حَكَت لنا أساطير الأوّلين إن السِت وظيفتها تخلي البيت جنَّة.. وإن تفرُغها للبيت هو اللي حايخلي الزوج أنجَح، والعيال أأدَب، والنيل أنقى، والشوارع أنضَف، والجريمة أقَل، والخُضار أرخَص، وخُرم الأوزون أضيَق.. ومن هنا سقطت السِت في فخ الأفخاخ اللي مافيش منه مَهرَب إلا بالنزول إلى أرض الواقع.. ومقارنته بتلك الأساطير والنظريات التي قام بتأليفها سُكان كوّكب "أورانوس".

الواقع بيقول إيه بقى يا عزيزتى؟.. جمَعِتني الصُدفة بشابة مصرية في صالة الانتظار في مطار دولة عربية.. كانت قاعدة جنبى بتكلم نفسها وتعيَّط... لكن نظراً لطبيعتى ككائن خال من جينات الفضول ماتدخلتِش واستمريت فى قراية الكتاب اللي فى إيدي..  لغاية ما ابتدت تعيَّط بصوت عال.. سألتها:

- أقدر أساعدِك فى حاجة؟
- (صريخ).. ولاد الـ****
- اممممم معلش إهدى بس أجيب لك مية؟
-  أهدى؟ دول ولاد ***!!!
- هما مين دول؟
- (بزعيق) يا سلاااام!!! بذمتك مش عارفة؟؟
- لا والله أنا مش من هنا أصلاً.
- عارفة السُحلفاة؟
- !!!.. طبعاً.
- قعَد يتسحَب زي السُحلفاة. 
- مش ممكن توَّطى صوتِك شوية عشان إحنا فى المطار وكده يعني؟ 
- أهلِك بيعاملوني وحِش.
- أهلي أنا؟ 
- ده جوزي اللي بيقول كده
- طب وأنا أهلي يعرفوه منين عشان يعاملوه حلوّ ولا وِحِش؟
- يا ستى هو بيقول لي أنا إن أهلي بيعاملوه وِحِش.
- معلش يمكن سوء تفاهم بين الطرفين. 
- (مع رَفع الحواجِب وتبريق العينين) خاصِمت أهلي. 
- (برُعب).. ربنا يهدي الجميع.
- أصحابك بيغيروا مني.
- هو إنتي تعرفي أصحابي؟
- يووو قلت لك جوزي اللي بيقول لي كده.
- آه طيب.. معلش ساعات بيبقى فيه حساسية من الأصدقاء.
-  (مع رَفع الحواجِب وتبريق العينين) قاطِعت أصحابى. 
- بردو؟؟
- مابحِبِّش السِت التخينة
- لأ دى حرية شخصية
- إنتي مال مُخِّك مقَّفِل كده ليه؟..  قلت لك جوزي جوزي هو اللى بيقول لي.
- طب بس وطّى صوتك شوية والنبي.. البوليس ابتدى يتوَّتر وحايجي يسحَبنا على القِسم.
- (مع رَفع الحواجِب وتبريق العينين) جوَّعت نفسي.
- معلش ساعات الوزن الزايد بيبقى مُضِر للصحة.
- عايزك ليَّا لوحدي. 
- (بتوَّتُر).. ده جوزك اللي بيقول لك صَح؟
- ابتديتي تفهمي أهو.
- ليه هو إنتو كنتوا متجوزين شركة ولا إيه؟
- (بزعيق) قال لي "يا أنا يا الشوووغل".
- (أتلفِت حواليّا).. الصوت الله يخليكي أنا ابتديت أخاف بجَد!!
- (مع رَفع الحواجِب وتبريق العينين) سيبت الشُغل.
- كمااان... حاقول لك إيه؟ هى عموما الحياة اختيارات!!
- قعدت آكِّل، واشرّب، واحِل فى هوموورك، وأوَدي في تمارين، واجيب من دروس و.. 
-  وتطبِّقى فى غسيل وتدوَّري على فِرَد الشرابات الضايعة.. فهمنا بقى وبعديييين؟
- (بنبرة تهديد)... نعم؟!!
- (بخوف)... ولا حاجة دى مجرد نُكتة بايخة جدااا على فكرة؟
- مش إنتي الإنسانة اللي أنا حبيتها
-  (بارتباك وتوَّتر) إممممم قصدِك إيه؟؟
- (بعصبية).. أنا حاخبَطِك بحاجة في نفوخِك بقى.. قلت لك 100 مرة جوزي اللي بيقول. 
- طبيعى ما إنتى سيبتي كل ما يمت إلى هوِّيتك بصِّلَة.. لا يمكن حتبقي نفس الإنسانة.
- (بزعيق أعلى بكتير من الزعيق الأولاني).. هوِّية إيه يا أختي؟ أنا سيبتُه هو لما اتجوز عليّااا.
- يا ستي أبوس إيدك توَّطي صوتك شوية.. المطار كله بيتفرج علينا.
- مطار إيه وزِفت إيه دلوقتى؟ أنا لازم أدوَّر على شغل بقى..
- وهو الزعيق ده هو اللي حايجيب لك الشُغل يعني؟
- ما إنتي اللي نرفِزتيني. 
- لا والله؟ أنا بردو اللي نرفِزتِك؟
- أيوة.. شايفاني محتاجة حكَم ومواعِظ دلوقتي؟
- لا أبداً أنا شايفاكي دلوقتى مش محتاجة غير قميص الاكتاف!!