كتبت- ناهد سمير:

يعد محمود مطبعة هو صاحب الأرشيف الأول والأكبر لموسيقى وأغاني المهرجانات، والذي أطلق اسم "شهرته" على الموقع الخاص به، وهو مطبعة دوت كوم، والذي ينقل عنه الكثيرون موسيقى وأغاني هذا النوع من الفن، بالصوت والصورة، ليس هذا فحسب بل يشارك محمود من خلال فريق "مطبعة" في ألبوم يجمع عددا من مقدمي المهرجان، سيتم الإعلان عنه قريبا، تعرّف على ما قاله لنا "مطعبة" في حوارنا معه.

ليه اخترت التسويق للمهرجانات بالذات؟
أنا كنت في الأول بعمل تصميمات، وده اللي خلاني دخلت في مجال التسويق للمهرجانات.

امتى بدأت توثق للأغاني دي؟
بداية من 2009 تقريبا، كانت لسه المهرجانات طالعة، وكانت حاجة جديدة بنسمعها ومختلفة عن اللي بنسمعه زمان، وكمان أغاني بسيطة، كانت عجباني الفكرة وحبيت أدخل في الموضوع بأي شكل، ومن هنا جاتلي الفكرة إني أعمل موقع مهتم بالدعاية والتسويق للنوع ده من الأغاني والمزيكا.

وكنت بتسوق إزاي ولمين في الأول؟
المتاح وقتها كان "الياهو" لأنه كان منتشر جدا، وكنت بتعرّف على الناس اللي بتقدم النوع ده، ووقتها اتعرفت على "فيجو" اللي بيعتبر بداية المهرجانات في مصر، وبدأنا وقتها نتواصل سوا.

كانت بتواجهك مشاكل في تسويق النوع ده من الأغاني؟
كنا بنعمل دعاية في الأول على مواقع عادية، حتى لو مش تبعنا، بس كان الناس مش مهتمة ومش حابه ده، لأن الأولوية كانت لأغلاني الكلاسيك وغيرها من الأغاني التانية.

 ده اللي خلاك تفكر تعمل موقع خاص بك؟

بالظبط.. عشان يبقي موقع بتاعنا، وأقدر أرفع عليه مهرجانات بس، ولو رفعت عليه حاجه تانية هيبقي ترتيبها رقم اتنين، لأن رقم واحد عندي هو المهرجان.

إيه حكاية اسم الموقع؟
احتارنا في الاسم شوية، لأننا مكناش عارفين المهرجان هينجح ولا لأ، فسمتيه على اسم الشهرة بتاعي، فعملناه "مطبعة دوت كوم"، وكنا بنرفع عليه كل الحاجات الحصري، وكان بيتبعتلنا فيدويهات كتير ع الميل، وكان كل فيديو أو تراك بنعمله بوستر زي الأغاني التجارية بالظبط، بس كان تصميم على أدنا كده في الأول.

مين اللي كانوا بيزوروا الموقع في بدايته؟
بتوع الدي جي، لأنهم أكتر ناس بتستفيد من الأغاني اللي كنا بنرفعها على الموقع، لأن مكنش لسه الناس العادية بيسمعوها أوي، فبيلعبوها في أي فرح شعبي.

وهو إيه اللي بيخلي الناس تتعامل مع مطبعة دوت كوم بالذات؟
إحنا بنشتغل من غير أي تكلفة، مفيش ماديات بناخدها، وإحنا مع رواد المهرجانات في أي أغنية، ومش بندقق، فيهمنا المهرجان بمميزاته وعيوبه، ده غير إن شغلنا كان بسيط، بس مع الوقت بقينا بنطور فيه.

وبتحافظ على حقوق ملكيتك إزاي؟
عن طريق بصمة الموقع، لكن الموضوع لسه مفيهوش عقود، ولو في فيديو بنحط عليه اللوجو بتاعنا، لكن طبعا ساعات فيه ناس بتنقل عننا وساعات هما بيستفيدو وإحنا لأ.

حاولت تقنن الموضوع؟
حاولت أعمل شركة، عشان محدش يإذيني، لأني ممكن أرفع فيديو ويجيب نص مليون مشاهدة وحد يبلغ عني ويخليني أعمل "ريموف"، فقررت أعمل شركة، وإحنا حاليا ماشيين في الورق بتاعها، لأن فعلا كان عندي فيديوهات جابت ملايين المشاهدات وناس بلغت عني وقالت إني بنتهك حقوقهم، رغم إني أول واحد مصور.

هو المهرجان اتطور من 2008 لـ 2014؟
طبعا، يعني أنا كنت بسوّق في الأول لفيجو، وسردينا، وحلابسة، وصالصا، وبيشا، والمدفعجية، وسادات وفيفتي، يعني تقريبا اشتغلت مع كل بتوع المهرجان، بس كل مرحلة وكان لها ظروفها، وكانت المهرجانات في الأول مزيكا بيتقال عليها أي كلام، وكان أغلبه أسامينا، والمناطق بتاعتنا، بعد شوية بدأنا ناخد أغاني قديمة محفوظة والناس بتحبها زي "طفي النور يا بهية"، والمرحلة التالتة كانت إننا نكتب كلام لينا ونغنيه، وكل واحد يعبر عن نفسه ومنطقته.

طب أدوات التسجيل والتسويق كمان اتطورت؟
زمان كنا بنشتغل بمايك بـ 15 جنيه، دلوقتي ممكن نجيب مايك بـ 3 آلاف جنيه عشان نخرج بجودة كويسة، وزمان كان ممكن نشتغل في أي حتة، لكن دلوقتي لازم نسجل في ستوديو، زي ما إحنا موجودين دلوقتي في ستوديو 10، عشان الشغل يطلع أفضل.

انت بقى عندك فرقة بتغني مهرجانات فعلا؟
مؤخرا، بعد ما كنا بنعمل دعاية لكل الناس، بس بعد شوية فكرنا نعمل حاجة باسم الموقع، لأن كلنا من منطقة واحدة كمان، وإحنا حاليا هنا في الاستويديو، بنعمل ألبوم، ومعانا كذا فريق، كل فريق هيكون له فيه أغنيتين.

شايف مستقبل المهرجان إزاي؟
لسه هيكبر عن دلوقتي، وهيشتغل أحسن، بس الأهم إن يبقي في تنظيم، إحنا بنعمل مزيكا والناس بتحبها، لكن زمان الناس كانت الناس بتختلف ع الكلام، وكان ناس بتقول لأ ماندخلهوش بيتنا، عشان الأطفال وكده، بس إحنا دلوقتي بقينا بنقول كلام أفضل، واللي بيشغل المهرجان ما بيزهقش.