ألقى الرئيس عبدالفتاح السيسي، ظهر اليوم الأحد، كلمة أمام الجلسة الختامية لمؤتمر القمة الاقتصادية بشرم الشيخ، استعرض خلالها ما شهده المؤتمر من اتفاقات ومذكرات تفاهم للتعاون بين مصر والعديد من الشركات العالمية، وما تحقق خلال المؤتمر من تدفق للاستثمارات الأجنبية.

- الرئيس يبدأ حديثه في الجلسة الختامية بـ "تحيا مصر" وتصفيق حار من الحضور.

- السيسي: بسم الله الرحمن الرحيم مش هتكلم إلا بوجود مجموعة من الشباب المشاركين في المؤتمر.

- مجموعة من الشباب تصعد إلى المنصة وتلتقط "سيلفي" مع الرئيس.

- السيسي: مجهزين كلمة كالعادة، لكني عايز أقولكم كلمة كنت محضرها مع نفسي.

- السيسي: عايز أكلمكم عن بلادي مصر هناك من افتكر أن بلادي ماتت، وهي بلد خلقت لتعيش.

- السيسي: من 7000 سنة مصر علمت الدنيا كلها وقدمت الحضارة للعالم كله.

- السيسي: من 150 سنة كانت فيه بعثة سنة 1862، وكانت من دولة اليابان.. جت تشوف إحنا عاملين إزاي.

- السيسي: وفي 1962 أرسلت كوريا بعثة عشان تشوف.. يا ترى مصر عاملة إزاي.

- الحضور في المؤتمر الاقتصادي يهتفون "تحيا مصر يحيا السيسي"، والرئيس يرد: "تحيا مصر محدش تاني".

- السيسي: مصر بشعبها.. مصر بشبابها.. مصر ما بتموتش.

- السيسي: المرحلة الأولى للعاصمة الجديدة كانت ستستغرق 10 سنين قلت لهم "مش هينفع" هنكون زدنا 26 مليون شخص.

- السيسي: العاصمة الجديدة وفقا للتخطيط سعتها من 5 لـ 6 مليون نسمة.

- السيسي: كلمتي مع كل الشركات دائما "أنا مستعجل.. إحنا متاخرين أوي.. الجري لن يكفي".

- السيسي: تحدثت مع مسؤول بشركة "سيمنز" العالمية لتقليل فترة إنشاء محطة كهرباء من 36 شهر إلى 18 شهرا فقط.

- السيسي: قلت للمستثمرين إذا كنتم تريدون المساهمة الجادة لبناء البلد لا بد من العمل ليل ونهار، وفيما يخص التكلفة المالية قلت لهم "راعونا بجد".

- السيسي: قلت للمستثمرين "قلل هامش الربح .. محتاج ده منك دلوقتي".

- السيسي: عندما تحدثت مع سيمنز على التكلفة المالية طلبت تخفيضها ووافقوا.

- السيسي: عايزين نبني بلدنا وندي أمل حقيقي للناس.. يجب أن نقوم بكل ما هو مشروع لتنفيذ ذلك.

- السيسي: وزير الكهرباء لم يصدق رقم التكلفة الذي طرحته سيمنز وقال لي "خلاص هجيب كل الناس عندك".

- السيسي: سيمنز عملت خاطر لمصر.

- السيسي: الشعب المصري لن يظل يعاني من نقص الكهرباء.

-  السيسي: أشكر شركة جينرال إليكتريك التي ترفع كفاءة المحطات.

- السيسي: بقول الكلام ده عشان أوريكوا إحنا مهتمين إزاي ببلدنا.

- السيسي: لرفع كفاءه محطات الكهرباء لتزويدها 750 ميجا طالبت جنرال إلكتريك بتخفيض المدة لـ8 شهور ووافقوا وقالوا ممكن.

- السيسي: رئيس شركة جنرال اإكتريك قال لي "لن ننام" قلتله "معلش".

- السيسي: طلبت أن تكونه التكلفة المالية قليلة "عشان خاطر ربنا".

- السيسي: قلت لرئيس شركة جنرال إلكتريك شيل 100 مليون من التكلفة وشالهم.

- السيسي: نتحدث للمحطة الواحدة تقريبا 2 مليار يورو أي 6 مليار يورو تمويل من الدولة الألمانية.

- السيسي: مهم إنكوا تعرفوا إن التمويل يمكن يكون عن طريق الدولة لشركاتها.

- السيسي: أنا بقول عشان دي حقوق ناس لما حد يقف جنبنا مننساش.

- السيسي: فترة السماح كانت 7 سنسن وطلبت تكون 12 سنة ورئيس الشركة قال لي: "إشمعنا دي اللي بتطولها".

- السيسي: مصر تحتاج من 200 إلى 300 مليار دولار لكي تنهض، ويكون فيه أمل حقيقى لـ 20 مليون ليعيشوا بجد.

- السيسي: التزامتنا بالسداد أمر لا يقبل الشك.

- السيسي: تليقت دعوة من المستشارة الألمانية أنجيلا ميركل وكنت أتطلع لزيارة هذه الدولة التي أحترم كفاحها وانضباطها.

- السيسي: لابد أن نؤكد أن هذا اللقاء سيكون كل سنة مرة مش لينا إحنا بس، لكن تجمع اقتصادي للدول التي تمر بظروف صعبة.

- السيسي: الدعوة موصلة لجميع الحضور والمستثمرين للتواجد العام القادم في معاد قريب من نفس المعاد.

- السيسي: نتمنى أن تكون كل الدول الافريقية موجودة معانا السنة الجاية.

- السيسي: هو إحنا السنة الجاية هنشوف شرم الشيخ كده؟! شرم الشيخ جميلة جدا والجهد المبذول واضح ولكن لسة شوية السنة الجاية نيجي نلاقي شئ مختلف خالص.

- السيسي: اللى بيتعمل كتير ولكن المطلوب لسه أكتر.

- السيسي: عايزين نعمل محافظات جديدة.. هنعمل محافظات جديدة.

- السيسي: إنتم متعرفوش أنتم فرحتوا الشعب المصري إزاي.

- السيسي: المصريين كانوا متابعين المؤتمر لحظة بلحظة.

- السيسي: لما المصريين حبوا يغيروا في 25 يناير غيروا وفي 30 يونيو غيروا.

- السيسي: في 30 يونيو لم يكن من يتصور أن هناك من يقدر يواجه "حد".. لكن المصريين قالوا هنغير هنغير.

- السيسي: لو المصريين عايزين يغيروا تاني هيغيروا.. لكن والله مش هستناهم يغيروا.

- السيسي: خلي بالكم الشعب المصري العظيم أنا بحترمه وبحبه وبحافظ عليه.. "مش كلام".

- السيسي: عايزين نخلي بلدنا قد الدنيا.

- السيسي: أوجه الشكر والتقدير مرة أخرى لكل الشركات ولكل التعاقدات التي تمت.

الرئيس يشكر الحضور ويؤكد أن العمل موصول.

- السيسي: هقول كلمة دلوقتي للمصريين.. الناس جت من كل مكان عشانكم... عايزين نشتغل معاهم ومع أنفسنا.. نشتغل قد اللي بنعمله آلاف المرات.

- السيسي: المؤتمر الاقتصادي ذراع مصر.. ننتظر أن يشتغل معه باقي الجسم بقوة.. اشتغل لأجل خاطر بلدك.

السيسي: محدش يستهتر بمصر.. أشكركم جميعا باسمي وباسم شعب مصر. 

وانطلق يوم الجمعة الماضي مؤتمر دعم وتنمية الاقتصاد المصري "مصر المستقبل" بمدينة شرم الشيخ، ويختتم أعماله اليوم الأحد، وتشارك به نحو 120 دولة ومنظمة دولية، و20 رئيس دولة، وعدد من الملوك والأمراء.

وتعول الحكومة على المؤتمر، في الترويج للاقتصاد المصري، الذي تدهورت أوضاعه في أعقاب ثورتين، كما تأمل الحكومة جذب استثمارات أجنبية مباشرة تتخطى حاجز الـ60 مليار دولار، لتحسين أوضاع البنية التحتية الاستثمارية في مصر.