يري الكاتب خالد الصفتي، أن دراما المجتمع وسلبياته تخلق الكوميديا، لذا تحدثنا إليه في الجزء الثاني من حوارنا معه، عن الشخصيات المتعددة في إصدارات سلسلة فلاش، وعن خلفية تسمية كل شخصية منها باسمها الحالي، وعن كتابه المفضلين، وغيرها من الأمور، وكان حوارنا معه كالتالي..

لقراءة الجزء الأول من الحوار من هنا

كلمنا عن الشخصيات اللي موجودة في السلسلة؟

استوحيت كل شخصيات فلاش من مجتمعنا من البيوت المحيطة بنا بكل السلبيات والإيجابيات اللي فيها، فأستوحيت شخصية "علام" من الجهل، وهو الشخص اللي مش عارف إنه جاهل، وعنده معلومات كلها خطأ، ويسخر من اللي بيقول المعلومة الصحيحة، وده بنشوفه حاليا.

وكمان الشخصية القريبة مننا "عباس" اللي عنده نظرة تشاؤم، ودي شخصيات بنشوفها في الشوارع والمواصلات، فالروح دي بقيت موجوده بوفرة في مجتمعنا علي عكس شخصية "سرور" المبتسم، اللي فيه من طبيعة الشعب الياباني، اللي عراف قيمة العمل والالتزام، لدرجة إن اسم اليابان دلوقتي بيعني الجودة.

والمواطن المطحون؟

بيمثل الحالة الاجتماعية والاقتصادية مش السلوكية للمواطن المصري، لأنه موظف حكومي مرتبه ضعيف جدا، وده كان قبل الوقت الحالي، لأن الموظف حاليا تطور ماديا واقتصاديا مش عن طريق عمله اللي لسه زي ما هو، ومبقاش مطحون ولا حاجة، لكن المواطن هو اللي لسه مطحون.

والبحار الغبي وكابتن غريق؟

البحار الغبي مساعد كابتن غريق، عندهم سفينة تجارية اسمها "غريق 1" بينقلوا من خلالها بضائع من بلد لبلد، بتحصل بينهم مواقف كتير جدا بسبب غباء البحار، والكابتن بيضطر يقبل الغباء، لأن البحار ابن صديق قديم له.

أقرب الشخصيات لقلبك ايه؟

بحب شخصية "علام" أوي لأنها معبرة وملامحه بتكشف صفاته.

فيه كام عدد حاليا من الإصدارات كافة؟

حاليا في 81 عدد فلاش، و36 سماش، و35 مغامرات فلاش، و 6 أعداد سوبر فلاش.

لو هتعمل عدد حاليا ممكن تتكلم عن ايه؟

لما تحصل ثورة لازم الوقع بعدها يبقي غير قبلها، ورغم وجود تغيرات فإنها ظاهرية مش اجتماعية، وجالنا نظام واتنين وتلاتة وإحنا زي ما إحنا، فالموضوع مش قيادة، الموضوع فينا إحنا، في الوسايط والتوريث وتعيين القرايب في مكان العمل، وبالتالي لازم شئ يجبرنا علي التغير.

في عدد جاي لفلاش؟

العدد 28 و38 في الصيف، وعدد هينزل معرض الكتاب اللي جاي إن شاء الله.

عندك أعداد من الإصدارات في مكتبتك؟

للأسف معنديش ولا عدد، لأن لما كان بيجيلي ضيوف أو زوار، كنت بديهم نسخ، لدرجة إن لما كنت بضطر أرجع لأعداد قديمة عشان أعرف مواقف بعينها مش بفتكرها، وبينقذني من ده بعض القراء المخلصين اللي أنا علي علاقة بهم، بتصل ببعضهم بيقولولي الأحداث.

قراء فلاش لهم سن معين؟

أعتقد حاليا سن القراء بقى أعلي، لدرجة إن في ناس لغاية الـ 30 بتقراها، وهي سلسلة لكل الأعمار.

بتقرأ لمين؟

أكتر كاتب كنت بحبه توفيق الحكيم، لأن عنده روح السخرية الجميلة في أدبه، ويوسف إدريس في القصة القصيرة، والسباعي ككاتب رومانسي، ومحمد عبد الحليم عبدالله، ونجيب محفوظ رغم إن أسلوبه صعب، وحديثا بحب جمال الغيطاني لما بيتكلم عن مصر والقاهرة والتاريخ والثار أكتر ما بيتكلم عن الرواية.