إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

إزاي بتنصحي الناس ف الحب وإنتي عمرك ما حبيتي أو إتحبيتي غير بشكل نظري بس؟.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الأربعاء 7/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

نشاط وزهزهة مفاجئة برغم النكد اللي جواك وبتحاول تداريه طول الوقت.. تصرف يستاهل الاعجاب والتقدير بصراحة..

برج الحمل عملياً

( الشغل والمذاكرة والتخطيط لبكرة ):

صلابة نادرة وتفكير سليم طبعا لما تعاند ف احزان الحياة.. احسن من الاستسلام مهما كان الموقف ومهما كانت الظروف..

برج الحمل صحياً

( نفسيا وجسمانيا وكل مايخص طاسة المزاج ):

صحيا انتا تمام.. جايز عندك برد بس انتا كتكوت الابراج النهاردة بلا منازع يامعلم..

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والنارية والهوائية..

إعرف حظك اليوم برج الثور بالتفصيل الأربعاء 7/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

جاهز للشحن بالطاقة الإيجابية وجاهز للإنبساط والشخلعة والدلع بس ناقصك ف الاغلب مجرد قرار منك بينك وبين نفسك.. مش اكتر

برج الثور عملياً

( الشغل والمذاكرة والتخطيط لبكرة ): 

حاول متسيبش للحياة فرصة انها تبقى هي اللي بتقرر اذا كنت هتبقى النهادرة مبسوط ولا لأأ.. المفروض ان دة يبقى قرارك انتا مش قرارها خالص..

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة انتا زي الفل.. انبسط براحتك وبمزاجك..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والترابية والمائية والنارية والبرمائية..

إعرف حظك اليوم برج الجوزاء بالتفصيل الأربعاء 7/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بإبتسامة واحدة ممكن تحل كل مشاكل الكون عند شخص تاني.. بمجرد ابتسامة بس مش أكتر.. حتى لو بتبتسم ف خياله وبس.. كم انت محظوظ ومتعرفش.. كم انت محظوظ..

برج الجوزاء عملياً 

( الشغل والمذاكرة والتخطيط لبكرة ):

محتاج تركز ف اللي بتعمله بشكل جدي حبة وتبطل هزار ودلع وتحط لنفسك خطة محكومة بوقت وتنفيذ صارم شوية عشان تنجح وتحقق اللي انتا عاوزه.. الشحتفة والتفكير الكتير مش هينفعوك خالص خد بالك..

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة هتحتاج تاخد شاور طويل بمية سخنة حبة يفك عضلات جسمك

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والنارية والترابية والهوائية..

إعرف حظك اليوم برج السرطان بالتفصيل الأربعاء 7/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متسرحش ورا الإشاعات ولا ورا كلام النميمة عشان كل اللي هيحصل هو انك هتقلق زيادة وبس..

برج السرطان عملياً 

( الشغل والمذاكرة والتخطيط لبكرة ):

القلق مش حل لأي مشكلة على الإطلاق.. بالعكس.. مع الوقت بيتحول لمشكلة ف حد ذاته وانتا مش ناقص مشاكل اساسا يامعلم..

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة محتاجة شوية اهتمام مرحلي عابر.. سقي رجليك ف مية سخنة وشاور جيل نص ساعة بعد ما تتمشى لمدة ساعة مثلا..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والكتكوتية والبرمائية والترابية والهوائية..

إعرف حظك اليوم برج الأسد بالتفصيل الأربعاء 7/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

قدامك تحب وتتحب بس انتا مش فاضي غالبا او مش مهتم او مستني حاجة افضل..

برج الأسد عملياً 

( الشغل والمذاكرة والتخطيط لبكرة ):

تعاليك على حالة الصراع مبينفيش انك بالفطرة وبالسليقة طرف اساسي فيه مهما انكرت او عملت.. دة قدرك ومسئوليتك ولازم تواجه بشجاعة وثبات او تكبر دماغك من الكلام دة كله وتخش تنام وانتا متطمن ان الكوكب دة ممنوش لا فايدة ولا رجا مهما عملت او غيرك عمل

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة مفرهدة حبة من التقلب المزاجي اللي عند الجو والطقس اليومين دول.. معلش.. يومين بايخين ويعدوا..

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والهوائية والترابية..

إعرف حظك اليوم برج العذراء بالتفصيل الأربعاء 7/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

لو قلبت ف دماغك كويس ولو بصيت على حياتك كويس برضة أكيد هتلاقي حاجات كتير تفرحك وتروق بالك جنب الحاجات النكد اللي مضايقاك طول الوقت

برج العذراء عملياً 

( الشغل والمذاكرة والتخطيط لبكرة ):

لازم تحسم بينك وبين نفسك انتا حابب تحتفل ولا حابب تقعد ف الضلمة بتعد ف احزانك.. لازم تاخد قرار ف الموضوع دة بشكل سريع النهاردة لو سمحت..

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة زي الفل.. حاول بس تعلي مراكب نفسيتك شوية بدل الغرق الإختياري ف بحور النكد

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والترابية والنارية والهوائية..

إعرف حظك اليوم برج الميزان بالتفصيل الأربعاء 7/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

طرطوفة مناخيرك جميلة النهاردة وبتلمع ماشاء الله.. خد بالك من اللمعة دي واهتم بيها طول اليوم عشان هي دي الحاجة الوحيدة اللي ممكن تحارب بيها العكوسات بشكل ناجح الليلة..

برج الميزان عملياً 

( الشغل والمذاكرة والتخطيط لبكرة ):

حاول متتغرش بجمالك على قلوب البشر.. خليك متواضع.. مش انتا بس اللي حلو فى الكوكب دة على فكرة

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها بس ياريت جمالك يبقى مدعوم بنفسية قوية ومش مستحية ومبتخافش ولا تتكسف من الانبساط عشان عارفة انه من حقها تبقى سعيدة ومنشكة وبتضحك بصوت عالي..

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والترابية والنارية والبرمائية..

إعرف حظك اليوم برج العقرب بالتفصيل الأربعاء 7/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

جميلف وأمور بزيادة النهاردة ماشاء الله.. واضح انك منتعش وفريش وكتكوت ف نفسك لسببا ما خفي.. بس مسيرنا نعرفه.. هتروح مننا فين.. مسيرنا نعرف كل حاجة انتا مخبيها..

برج العقرب عملياً 

( الشغل والمذاكرة والتخطيط لبكرة ):

خد بالك عشان اوقات تدخلك البسيط بيسفر عن كوارث مش بسيطة اطلاقا.. فكر النهاردة كويس اوي قبل ماتحط مناخيرك ف اي موضوع يخص غيرك..

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة كويسة ومتألقة وغالبا دة سر جمالك الزايد النهاردة.. خد بالك بس من شعرك عشان التراب ميبوظوش.. مش أكتر..

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والبرطمانية والترابية والهوائية والهوائية والنارية..

إعرف حظك اليوم برج القوس بالتفصيل الأربعاء 7/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

لما تعمل مصيبة من مصايبك المعتادة حاول متبصش وراك وفكر ف حاجة واحدة بس ساعتها.. انك تجري ومتتكشفش.. مش أكتر..

برج القوس عملياً 

( الشغل والمذاكرة والتخطيط لبكرة ):

هتعمل مصيبة من مصايبك المعتادة اللي بتعملها كل فترة ف السر.. موفق يامعلم..

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة كويسة بس ياريت متفرحش بيها اوي وتتشجع بالغلط ترازي ف اللي حواليك.. بلاش عشان هترجع تندم..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والمائية والهوائية والنارية..

إعرف حظك اليوم برج الجدي بالتفصيل الأربعاء 7/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حتة جديدة من بازل حياتك هتكمل النهاردة وهتحتاج تبعد حبة وتبقى مع نفسك عشان تعرف تشوف الصورة كاملة من بعيد بحيث تعرف ايه هي الخطوة المنطقية اللي جاية بشكل صحيح..

برج الجدي عملياً 

( الشغل والمذاكرة والتخطيط لبكرة ):

هتنجح وهتتألق متقلقش.. انتا شاطر ولما بتركز بتسوي هوايل.. ثق ف نفسك بس وابعد عن الغرور وطور من نفسك ف هدوء وإعمل اللي عليك وبس

برج الجدي صحياً 

( نفسيا وجسمانيا وكل مايخص طاسة المزاج ):

صحتك كويسة وزي الفل.. متتخدعش ف حر النهار عشان متلبسشي برد الليل على غفلة وانتا مش مستعد.. بلاش

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والنارية والبرمائية

إعرف حظك اليوم برج الدلو بالتفصيل الأربعاء 7/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

الحب اللي بتدور عليه موجود بس غالبا مبيدورش عليك.. كبر دماغك وإحضن قلبك ومتديهوش لحد ممكن يلعب بيه وبعد كدة يرميه ويكسره.

برج الدلو عملياً 

( الشغل والمذاكرة والتخطيط لبكرة ):

بزيادة شروخ وكسور لحد كدة ياعم الحاج.. كفاية.. روق دماغك وفضيها أحسن بلا وجع دماغ..

برج الدلو صحياً 

( نفسيا وجسمانيا وكل مايخص طاسة المزاج ):

صحتك تمام النهاردة.. اشرب سوائل كتير بس مش أكتر..

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والمائية والهوائية والبرمائية..

إعرف حظك اليوم برج الحوت بالتفصيل الأربعاء 7/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

غالبا هتسافر قريب ف خيالك وهتنبسط.. حاول بس متخليش طيبتك الزيادة المفرطة تزقك تعزم حد على السفرية الحلوة دي معاك وهو ميستاهلش.. بلاش

برج الحوت عملياً 

( الشغل والمذاكرة والتخطيط لبكرة ):

إحتياجك للحب والونس ممكن يعملك مشاكل خلي بالك..

برج الحوت صحياً 

( نفسيا وجسمانيا وكل مايخص طاسة المزاج ):

صحيا النهاردة المود لطيف وكيرف النشاط ماشي حاله خصوصا وان اليوم يصلح بشدة للحب.. حاول بس تفرد ضهرك كويس وانتا قاعد مش أكتر..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والنارية والهوائية والترابية.