يعد "كريم ماريو"، من كاتبي أغاني المهرجانات أيضاً، يبلغ من العمر 25 سنة، و بدأ في كتابة أغاني المهرجانات عام 2008، وهو متخصص بشكل كبير في الكتابة لفريق "المطبعة".. وكان حوارنا معه كالتالي: ..

مين أول حد كتبت له؟
تيم مطبعة

كتبت لهم إيه؟
كتبت أنا و إسلام حجازي مهرجان "الدنيا شمال" توزيع مصطفي ماندو، وغناه محمود العمدة، وبعدها كتبت مهرجان "قول يارب" لمحمود العمدة برضه وكانت توزيع مادو.

إشمعني أغاني المهرجانات بالذات؟
بنوصل من خلالها اللي عايزينه بأسلوب جديد.

"لست وحدك حبيبها".. المهرجان ده فكرته جت منين؟
الأفيه بتاع الأغنية طلع وأنا قاعد مع "محمود مطبعة"، والفكرة كلها دايرة علي واحد بيتكلم علي البنات.

بتاخد وقت أد إيه في كتابة المهرجان؟
لو الفكرة جاهزة ممكن أخلصها في 10 دقايق أو في ربع ساعة.

بتعرض ع الناس الفكرة ولا هما اللي بيطلبوها منك؟
 في الأول كنت بعرض عليهم الأفكار، وكان كل واحد بتعامل معاه كان له طريقة تفكير وأسلوب، بس حالياً مع تيم مطبعة، بنقعد كلنا سوا ونختار الفكرة ونشتغل عليها.

ليه دايما في تباهي بالذات في المرهجان، وكمان إيحاءات؟
في الأول كان في إيحاءات فعلاً، وعن الذات كل واحد بيتكلم عن ذاته وبيقول مميزاته في تراكه، وبتبان شخصيته عن طريق كلامه والأداء بتاعه.

إيه أكتر حاجه كتبتها وبتحبها؟
مهرجان الدنيا شمال، هي دي تجربة شخصية؟ لا بس أنا كنت حاسس الموضوع جداً.

إنت ناوي تكمل في الكتابة للمهرجان بس؟
والله لو ظهر ستايل تاني هشتغل فيه، لن اللي بيكتب في العموم مش بيوقف نفسه علي نوع معين، بس المهرجان بالنسبة لي أسهل طريق نوصل كلمنا به للناس.

شايف المهرجانات إزاي كمان 5 سنين؟
لازم يكون في تطوير في المزيكا والأداء عشان يعيش، لكن لو فضل كده مش هيستمر.

في البيت عندك شايفين كتابتك للمهرجان إزاي؟
في الأول كانوا بينتقدوني ويهاجموني، بس لما لاقوا إن الموضوع تمام وشغال، والناس بتسأل سابوني علي راحتي، وكمان بقوا بيسألوني عملت إيه جديد.