تداول نشطاء "فيس بوك" أحدث تسريبات لقيادات بجماعة الإخوان، وهي عبارة عن تسجيل هاتفي دار بين أمين لجنة العلاقات الخارجية بحزب الحرية والعدالة المنحل، محمد سودان،  والقيادي بالجماعة، أحمد صقر، وجاء نص المكالمة كالتالي..

أحمد صقر: إزيك يا محمد بيه إزي معاليك، كيف أحوالك

محمد سودان: الحمد لله رب العالمين ربنا يخليك

صقر: أنا إمبارح كنت في البي بي سي، بالليل، وفي الحقيقة كنت لسه بكلم الأستاذ محمود الإبياري، على إن إحنا نتجاوز الخلافات القائمة، أنا علاقتي بيهم طيبة جدا، وهما كانوا قالولي على بعض الأمور هناك، وأنا كنت كلمت الأستاذ إبراهيم منير، وكنت حريص إني أتكلم في الموضوع ده، وتقريبا في سوء فهم

سودان: حضرتك بتتكلم على بي بي سي العربية؟

صقر: آه بي بي سي عربية وعارف اللي حصل معاك

سودان: أنا كنت مع بي بي سي إنجليزي إمبارح وأول إمبارح

صقر: أنا بتكلم على العربي لأنهم عملوا تصرف معاك، وأنا لومتهم عليه إنهم يدخلوك أثناء التقرير، ثم بعد كده يكلموك عن الموضوع، أنا بقولهم الناس زعلانة، قالولي إحنا اللي زعلانين، قلتلهم إنتم زعلانين ليه، هما تقريبا زعلانين من هاني الديب، وبيقولولي تطاول على المذيعة، وتطاول على الضيف اللي هوه مأمون فندي، وقاله القافلة تسير والكلاب تعوي، وسمعت إنهم جابوه مع الدكتور كمال الهلباوي، وقاله إنت راجل كبرت وخرفت، فالدكتور كمال قال إحنا مشكلتنا إن إحنا ماعرفناش نربيك إنت كويس، لكن واضح إن هاني بيشوط

سودان: هما عملوا فيا مقلب وبعد كده طلبوني، عدة مرات لكن أنا أعتذرت وقلتلهم وبعتلهم رسمي

صقر: أنا عارف إن الرسالة بتعتك وصلتلهم رسمي، ومحمد طه وأنا عارفين القصة كلها، وأنا في الحقيقة كنت لسه بكلم أستاذ محمود الإبياري، وبقوله بص أنا عايز أقولك حاجة، فكرة إن أقطع نافذة بهذا الاتساع وبهذه القوة وأنا حاسس أنه مش توجه عام الإدارة، إنما هما مجموعة الولاد المعدين هناك، تقريبا عشان كده بيحصل هذا اللغط، وأنا مؤمن إن في إنسان تقدر تحيده مش بالضرورة يكون معاك إنما تقدر تحيده، وأنا شايف إن ده قائم

سودان: حضرتك أنا الشكوى بتاعتي بفتح معاهم قناة، أنا بفتح معاهم حوار، ومحمد يوسف المذيع كلمني، وقالي غلطة غير مقصودة، قلتله لا ما أنا أكتشفت إن حصلت مع غيري، قبل كده فأكد تعمد منكم يعني المسالة مسألة سياسة.

صقر: بص لا لا معندهمش سياسة

سودان: حضرتك ما تمش الحوار، وكلمني بعد كده واحد اسمه هشام، على ما أظن، مخرج هناك أو كده بنحط النقط فوق الحروف

صقر: لا لا أنا عارفهم أصل أنا بتعامل معاهم بقالي 11 سنة، وأنا بقدملهم التقرير المالي وأنا علاقتى بيهم شخصية يعني أعرفهم وأعرف عائلاتهم وأولادهم وزوجاتهم، يعني علاقتي بيهم قوية جدا، وهما حكولي تفاصيل كتيرة جدا، لكن أنا أعلم إن ده مش التوجه العام للمحطة، لأن المحطة أولا اللي مسيطر عليها لبنايين، ومش فارق معاهم الشأن المصري، وبيحطوا الشأن المصري على مضض، هما عايزين يحطوا القضية اللبنانية كل يوم، والمجموعة المهيمنة، هما أحمد القاضي مدير البرامج، وهشام بدوي مدير الأخبار، وياسر برديسي التغطيات الخاصة، والثلاثة أصدقائي، وأتكلمت معاهم والشيء العجيب إن البرديسي أبوه إخواني

أنا قلتلهم إنتوا كده حتخلوا يقاطعوكوا قالولي لا مفيش حاجة اسمها مقاطعة، إحنا حنجيب حد من الصف الخامس من الصف السادس بتاعهم ونطلعه باسم الإخوان، قلتله لا دي مش أمانة يعني تجيبلي واحد من الشارع، وتقدمه على أنه إخواني، ويعرض وجهة نظره، وتقول ده الإخوان اللي قالوها، ده تدليس، ده مفهوم التدليس، قالي لا إحنا مش حنجيب واحد من الشارع، إحنا حنيجب عضو من الإخوان لأن قيادتهم كده، قلتله لا إنت عندك هنا في مكتب مركزي، لإن ديه جماعة ليها هيكل تنظيمي، إنت متقدرش تيجي من مكتب خلفي وتتعامل مع كل من هب ودب.