كل يوم في نفس الميعاد.. ينطلق مدفع الإفطار من هنا، ويبدأ أبو كف رقيق وصغير في الرقص على ضفاف النيل مع أصحابه الكتير كتير اللي قده وقدهم.. إنه "بكار" الذي لم ينجح أي عمل فني في أن يحتل مكانته، وميعاده المحجوز باسمه على شاشة التليفزيون منذ سنوات طويلة..

"دوت مصر" حاورت الشخصية الكارتونية الشهيرة "بكار"..

يقال أن أباك استشهد في حرب 73، وهناك من يشكك في نسبك، محتاجين نشوف شهادة ميلادك لنعرف الحقيقة؟

ماما مقالتليش إن بابا حارب في 73، وأنا مش مواليد 92 أنا عندي 8 سنوات وبس، وشهادة ميلادي مع ماما، هي اللي معاها كل الأوراق بتاعتي، ومعاها شهادة المدرسة كمان اللي فيها درجاتي في كل المواد.

وشاطر على كده في المدرسة؟

أيوة الحمد لله، بروح كل يوم ومش بغيب وبجيب درجات النهاية وبحب أصحابي وكل أصحابي كمان في المدرسية بيحبوني.

يعني مش بتتخانق معاهم؟

لا أنا طيب في الحقيقة زي ما بطلع في المسلسل، لكن حسونة وفارس هما اللي دايما بيتخانقوا مع بعض.

هم بيتخانقوا كمان في الحقيقة؟ هم أصحابك في الحقيقة وفي المسلسل يا بكار؟

أيوة، ماهو المسلسل ده قصة حياتي، وإحنا طالعين بشخصياتنا الحقيقية. 

والمؤلف عمرو سمير عاطف بيجي يعمل إيه؟

مش عارف.. أنا بشوفه بيجي يقبض الفلوس من المنتج ويروح.

إنت ليك معجبين كتير بيتفرجوا على الحلقات بتاعتك، بتتواصل معاهم إزاي عن طريق فيس بوك؟

أنا مش عندي فيس بوك عشان أنا لسه صغير.. الفيس بوك مش بيخلي الأطفال يخشوا عليه لازم أكون كبير.

ماتعمل أكاونت بتاريخ ميلاد وهمي يا بكار زي ما العيال كلها بتعمل يا حبيبي؟
لا أنا مش بكدب.

آه صح، الكدب وحش عندك حق.. طيب بتجيب لبسك منين والطاقية الملونة الجميلة والشنطة الحلوة دي؟
أمي هي اللي بتعملي أغلب لبسي على إيدها وساعات بتشتريلي حاجات ملونة وجميلة بلبسها في المسلسل وأنا بصور وبروح بيها كمان المدرسة.

بيقولوا إنك مطلعتش رشيدة معاك في الحلقات الأولى عشان كنت "منفسن" عليها؟ 

لا أبدا، أنا بحب رشيدة بس أنا كنت خايف عليها تيجي معايا في الحلقات الأولى لما طلعنا الرحلة البعيدة وقعدت في خيمة ولما طلعنا رحلة البالون الطائر، دي حاجات خطيرة على رشيدة وهي لسة صغيرة، وأنا بخاف عليها عشان كده طلبت منهم يخلوها تيجي من الحلقة الرابعة على طول، علشان نكون خلصنا كل الحاجات الصعبة دي.

 

في أطفال زيك كده الناس بتحبهم وهم صغيرين ولما بيكبروا مش بيحبوهم، مش خايف نجوميتك تقل لما تكبر؟
 

أنا مش بكبر يا طنط قولتلك، أنا صغير وكفي رقيق وصغير زيي، وعندي 8 سنوات مش هاكبر تاني.

كل الأطفال اللي بينجحوا زيك كده في التليفزيون عمو محمد السبكي، ده منتج مشهور، بيقولهم يروحوا يمثلوا معاه في الأفلام، لو قالك تعالى مثل في فيلم هتروح؟

لا مش هاروح معاه في الأفلام دي، عشان أنا عندي مدرسة ومذاكرة، وكمان أنا بحب أروح بعد المدرسة أعمل الواجب عشان المدرسين بتوعي يفضلوا يحبوني. 

*الأسئلة كلها أجاب عنها "نيابة عن بكار" السيناريست عمرو سمير عاطف مبتكر الشخصية ومؤلف أجزاء المسلسل.