بشرى عظيمة لأهالي طرابلس الكرام، حفلة واحدة فقط ليلة واحدة فقط، الثلاثاء 15 أيلول سنة 1931 الساعة 9 مساء. 

الحفلة الغنائية الفريدة من مطربة الشرق الوحيدة. 

الآنسة أم كلثوم.

على مسرح وتياترو زهرة الفيحاء بمدينة طرابلس الزاهرة.

من منكم يريد أن يكون سعيدًا طروبًا متمتعًا بلذة الحياة، طبعاً كلكم تريدون.

إذًا عليكم بسماع هذا الصوت السحري الذي يملأ القلوب انشراحًا والنفوس بهجة.

تغني على أشهر تخت آلات الطرب محمد القصبجي وإبراهيم عريان وكريم حلمي المشهود لهم بالكفاية والمقدرة الفنية.

حيوا الفاتنة الآنسة أم كلثوم التي تطربكم بكل جديد مدهش يملك على السامع شعوره نابغة الشرق في الغناء وعروس هذا الفن وكفى بصوت أم كلثوم مطربا وكفى به ساحرا.

ونحن بدورنا نشكر أحمد افندي الجاك للمشقّة التي قام بها في السنين الماضية لإحضار الآنسة أم كلثوم إلى لبنان وسوريا.

ملحوظة: نعلن إلى العموم الأهالي الكرام بأن يبادروا بقطع التذاكر من شباك التياترو من الآن، حيث شباك التذاكر لا يفتح ليلة إحياء هذه الحفلة فبادروا من الآن لأن الزحام سيكون شديدًا فوق العادة

متعهد الحفلة خضر النحاس

الكلام ده كان عبارة عن دعوة لـ حضور حفلة لأم كلثوم، في مدينة طرابلس اللبنانية، الدعوة ألقاها مجموعة من الشباب في أنقاض مسرح الأنجا أو الباروكة، اللي أنشأه حسن الأنجا في القرن التاسع.

المسرح اتهد واتنهب سنة 1975 في الحرب الأهلية، وبعدين حصل عليه جدل، لما حد اشتراه وهده علشان يبني عليه مول، أثناء الجدل ده، كانت الدعوة موضوع أساس في الدلالة على عراقة المسرح اللي غنت عليه أم كلثوم في يوم من الأيام.

بس ده مش موضوعنا، خلينا بس نتكلم عن كذا حاجة بخصوص الزيارة:

أولا، إن زمن الرحلة سنة 1931، وفي الوقت البدري ده أم كلثوم كان اسمها "مطربة الشرق الوحيدة"، ومكنش لقب جديد، والدعوة بـ تشكر الناس اللي بذلوا جهود ضخمة علشان يستضيفوها في الشام. ده كان في عهد الملك فؤاد، قبل فاروق بخمس سنين، وده معناه إنها كانت في مصر بقت بـ الفعل أسطورة.

أنا بـ أقول ده، لأنه في الفترة الأخيرة انتشرت مقالات عن علاقة عبد الناصر بـ أم كلثوم، وبـ تهول وتضخم في إن يوليو ليها دور في صناعة أسطورة أم كلثوم، ودي حاجة أي متابع لـ تاريخ أم كلثوم، أو تاريخ مصر عموما يعرف إنها مش صحيحة، وإن العكس هو الصحيح، يوليو استفادت من أسطورة أم كلثوم.

علشان كده حصلت القصة المعروفة، لما ظابط من الظباط منعها من الغُنا في الأيام الأولى بعد يوليو بـ اعتبارها أحد رموز العهد البائد (فلول) فـ ناصر قال الجملة الشهيرة، يبقى نردم النيل ونهدم الهرم لأنهم من العهد البائد.

ثانيا، مكتوب في الدعوة أسماء أشهر عازفين التخت، معروف منهم العملاق محمد القصبجي، الاسمين التانيين إبراهيم العريان، عازف القانون، وأبوه وجده كمان كانوا عازفي قانون، وابنه كمان أحمد العريان، اللي بقى مدير فرقة أم كلثوم بعد القصبجي، أما كريم حلمي فـ ده أقدم عازف كمان في فرقة أم كلثوم. عموما، بـ أجهز دلوقتي سلسلة مقالات عن أشهر العازفين اللي لعبوا مع أم كلثوم وحليم وعبوهاب وغيرهم.

ثالثا، دي ما كانتش أول زيارة لمنطقة الشام، كان فيه زيارات سابقة يمكن أشهرها سنة 1928، لما غنت في القدس ويافا وحيفا قبل الاحتلال طبعا، والدعوة كمان كان مكتوب عليها نفس اللقب "مطربة الشرق الوحيدة"، وكان باين من الدعوة إن فيه مكان مخصوص للسيدات.

الحفلات دي اتكررت، ومش ممكن نرصدها كلها، علشان كده هـ نروح لـ حفلة النادي الأهلي 1944، بس الكلام ده بكرة بقى.