هل عانيت في يوم من الأيام من الشروط القاسية التي تفرضها البنوك على عمليات الاقتراض؟ ألا ترى أنه قد حان الوقت لأن يكون لك ثروة وأن تكون من أصحاب النفوذ والجاه..إذا كنت من الباحثين عن الثروة ولاتملك موارد ..أو تبغض التعامل مع شروط الاقتراض اللعينة.. فماذا لو لجأت لما يسمى بالتأجير التمويلي .. التأجير التمويلي هو إحدى المصطلحات المكلكعة التي تقزز النفس بمجرد الإطلاع عليه.. ولكن ماذا لو تنقلنا معا بين أساسيات ذلك المصطلح المجعلص.

التأجير التمويلي، هو ذلك المصطلح الذي يشير إلى شركة من الشركات اللي ربنا عطيها قررت تنفع الشركات الصغيرة وتسلفها وعشان الشركة الصغيرة تشتري مبنى جديد أو ماكينة معينه وده مش لله ...ده مقابل نسبه على أصل المبلغ بتأخدها الشركة اللي ربنا عطيها على فترة طويلة حسب اتفاق الطرفين".

طيب إيه هي شروط التأجير التمويلي.. التأجير التمويلي ليه شروط.. معلوم..ماهو مفيش حد بيرمي فلوسه في الأرض.. الشرط الأول أنك تشتري بالفلوس اللي هتوفرهالك الشركة الكبيرة معدات أو مقرات  مش تستخدمها في إنك تحوشها لا سمح الله يعني القصد إنك تستثمرها.

الشرط الثاني، الشركة لازم تضمن حقوقها وده عن طريق أن الأصل اللي اشتريته سواء كان معدة أو مبنى هو الضمانة بس لازم يساوي قيمة المبلغ اللي مولاك بيه الشركة الكبيرة .. يعني متشتريش ليه مبني قيمته نصف مليون جنيه وأنت ساحب من الشركة مليون جنيه لأنك لما تقصر في الدفع هتسيب الأصل للشركة الكبيرة.

الشرط الثالث، لو أنت قصرت في الدفع يبقى هنا الشركة الكبيرة والمموله  لها الحل في أن تتملك الأصل.

الشرط الرابع، بيلزم الشركة الكبيرة أنها تملك العقار للمستثمر الصغير بمجرد انتهاء، مدة التعاقد والتزامك بسداد الأقساط.

 الشرط الخامس، وده بيشترط أن لا تقل مدة العقد عن 75% من العمر الافتراضي للأصل المؤجر.

أما السادس بيقول أن العقد المبرم بين الطرفين غير قابل للإلغاء، وان تغطي دفعات مقابل التأجير القيمة السوقية للأصل عند إبرام العقد بالإضافة لهامش ربح محدد، أو أن لا تقل التغطية عن 90% من القيمة السوقية عند توقيع العقد.

والشرط السابع بيقول أن ملكية الأصل المؤجر تبقى وحتى نهاية العقد باسم المؤجر اللي هي الشركة الكبيرة وفي أخر المدة تملكها للمتعاقد.

خد بالك بقي يا مستثمر باعتبار ما سيكون يعني.. الشركات اللي بتتعامل معاها وكمان البنوك - أه ما البنوك بتشتغل برده في التأجير التمويلي- لازم تكون مضمونه وكبيرة، يعني تروح لشركة عليها العين وعشان تمولك مش تختار شركة كحيانه.

أه كنت هنسى أقولك التأجير التمويل ليه شوية مميزات أهمها انه بيساعدك وبأقل تكلفة وبتمويل مضمون طالما عندك طموح أنك تشتغل .. بيوفر لك سيولة اكبر يمكن استخدامها في أوجه النشاط الأخرى وبصورة خاصة تمويل دورة رأس المال العامل.. يسهم في زيادة القدرة التنافسية للمنتجات لان هيكون عندي شركات كتيرة صغيره هتحاول تتميز وعشان تطلع البضاعة اللي عليها العين.