زي ما في ناس بتستنى أفلام مارفل.. في ناس ناس تانية بتستنى افلام دي سي.. لكن بصراحة الشركة دي وأفلامها حظها مكعبل.. لأن تقريبا كل فيلم لازم تطلع إشاعة أو مشكلة تخلي الواحد يفكر مرتين قبل ما يدفع تمن التذكرة.. المرة دي الإشاعة بتضرب Justice League وبتقول إنه.. غير قابل للمشاهدة!

الإشاعة أو التقارير الفنية.. زي ما تحب.. بتقول إن الفيلم صعب أي حد يهضمه أو يتفرج عليه من غير ما يحس بخيبة الأمل.. لحد ما وصل المخرج الجديد جوس ويدون وقرر إعادة تصوير أجزاء من الفيلم.. بعد ما كان زاك سنايدر خلص تصويره أصلا.

والكلام على عهدة موقع "سكرين رانت" يعني موقع موثوق فيه.. لكن اللي هنلاحظه إن عندنا تقريبا نفس الشكاوي اللي أخدها قبل كدة فيلم "باتمان وسوبرمان" اللي أخرجه زاك سنايدر الأب الروحي لأفلام دي سي.. واللي طبعا أخرج فيلم Justice League أو معظمه قبل ما يقرر يستقيل من الحكاية كلها بسبب انتحار بنته.. دة موضوع تاني.

المهم.. جوس ويدون استلم الليلة وكان عنده شوية تعديلات وافكار عرضها على دي سي والشركة لقت إن كلامه مش بطال.. وعلى الأساس دة أخد 25 مليون دولار دفعة واحدة عشان يعمل إعادة تصوير لشوية مشاهد.

وهنا بدأ الكلام يكتر.. زاك سنايدر اللي أفلامه جد مفيهاش إفيه واحد ذهب مع الريح.. ودلوقتي عندنا جوس ويدون اللي عمل فيلم Avengers الجزء الأول والتاني وملاها نكت.

والكلام دلوقتي في المواقع الفنية إن نسخة Justice League بتاعة زاك سنايدر جد ضلمة ونكد.. ودلوقتي الفيلم بقى ألوان ومرح ومفرفش.

هل الموضوع دة حلو للجمهور؟

بالنسبة لفانز دي سي الموضوع لا يمكن يبقى أوكي.. عشان هما اتعودوا على نغمة جد شوية وفلتر غامق على الشاشة من ايام كريستوفر نولان ما عمل ثلاثية The Dark Knight.. وبعدها Man of steel وفي الأخر باتمان وسوبر مان وحتى Suicide Squad.. لكن دخول جوس ويدون بيخوف ناس كتير من إن دي سي زهقت من المنافسة مع مارفل وقررت تقلد الماركة المنتشرة في السوق .. نملى الفيلم نكت وألوان عشان نبقى زي أفلام مارفل المسيطرة من 2008.

الدليل على إن الفيلم بقى مرح هو إعلان الفيلم نفسه.. وأقصد هنا الإعلان التاني وهو الإعلان المرح اللي مليان انفجارات وإفيهات.

لو عجبك الموضوع دة وحابب تقرا وتشوف أكتر خش هنا

قط بلدي