قال المخرج شريف عرفة، احنا بنتاثر بالمجتمع ولما بنعمل الفيلم لازم يلمس مع المجتمع، ولما عملنا "الجزيرة ٢" كان لازم وقتها، لانه هيلمس مع حال المجتمع من بعد الثورة، لكن حاليا مش هقدر أعمل "الجزيرة ٣" وممكن نتكلم عن حاجة متوقع تحصل في المستقبل، لكن مش دايما مؤكدة.

وأضاف شريف عرفة خلال ندوة تكريمه بمهرجان القاهرة السينمائي: تكريمي بجائزة تحمل اسم فاتن حمامة فخر ليا، وانه من مهرجان القاهرة شرف ليا.

وتابع: في مرة تلقيت اتصالا من فاتن حمامة، وده كان شئ جميل جدا بالنسبة ليا، وكانت تهنئني بفيلم "يا مهلبية" وقت عرضه في مهرجان القاهرة، وكانت فاتن حمامة ضمن أعضاء لجنة التحكيم، وعرفتني ان الفيلم مش هياخد جايزة لان لجنة التحكيم مش قادرة تفهم القفشات الكوميدية فيه، ولكن الفيلم عجبها وشكرتني عليه وطلبت مني اننا نشتغل سوا، وده كان شئ عظيم بالنسبة ليا.

ووجه المخرج الكبير الشكر إلى الفنانة ليلي علوى التي ساعدته في إنتاج فيلم يا مهلبية وأفلام أخرى لأنها كانت تؤمن به.

وعرض مهرجان القاهرة السينمائي ضمن برنامج تكريم المخرج شريف عرفة، عددا من أبرز أفلامه هي، "الإرهاب والكباب"، "طيور الظلام"، "سمع هس"، "اللعب مع الكبار"، كما يعرض فيلمه الأخير "الممر" في قسم بانوراما السينما المصرية.