أشادت الفنانة جيهان خليل، بقرار الرئيس عبد الفتاح السيسى، بقرار تعليق الدراسة في الجامعات والمدارس لمدة اسبوعين اعتبارًا من غدا الأحد، وذلك في إطار خطة الدولة الشاملة للتعامل مع أي تداعيات محتملة لفيروس كورونا المستجد، قائلة، سعيدة جدا بقرار تعليق الدراسة ولازم نلتزم به بالشكل المظبوط، يعنى مينفعش الطلاب ينزلوا للمولات والأماكن العامة والتجمعات ويتريقوا على الموضوع ويفتكروها انها إجازة.

وأضافت في تصريح خاص لـ "اليوم السابع"، انا عارفة انا لناس هتتريق على كلامى بس مينفعش تروح مكان عام وتنقل العدوى لاسرتك حتى لو مناعتك قوية ومش فارقة معاك فانت هتروح للبيت وممكن تكون والدتك حامل او والدك تعبان او جدك وكبار في العمر، وبكل بساطة بتقتلهم بأنك تنقلهم العدوى وباستهتارك شوية إنسانية ورجولة وشهامة تجاه اسرتك حتى.

وتابعت، ياريت منسمعش للناس اللى بيتكلموا على مواقع التواصل الاجتماعى  بشكل كبير لأن اغلبها حاجات مفبركة وتهويل على الفاضى، لأننا محتاجين مبادرات حقيقية، ونفسى مثلا لو تعليق الدراسة هيمتد يكون في تطبيق على الموبايل ويتطوع خلاله المدرسين بإعطاء الدروس عن طريق هذا التطبيق ويكون في رقيب زى المدرسة بس عن طريق الانترنت.

واختتمت حديثها، انا ممكن اتطوع في عملية إعطاء الدروس لان قبل ما أكون ممثلة فأنا كنت مدرسة، وممكن كمان يكون في حملة توعية من كل الفنانين والممثلين، ورجال الاعمال يساهموا باللى يقدروا عليه واقل حاجة ممكن نقدمها تجاه بلدنا واهالينا وربنا يحمينا جميعا.