إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

بيقولك مرة واحد شغال اتش ار خصم للعفريت يومين عشان طلعله متأخر من المصباح ومطلعش من اول دعكة.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الاثنين 5/3/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

ممكن تحس بدوخة النهاردة من كتر التفكير ف المستقبل والمسئوليات والفلوس.. حاول تهدى على روحك حبة وتفتكر انك عندك قلب لازمله حب ومشاعر وحاجات من اللي انتا راكنها لحد ما صدت دي

برج الحمل عملياً

( الشغل والمذاكرة والتخطيط لبكرة ):

مسيرك هتتكافئ على مجهوداتك تجاه الحياة على كوكب الارض

برج الحمل صحياً

( نفسيا وجسمانيا وكل مايخص طاسة المزاج ):

صحيا النهاردة انتا محتاج متذاكرش لعيال صغننة مقررة انها تحت اي بند متفهمش اي حاجة ف المنهج

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والنارية والهوائية..

إعرف حظك اليوم برج الثور بالتفصيل الاثنين 5/3/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

متشتكيش النهاردة لحد الا لنفسك ف المراية وبس

برج الثور عملياً

( الشغل والمذاكرة والتخطيط لبكرة ): 

احزانك تخصك لوحدك يابرنس.. لا العالم مسئول عنها ولا انتا المفروض تنقلها للوجود كله شخص شخص لمجرد انك مش عارف او مش حابب تنبسط.. مزاجك ومودك مسئوليتك لوحدك ومش مطلوب من اي حد يفرفشك طالما انتا مقرر من جواك تتنكد

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة انتا محتاج تحدف طوب ف بحيرة مية راكدة لمدة نص ساعة

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والبرمائية والنارية والهوائية والترابية..

إعرف حظك اليوم برج الجوزاء بالتفصيل الاثنين 5/3/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

جايز مش طايق العالم النهاردة ومستغرب الناس حبة وجايز العالم والناس برضة مش طايقينك.. ف كل الاحوال انتوا ملكوش الا بعض

برج الجوزاء عملياً 

( الشغل والمذاكرة والتخطيط لبكرة ):

خلص زعلك من الحياة وارجع تاني اديها بالروصية ف مناخيرها وعاندها وانبسط.. خد بالك انك النهاردة هتعمل حاجة بسيطة جدا بس ممكن تفرح ناس كتير بشدة.. ربنا يوفقك والله ف الخير دايما

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة تقدر تعمل اي نشاط محبب لنفسك وروحك ومنشط لدورتك الدموية براحتك

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والسمكمكية والترابية والهوائية..

إعرف حظك اليوم برج السرطان بالتفصيل الاثنين 5/3/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متعضش حد ف قفاه النهاردة وبلاش توحش وخليك نايس بليز.. كدة هتطفش البشر من معرفتك

برج السرطان عملياً 

( الشغل والمذاكرة والتخطيط لبكرة ):

مش كل حاجة ف الحياة لازم تمشي على مزاجك والا تتقمص وتاخد جنب.. كدة هتقضي حياتك مقموص ف ركن ضلمة وبراه الناس بتضحك وبتعاند ف نكد الحياة.. قوم انبسط وعاند معاهم قوم

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة ماشي حالها بس خد بالك من جيوبك الانفية ومن نكشة شعرك خصوصا ف الصباح الباكر او ساعات الليل المتأخرة

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والبرمائية والكتكوتية والترابية والنارية والبهوائية ( اخت الهوائية بس مبهوئة حبة).

إعرف حظك اليوم برج الأسد بالتفصيل الاثنين 5/3/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

النهاردة يا برج الأسد انتا تقريبا مش ف المود اوي بس قشطة.. على نص اليوم هتبتدي تفرفش وتنتعش وهيكون الصداع راح ودماغك رجعت للتراك الطبيعي بتاعها

برج الأسد عملياً 

( الشغل والمذاكرة والتخطيط لبكرة ):

واضح انك امبارح بالليل كنت خارب الدنيا غالبا.. ماعلينا.. من حقك تتدلع النهاردة ومتحسش بالذنب بسبب اي حاجة.. بلاش موجهات عدائية ملهاش لازمة مع اي حد مالوش لازمة وياريت برضة متصدمش حد برأيك فيه.. مش هتستفاد حاجة لو عملت كدة ولا هو برضة هيستفاد.. ف على ايه

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة تمشية وخروج وفسح وشوبينج (بسيط) مش مكلف

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والكرِيبّية والإستحواذية والهوائية والنارية..

إعرف حظك اليوم برج العذراء بالتفصيل الاثنين 5/3/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج تدلع اللي بيحبك عشان يفضل يحبك والدلع طريقه السهل معروف طبعا.. فلوس ف ظرف شيك كدة وكلمتين حلوين بيحلوا اي حاجة عاطفية اليومين دول.. المهم تعد الفلوس قدام حبيبك بحب.. مش بكيد أو صُرم خالص

برج العذراء عملياً 

( الشغل والمذاكرة والتخطيط لبكرة ):

إجمد وتماسك ومتخافش من اي حاجة.. انتا تقدر تخوف الخوف ذات نفسه لو حبيت.. ركز بس كويس واعمل اللي عليك بنفس راضية ومطمئنة.. مش اكتر

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها.. في شوية توتر بس واحتمال صداع او وجع ف الرقبة.. حاجات كلها يحلها انك تاكل كويس وتقعد بشكل كويس وتفرد ضهرك وانتا قاعد بشكل كويس برضة ياريت

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والترابية والنارية والترابية والبرمائية..

إعرف حظك اليوم برج الميزان بالتفصيل الاثنين 5/3/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج تنظيم وتستيف للتفاصيل اللي متحوشة جواك النهاردة.. وحاول متسرحش بالليل بخيالك لوحدك.. بلاش

برج الميزان عملياً 

( الشغل والمذاكرة والتخطيط لبكرة ):

بالهداوة كدة وواحدة واحدة كل حاجة هتبقى كويسة ان شاء الله.. مترغيش كتير بس ف اي حاجة ملكش فيها او متخصكش.. بلاش

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة تمام وتقدر تقوم او تتمشى او تنام.. براحتك

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والبربئية والترابية والهوائية..

إعرف حظك اليوم برج العقرب بالتفصيل الاثنين 5/3/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

طول مانتا بتمثل العقل ربنا هيكرمك ان شاء الله.. خصوصا وان العالم مش محتاج منك اكتر من انك تبقى هادي وف حالك.. مش اكتر

برج العقرب عملياً 

( الشغل والمذاكرة والتخطيط لبكرة ):

انتا مش مدير حد الا نفسك.. فوق للموضوع دة النهاردة وصحصحله كويس جدا

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة تبتدي تتحرك ف الشمس حبة وتقف ف البلكونة تتفرج على الناس وانتا بتشرب شاي بلمون او حلبة.. اللي يعجبك

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والكهربائية والبرطمانية والكهرمانية والترابية والنارية..

إعرف حظك اليوم برج القوس بالتفصيل الاثنين 5/3/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

كل شيء مستقر وهادئ على الجبهة القلبية وان كان في اهتمام لازم تهتمه باللي بتحبه وسريعا ولو ف مكالمة ولا حاجة.. لازم تشكره انه واقف جنبك وانه موجود النهاردة.. دة مهم جدا ومتنساش تعمله

برج القوس عملياً 

( الشغل والمذاكرة والتخطيط لبكرة ):

ركز ف انك تبين الوانك الحقيقة للحياة النهاردة وفكك من اي صراع ايا كان.. انتا مش فاضي لصراعات عموما وان كانت مغرية عشان انتا بتحب ترد على كلمة وحرف بيتقالك او بتتخيل حتى انه بيتقالك من حد تاني سواء كان هجوم او انتقاد او تعليق او مجرد كلام انتا مختلف معاه..عموما.. وراك ابداع لازم يبان وعلامة لازم تعلمها على وش الدنيا بحضورك وبأفعالك.. مش بكلامك ابدا.. بأفعالك وبس

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها وان كنت محتاج لمساج عاجل

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والهوائية والترابية والبرمائية والمائية

إعرف حظك اليوم برج الجدي بالتفصيل الاثنين 5/3/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

شياكة فتاكة واناقة وجاذبية مستحية.. واضح انك النهاردة هتتحب او بتفكر ف الموضوع بشكل جدي.. ع البركة يابرنس

برج الجدي عملياً 

( الشغل والمذاكرة والتخطيط لبكرة ):

معنوياتك محتاجة شوية تشجيع وتبقى ف السما رغم الصعاب والمشكلات والعوائق الخارجية والداخلية.. عموما كل حاجة هتبقى النهاردة جميلة وناجحة ان شاء الله لو تفاءلت حبة ومخوفتش من المواجهة.. خلي بالك من العربيات بس وانتا بتعدي الشارع مش اكتر

برج الجدي صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة نفس تمشية امبارح مع نفس مشروبات امبارح برضة

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والكشرية والترابية والمائية والهوائية والنارية..

إعرف حظك اليوم برج الدلو بالتفصيل الاثنين 5/3/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

في انتعاشة عابرة للقارات مع غزل محلي وفي احتمال لكراش او شيء من هذا القبيل.. ف كل الاحوال انتا مبسوط وبتداري دة عشان انبساطك ميتنظرش او يتحسد.. تصرف ذكي طبعا مفيش كلام.. زقطط وانبسط براحتك يامعلم.. دة حقك

برج الدلو عملياً 

( الشغل والمذاكرة والتخطيط لبكرة ):

حاول تتعالى على الصغائر النهاردة وتركز ف الحاجات الكبيرة المهمة بالنسبالك انتا مش المهمة بالنسبة للناس.. وخد بالك انك هتنجح قريب ان شاء الله.. متسرحش بس خالص ورا اي احزان عابرة.. مش مستاهلة اهتمامك اساسا لا هي ولا فكرة الحزن ف حد ذاتها

برج الدلو صحياً 

( نفسيا وجسمانيا وكل مايخص طاسة المزاج ):

صحتك اليوم في تحسن ودة جميل.. لسة في عك ف الاكل بس على خفيف.. ودة برضة جميل

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والكتكوتية والبرمائية والكبريتية والجنية والنارية والترابية والهوائية والخيالية..

إعرف حظك اليوم برج الحوت بالتفصيل الاثنين 5/3/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

هتحتاج نص ساعة هدوء وتأمل او ما تصحى او ف نص اليوم حسب ماتحب وتختار وتستريح.. المهم تتأمل ف الفراغ حبة بدون التفكير ف اي مخاوف او مشاكل

برج الحوت عملياً 

( الشغل والمذاكرة والتخطيط لبكرة ):

متسيبش ودانك لأي حد بيحب الرغي.. الرغايين دول بيملوا مساحات ف عقلك على الفاضي.. مالهمش لازمة النهاردة.. الهدوء النهادرة كنز متفرطش فيه خالص طالما متاح

برج الحوت صحياً 

( نفسيا وجسمانيا وكل مايخص طاسة المزاج ):

صحيا انتا تمام بس ياريت تهتم حبة بشعرك وسنانك واستعد للدايت عشان الشتا شكله ماشي خلاص

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والكتكوتية والمستحية والنارية والترابية والهوائية