سخرت الفنانة هالة فاخر، اليوم الثلاثاء، من تعامل الشعب المصري مع المصابين في حوادث الطرق، مشيرة إلى أن المصري دائما يتميز بالشهامة، وينتظر ليشاهد المصاب حتى الوفاة، بالإضافة إلى محاولاتهم المستميتة لإسعافهم، دون أي خبرة طبية.

وأضافت فاخر، عبر برنامجها هات من الآخر على شاشة صدى البلد "المصريين بتلاقيهم واقفين حولين المصاب وممكن يموتوه من كتر الزحمة، ودايما يسألوا السؤال السخيف هو مات؟ طيب مين اللي خبطه؟، والموضوع فجأة يتحول إلى فريقين، الأول ظبباط مباحث، والتاني فريق أطباء، ودي مهن يرغب المصريون في ممارستها منذ الصغر".

وتابعت "وفي الآخر المصاب ممكن يموت من الاختناق وكتمة النفس مش من الحادثة، وكم العربيات اللي بتهدي وتتفرج، وتلاقي واحد ماسك السائق من الأتوبيس من القميص، ويقولك فين رخصتك؟، إنت شارب إيه؟، كده تخبط الراجل؟، ويمسك فى جيب السائق ويشوف البطاقة، وكلها أسئلة مثل تحقيق النيابة بالضبط".

وختمت فاخر "فريق الدكاترة واللي كانوا علمي في ثانوية عامة، يبدأوا يتجمعوا حولين المصاب، ويقولوا ده أكيد شرخ في الجمجة، لا ده مياه على الرئة، طيب رفع إيده أو رجله؟، اتكلم كده قولي إسمك ايه؟، حاجة في النهاية تنقط بصراحة من كثر الأسئلة، والراجل المصاب مرمي على الأرض، وماحدش عارف هو فيه إيه؟".