- نسبة الطلاق في الغرب عالية رغم أنهم بيعرفوا بعض كويس قبل الجواز

نسبة الطلاق برة عالية عشان الناس لما بتبقى مش سعيدة بتنفصل ببساطة وبتدور على سعادتها منين ما تكون، هنا تحت دعوى البيت والولاد والاستقرار في ناس عايشين مع بعض أموات في بيت واحد، هنا اتربينا على ثقافة الاستحمال وبلاش نخرب البيوت وبنعيش تعساء وفاكرين دا الطبيعي، اللي بنسميه العشرة هو عبارة عن "كومفورت زوون"، بنلجأ لها من الكسل والجُبن من التغيير ومن سلطة المجتمع اللي جابرانا نكمل.

- الطلاق بيتسبب في تشريد الأطفال

الطلاق بيتسبب في دا عندنا، عشان ماعندناش ثقافة التعامل مع بعض بعد الانفصال، عشان بمنتهى الأنانية بنقدم كرهنا لبعض وأنانيتنا على مصلحة أولادنا وصحتهم النفسية، الأطفال لو عايشين مع طرف من غير مشاكل وبيقدروا يشوفوا الطرف التاني ببساطة هيكونوا أسوياء أكتر من تربيتهم في بيت كله كره ومشاكل وخناقات.

- الحجاب بيقلل التحرش

مكنش بقى عندنا أعلى نسبة تحرش في العالم، البنات برة بيمشوا في الشارع عريانين تقريبا ما حدش يقدر يلمسهم، مش عشان اللي هناك دول مش رجالة مثلا، لكن عشان فيه قوانين بتحميهم، عشان أبسط حقوق الإنسان أنه يلبس زي ما يحب، لو كل يوم وأنا نازلة الشارع هخلي المجتمع والناس يختارولي هلبس إيه، فدا معناه انعدام أبسط أشكال الحرية الشخصية.

- نسب الاغتصاب برة عالية أكتر من هنا

برة بيبلغوا عن أي حالة تحرش أو اغتصاب، وبناء عليه فيه توثيق وإحصاء دقيق عشان مفيش ثقافة لوم الضحية، واللي بتتعرض لحادثة من النوع دا بيتم التعامل معاها نفسيا وجسديا وقانونيا لحد ما بتتعافى وتاخد حقها، هنا يا بيداروا على فضيحتهم عشان بنتهم اغتصبت، كأن دي غلطتها مثلا! يا إما بيجوزوها للمغتصب ويا دار ما دخلك شر.

- البنات عندنا غفر، شايفين بنات برة عاملين إزاى!

البنات عندنا اتعودوا أنه لو مكانش حرام وعيب تبقى حلوة فبتخاف تطلع حلوة من بيتها عشان اللي بتشوفه في الشارع، البنت عندنا اتعودت كل يوم الصبح تقف قدام المراية تداري نفسها في لبسها عشان ما تلفتش الأنظار وتجيب لنفسها العكننة اليومية بكلمة سخيفة أو انتهاك بإيد حيوان بيعاقبها على وجودها في الحياة، وعلى كون شكلها حلو، البنات عندنا لو هتلبس براحتها زى بنات برة اللي أنت معجب باهتمامهم بنفسهم ولبسهم وشكلهم، يبقى غالبا مش هتروح بيتها سليمة، دا أنت لو شفت صورة ممثلة عربية لابسة فستان حلو بتقول عليها الكلمة بتاعة أستاذ تامر (آه لما لام الضحية عشان لابسة بلوزة وبنطلون بدال ما يلوم المتحرشين، صقفة لأستاذ تامر هنا والنبى).. وانت لسة حالا يا مؤمن قافل صورة مونيكا بيلوتشى وأنت بتعيط من فرط الجمال!

- الناس برة تعساء عشان ماعندهمش القيم والتدين والترابط اللي عندنا

أنا مش هرد ع النقطة دي، أنا هقولك بكرة ركز في وشوش الناس وأنت ماشي في الشارع، وعد على صوابعك قابلت كام واحد مبتسم أو على الأقل مش مكشر.

- الغرب بيضطهد المسلمين
من غير كلام فضفاض كتير ممكن يتقال في النقطة دي عن مسلمين عايشين برة وبيتعاملوا بكرامة وبيتمتعوا بحماية وحقوق أكتر من اللي كانوا بيلاقوه في بلادهم، هنشوف بس مثالين صغيرين:

أول مثال: حادثة كراهية فردية من مواطن ألمانى ضد مواطنة مسملة محجبة بسبب حجابها، مروة الشربيني، حادثة قلبت الدنيا لبشاعتها وعشان مش كل يوم بتحصل، المواطن الألماني اتقدم للمحاكمة واتحكم عليه بالسجن مدى الحياة، أقصى عقوبة في القانون الألماني.

تاني مثال: تجربة صغيرة قام بيها دوت مصر تى فى للمعاملة اللي ممكن يلقاها واحد يهودي مسالم في شوارع المحروسة، شوف الفيديو هنا، وبالمرة عدي على التعليقات والشير شوف كم الضاحكين فى استمتاع والمشجعين على التعدي، وتخيل لو شخص يهودي فعلا اتعرض لده في الشارع ووصلت الأمور لأذى أكتر قبل ما يهرب من قدامهم، هيلاقى حد يحميه؟!

هتقولي أنت مش شايف إسرائيل بتعمل إيه؟! هقولك وأنت مش شايف داعش بتعمل إيه؟! هتقولي أنا ماليش دعوة بداعش أنا مسئول عن تصرفاتي كمسلم، هقولك واشمعنى المواطن اليهودي أيا كانت جنسيته مسئول عن أفعال دولة ويتعاقب عليها وهو نفسه مسالم؟!

ما تدعيش أن الناس بتعاملك وحش، ودا مش حقيقي، وانت أصلا بتعامل غيرك بالشكل المخزي دا.

اقرأ أيضا