"محمد وكريم أيمن".. شقيقان من مواليد منطقة الدرب الأحمر ومن محبي تربية الكلاب "البيتبول" ذات الفك القاتل، يكشفان عن أسرار تربية الكلب البيتبول وحقائق عنه لا تعرفها من قبل.

ويقول "محمد أيمن": "الكلب روك من الكلاب البيتبول النادرة وهو كلب جدع جدا وممكن يموت نفسه عشان صاحبه وفيه كمية جدعنة مش موجودة فى أى نوع تانى من الكلاب، فى كلاب تانية معندهاش الشراسة والحمقة بتاع البيتبول، كلب بيغير على صاحبة جدا".

وتابع: "لو حد دخل على مكانه غريب ممكن يموته، ولو نزل الشارع والناس عرفت الكل بيخاف وبيتجنبه ومحدش بيقرب منه الكل بياخد جنب، روك كلب أجدع من الصاحب ولو حد هاجمنى مثلا بسكينة أو باى حاجة فى أيده بيهجم عليه وياخدها منه وممكن ياخد دراعه كمان ومش هيسيب دراعه إلا لما يسمع التكة أو الطرقعة بتاعت تكسير العظم فى تكة فى مخه كده لازم يسمعها".

واستكمل: "لو شوفت كل بيتبول تلاشاه لانه أشرس كلب ولما بتعض مش بتسيب إلا لما تسمع الطرقعة، وخاف من الكلب البيتبول لو وقف على ضوافره وكشر وعينه أحمرت كده هو هيهجم بقتال شرس والكلب البيتبول مش بيهوهو، لا الكلاب ديه بتصرخ ولو صرخ يبقى أتحول خلاص وهيقتل والنوع ديه من الكلاب متخلفة عقليا ومقاتلة وأي حيوان ماشي في الشارع هو ملكه وهيموته".

وأكد "كريم أيمن": "الكلب لو خد السلاح من حد بياخدها ويقف بيها بعيد ويحط أيده على السلاح وبقى بتاعه خلاص ومحدش هيعرف يقرب ياخد السلاح لأنه بقى ملكه خلاص، الكلاب دية بالأوامر".

ونفى "كريم" بعض الشائعات التي تتردد على الكلب البيتبول، قائلا: "الكلب البيتبول الناس بتقول أنه بيغدر بصاحبه وديه شائعة لأن الكلب ده جدع جدا وممكن يضحي بنفسه عشان صاحبه والكلب وفي ومعروف بكده، بس هو فيه حتة كده لو عض حد في حاجة في مخه كده لازم تعمل طرقعة أو تكة عشان يسيب اللي قدامه وهو فعلا كلب مختل عقليا وممكن جدا يقتل ومفيش ناس كتير بتربى البيتبول عشان بتخاف من شراسته".

وتابع، "الكلاب ديه مش المفروض انها تتعامل مع كلاب لأن أى كلب بالنسباله أو حيوان تانى هدف مشروع ليه وهنا بقى مفيش حاجة اسمها أوامر ومش بنقدر نسيطر عليه لما بيشوف كلب لانه بالفعل هيموته".