قال الإعلامي عمرو الليثى، إن "محافظ السويس خرج علينا بتصريحات خطيرة وقال أصبحنا بنصدر الكلاب.. ومحافظته بقت مفيش فيها ولا كلب ضال، وإنه شكل مجموعات عمل علشان تصطاد كلاب الشوراع وتصدرها للدول اللي بتاكل الكلاب.. والغريبة إنه بعد ما التصريحات دي انتشرت.. كدب المحافظ الموضوع ونفى بس الفيديوهات كشفت الحقيقة".

وتابع الليثي خلال تقديم برنامجه "واحد من الناس" عبر شاشة الحياة، مساء الجمعة، قائلا "أنا بقيت محتار أصدق مين وأكدب مين، وبقيت طول الوقت بردد المثل اسمع كلامك أصدقك أشوف أمورك أستعجب... الحكومة ومسؤلوها هايجننونا".

وأشار إلى أن محافظ أسوان خرج سابقاً ليؤكد أن مشاكل المحافظة كلها في طريقها للحل، وتابع قائلا "لكن الميه اللي بتكدب الغطاس كشفت الحقيقة وغرقت أراضي قرية بلانه والقرى المجاورة لها والمقابر بعد ما انهار مصرف بلانه ودخلت ميه المجاري على المزارع... يارئيس الحكومة طب الناس عايشة ومستحملة إنما الأموات ذنبهم إيه".

وعن عمال النقل العام بالإسكندرية، قال "طلعوا أكثر شهامة من الحكومة ومسؤوليها... عمال النقل أضربوا يومين بعد إيقاف صرف مكافآتهم ولما مشكلتهم اتحلت ورجعوا للشغل قرروا إنهم يقدموا اعتذار للمواطنين ويخرجوا كلهم في يوم عمل مجاني تعويضا للمواطنين، وكمان قرروا إن كل المواصلات في اليوم ده هاتكون مجانية لتعويض اللي اتضررمن تعطل المواصلات... ما طلعتش منك يا حكومة".