخر نوفمبر، نروح مأجلينه، يبقى فيه شهر نسيء، ويرجع محرم يبدأ أواخر ديسمبر أو أوائل يناير تاني.

الحركة دي خلت الشهور القمرية تمشي طول الوقت مع الشهور الشمسية تقريبا، وده اللي خلى بعض أسماء الشهور مرتبطة بـ الجو، زي رمضان، اللي جي من الرمضاء (الحر الشديد)، واللي هو بـ يبدأ دايما في أغسطس، وأحيانا أواخر يوليو. وزي ربيع الأول، وربيع تاني، اللي هم أوخر فبراير ومارس وجزء كبير من أبريل.

حركة النسيء دي بدأت أيام قصي، أو قبله بـ كام سنة، لكن هو اللي نظمها، وعين المشرفين عليها، وكان اللي بـ يحسب الحسبة، ويعلن إن السنة دي فيه نسيء ولا لأ، يبقى اسمه القلمس، وفيه تفاصيل كتيرة عن الموضوع، لكن يعني مش مؤثرة في سياقنا ده.

لما نيجي نبص على الموسمين بتوع التجارة، اللي القرآن أشار إليهم "رحلة الشتاء والصيف" هـ نلاقيهم في نوفمبر وديسمبر ويناير شتاء، ويونيه صيفا، اللي هم بـ ييجوا (بسبب النسيء) مع ذو القعدة وذو الحجة ومحرم شتاء، ورجب صيفا. وهـ نلاقي الأشهر الأربعة دول هم بس الأشهر الحرم، اللي قريش نشرت فكرة تحريم وتجريم القتال فيهم.

ناس كتير بـ تستغرب إن رمضان، الشهر المقدس، مش من الأشهر الحرم، بس رمضان بقى مقدس مع انتصار الإسلام، إنما الأشهر الحرم دي عقيدة عربية سابقة ظهور الإسلام بـ حوالي 200 سنة.

كده، قريش، تحت قيادة قصي، قدرت إن يكون عندها جيش الأحابيش، وحيدت القبائل بـ إنها أشركتها في التجارة بـ نسب علشان التأمين، ونشرت عقيدة تجريم القتال أثناء مواسم التجارة، بعد ما نظمت الأمور داخليا بـ الندوة وتنظيم موسم الحج بـ السقاية والرفادة وخلافه، تفضل ثغرة بسيطة في التنظيم ده، وهي الصعاليك، مين هم الصعاليك؟ واتصرف ازاي معاهم قصي؟
 
ده موضوع الحلقة الجاية
 
خليكم معانا