تقدم المطرب الشعبى حمو بيكا، إلى نقيب الموسقيين هانى شاكر باعتذار عما بدر منه بعد اقتحامه نقابة الموسقيين، موضحًا: "أنا روحت النقابة عشان أخد تصريح أعمل بيه حفلة ولكنهم رفضوا والحقيقة أنا مش عارف السبب حتى لو انا مش بعرف أغنى بس أنا ليا جمهور بيسمعنى.. وأقل أغنية عندى جايبة 25 مليون مشاهدة على اليوتيوب".

وقال "بيكا" خلال حواره مع الإعلامى أحمد موسى ببرنامج "على مسئوليتى" والمذاع عبر قناة "صدى البلد": "أنا عندى أغانى معدية الـ 140 مليون مشاهدة على اليوتيوب وفيه ناس بتسمعنى حتى لو أنا صوتى وحش، وأنا أخوك الصغير وأنا آسف وسامحني .. وأنا معايا فريق عمل بياكل عيش".

وذكر أن والده كان السبب فى دخوله مجال الغناء الشعبى، مضيفًا: "أنا عيلتى كلهم جزارين ووالدى هو من طلب منى الغناء لأول مرة وتسجيل أغنية بعنوان قشطة".

وواصل: "أغنية قشطة كانت أول أغنية ليا ومكنتش اعرف وقتها اليوتيوب ومواقع السوشيال ميديا وأصحابى هما اللى رفعوا الأغنية عبر مواقع السوشيال ميديا والناس تفاعلت معها وكانت البداية من هنا".