روت المطربة شيما بطلة كليب "عندى ظروف"، تفاصيل القبض عليها بعد طرح كليبها المتسب فى حبسها قائلة، أنا كنت فى مشوار ووالدتى هى اللى كانت فى البيت وناس اصحابى اتصلوا بيا وقالولى ان المباحث عندك فى البيت، فكنت عارفة ان هما هناك اصلا فانا اللى روحتلهم مش هما اللى قبضوا عليا، وده من خوفى على والدتى يحصلها حاجة، وطبعا أهلى مكنوش مصدقيين اى حاجة من اللى بتحصل دى.

وتابعت: اعتبرت نفسى نايمة فى البيت، ومفرقش معايا الموضوع لانى شفت صعوبات كتيرة فى حياتى ومن كتر اللى شفته، دى ممكن تكون ابسط حاجة اتعرضتلها بالرغم من سنى الصغير، اواعتبرت حبسى ضربة قوتنى اكتر ومكسرتنيش، لأنى اتعلمت حاجات كتيرة جدا من اول يوم فى الحبس وأعتقد مكنتش هتعلمها غير وانا عندى 50 ولا 60 سنة،وانا طلعت من التجربة كسبانة مش خسرانة لأنى اتعلمت انى مش هعمل كده تانى وانى اتابع شغلى وأخد بالى من كل حاجة بنفسى قبل وصولها للناس.

وأكدت أن التعامل داخل السجن كان كويس مش زى ما بنشوف اللى بيحصل فى الافلام والمسلسلات من المساجين بالداخل، والحكومة كويسة وكان دايما فى اشراف وادارة داخل السجن بشكل مستمر.

وعن تبرأ صناع الأغنية منها، قالت، محمد عاطف لم يتبرأ من الأغنية لكنه قال ان الأغنية دى خفيفة كان ممكن تغنيها عفاف راضى او صفاء ابو السعود، وقال انه مش عجبه تصوير الأغنية زى مانا صاحبة الأغنية مش عاجبنى التصوير اللى ظهرت بيه، أما رامى جمال  انا معرفهوش شخصيا وهو الشركة المنتجة اتعاملت معاه مش اكتر

أماعن إيقافها من نقابة المهن الموسيقية وشطب عضويتها قالت، للأسف فعلا لسه متوقفة عن العمل، بس خير ان شاء الله، انا بحاول أحل الموضوع ده فى الوقت الحالى وان شاء الله يكون فى حفلات كتيرة باذن الله

لمزيد من الفيديوهات الإخبارية والرياضية والسياسية والترفيهية