ينشر "دوت مصر" الكلمة الكاملة للرئيس عبد الفتاح السيسي في الجلسة الختامية للمؤتمر الاقتصادي الذي انطلق صباح الجمعة الماضي بمدينة شرم الشيخ، ويختتم أعماله اليوم الأحد.

"نص الكلمة"

"تحيا مصر ، اسمحولي مش هتكلم غير لما يكون في مجموعة من الشباب اللي شاركوا في العمل ده، بسم الله الرحمن الرحيم الحقيقة هم مجهزين كلمة كالعادة بس أنا عاوز أتكلم معاكوا وفي البداية بوجه التحية ليكم لحضوركم هنا شكرا جزيلا، أنا عاوز أكلمهم على بلادي مصر علشان في ناس افتكرت أن بلادي ماتت، لأ مصر دي بلد ربنا خلقها علشان تعيش.

كان من 7000 سنة كانت مصر موجودة وعلمت الناس كلها والحضارة وكل ده في كتب التاريخ تعالوا نتكلم عن 150 سنة بس كان في بعثة ودولة عظيم سنة 1862 كانت اليابان حبت تشفنا إحنا مين وإزاي، وسنة 1962 جت دولة عظيم تانية كوريا علشان تشوفنا، أنا مش هتكلم أنا بس بقول وبفكر نفسي والمصريين والعالم إن الدولة دي بيتستيقظ الآن".

وتعالت الهتافات "تحيا مصر تحيا السييسي" ليرد "تحيا مصر، تحيا مصر محدش تاني ، مصر بشعبها مصر.. بشبعها مصر، بشبابها مصر اللي فيها أكثر من 35 مليون شاب وشابة، طب أقول أكتر من 40 إلى 65 مليون إنسان، فهي مصر بشبها هي اللي علمت الدنيا وإن شاء الله هتعلمها مرة تانية وعلشان كده بقولك مصر مش هتموت هتستيقظ".

واستكمل الرئيس حديثه، قائلا "كنت بنتكلم مع شركة هتعمل مشروع العاصمة الجديدة في الفترة الزمينة اللي محددة، أن الفكرة ليه بنقول مش هينفع علشان هنكون زدنا 26 مليون إنسان فالعاصمة الجديد مش هتاخد غير 6 ملايين لذلك هتلاقي كلامي معه الشركات إنى مستعجل علشان إحنا متأخرين، والجري مش هيكفي محتاجين نتحرك أكتر من كدة.

لما كنت مع شركة "سيمنس "ممكن تعمل محطة للطاقة من 30 إلى 36 شهرا قولته ممكن في سنة ونص قالي آه ممكن بس هيكون تحدي طب أنا ليه بقول كده علشان لو أنتوا عاوزين تساهموا في البلد بجد يبقى الشغل ليل نهار والتكلفة المادية راعوننا شوية، أنت ممكن تقصد تعصر التكلفة وقلل هامش الربح لأنى محتاج منك ده دلوقتي، ولما قولتله ممكن نخفض التكلفة المالية قالى ممكن أنا بقولكم ليه علشان إحنا عاوزين نبني بلدنا ولذلك ممكن تعمل أي حاجة مشروعه".

"مش ممكن هجيب الناس كلها عندك، وقولتله ممكن المحطة تكون 3 قالي آه ممكن 3 إحنا بنتكلم عن 13 ألف و200 ميجاوات كهرباء من شركة واحدة ولازم يضخوا في سنة ونص وعلشان المستثمر يلاقي الطاقة، والشعب المصري يكون محتاج، وكما شركة تانية "إليكتريك" قالي هنرفع كفاءة المحطات علشان نزود الطاقة أنا بقول علشان بلدنا وعلشان المستثمرين يعرفوا ويساعدونا، قولتله ممكن يكون 8 شهور قالي ممكن قالي مش هنام قولته معلش علشان عاوزين نخلص ده وقولته علشان ربنا كده لحد ما وصل لرقم قالي كده خلاص يعنى قولته معلش طب شيل الـ100 مليون دول وشالهم إحنا بنصفق لهم الصراحة.

خلوا بالكم الشركتين جايبين التمويل من بلادهم، تقريبا المحطة الواحدة 2 مليار يورو يعنى الـ6 مليار دول من الدولة الألمانية، ومهم أوي إنكم تعرفوا إن دول كتير ممكن تعمله ده معانا تجيب التمويل لشركاتهم والشركات تعمل ده معانا.

 وقولته الفائدة بكام وكانت الفائدة عظيمة أنا بقول علشان دي حقوق ناس ولازم نقول طب فترة السماح أد إيه قالي 7 سنوات قولتله نخليها 12، اوعوا تكونوا مفكرين إن مصر مش محتاجة أقل من 200 إلى 300 مليار دولار علشان يكون في أمل للشعب المصري في عيشه بجد  لسه وعلشان كدة بدعوا الدول للمشاركة بالطريقة دي إحنا التزامنا كمصريين بالسداد أمر لا يقبل الشك".

وأضاف "أنا جاتلي دعوة من المستشارة الألمانية وأنا كنت بتطلع لهذه الزيارة لأني بحترم الدولة وتطورها شكرا لألمانية، إحنا كلنا موجودين وعاوزأطلب منهم شكر لصاحب هذه الدعوة هو مش موجود معانا بس صاحب الفكرة هو المغفور له بإذن الله الملك عبد الله عاوز أقول إن كتير مننا مممكن نقول إنه ساب فكرة تعيش كتير.

 الفكرة تدعونا لأن نعمل هذا اللقاء كل سنة مرة بس مش لينا إحنا بس هيكون تجمع اقتصادي لكل الدول ذو الظروف الصعبة والدعوة موصولة لكل الشركات أن يكون معانا السنة الجاية في نفس الموعد، طب هو إحنا لما نيجي السنة الجاية هنشوف شرم الشيخ كدة في سنة هتكون أجمل  تعمل مجهود عظيم بس السنة الجاية هنيجى نشوف الكباري والطرق وحجات كتير، المؤتمر إن شاء الله هيكون تجمع سنوى مش بس لينا ولكن لدول كتير. 

طالما أنت بتسألني إيه اللي بيتعمل اللي بيتعمل كتير بس اللي مطلوب أكبر فلسة الأمر مش باين إحنا بنتكلم عن حاجات كتير 4 الملايين فدان ومحافظات كتير ومدينة العالمين بس الكلام ده عاوز جهد كبير أوي وفلوس كتير أوي، أنا بشكركم جميعا لكل اللي حضر وكل من ساهم في إنجاح هذا المؤتمر، أنتوا ما تعرفوش أنتوا فرحتوا الشعب المصري إزاى أنا معرفش الترجمة واصلة ولا لأ، المؤتمر كان المصريين متابعينه لحظة بلحظة لما حبوا يغيروا في ثورة 25 يناير.

ولما حبوا يغيروا في 30-6 مكنش حد ممكن يقدر يواجه حد بس هم قالوا هنغير هنغير غيروا ولو حبوا يغيروا تاني هيغيروا، صحيح لو عاوزين يغيروا تاني هيغيروا بس أنا والله لا يمكن هتنسنى لما يحصل ده أبدا أبدا، خلوا بالكم ده الشعب المصري عظيم اللي أنا بحبه واحترمه ده مش كلام حب البلد مش كلام.

إحنا عاوزين نحب بلدنا وعاوزين نخلي بلدنا أد الدنيا ومرة تانية بقدم الشكر لكل الناس اللي حضروا والشركات التي تعاقدت وكل التحية والسلام ليكوا ومشاركتكم ولسة مشاركتهم مستمرة والعمل موصول، الكلمة دي للمصريين الناس جت من كل المكان علشانكم ورد الفعل للمساعدة مصر عاوزين نشتغل معاهم ومع بعضنا البعض أد اللي بنعمله مئات المرات بل آلالف المرات، ويجب التحرك مع مصر بكل قوة ومحدش يستهتر بقوة وبقدم الشكر والتحية تاني باسمي وباسم الشعب المصري".