بلاي ليست..الهضبة 1988 لما كان بيشرب الس?ن ف إزازة

ودنك هي حلقة الوصل بينك وبين العالم.. يعني لازم تهتم بيها وتقدرها أكتر من كدة على فكرة وهي مطالبها سهلة وبسيطة.. يعني مش هتطلب منك تخرجها ولا تأكلها ف مطعم غالي كل اللي هي محتاجاه إنها تتسلطن وتسمع حاجات تنعشها وتفرفشها من فترة للتانية.. وبما إن مهمتنا هي إسعاد ودان كوكب الأرض.. ف قررنا نفضي نفسنا كل يوم حبة عشان بس ننقيلك الحاجات اللي تفرفشها وتنعشها..

وكل المزيكا الجميلة دي هتلاقوها بكل الأذواق والمقاسات ف أكتر من بلاي ليست ف قسم المزيكا  عندنا.. وأكيد هتلاقي اللي يناسب ودنك ومزاجك

النهاردة هناخد ودانكم ف مشوار صغير لعالم الهضبة عمرو دياب.. هنرجع معاه بالزمن للبدايات وتحديدا لسنة 1988 وسنة 1990 إللى قدم فيهم عمرو دياب ألبومين من أجمل ألبوماته هما ألبوم ميال وألبوم شوقنا

الألبومين دول كانوا السبب ف نجاح شهرة عمرو دياب.. وبعدها بدأ المنتجين يطلبوه ف أفلام وإعلانات.. زي إعلان س?ن أب إللى طلع فيه عمرو بيشرب من الإزازة عادي زي باقي الشعب.. وتقريبا كدة مكنتش مصر عرفت "الكان" لسة ودي كانت أروش حاجة وقتها..

منقدرش ننسى برضو فيلم العفاريت إللي قام ببطولته عمرو دياب ف الوقت دة وكانت أشهر أغانية عودي يا بليه إللى لسه فاكرينها لحد دلوقتي.. دة غير الكتعة أسطورة الرعب عند جيل التمانينات والتسعينات واللي قدمت شخصيتها الفنانة الجميلة نعيمة الصغير الله يرحمها..

ف لو إنتا من هواة النوستالچيا وبتحب الفترة دي لعمرو دياب.. ف إحنا بنرشحلك تسمع أغاني أهي مرة ومستغرب ليه وشوقنا.. أما لو ليك أغاني تانية مفضلة متقلقش كل أغاني الألبومين موجودة ف البلاي ليست.. إستمتعوا