دلع ودنك مع بلاي ليست عمرو دياب 

ودنك هي حلقة الوصل بينك وبين العالم.. يعني لازم تهتم بيها وتقدرها أكتر من كدة على فكرة وهي مطالبها سهلة وبسيطة.. يعني مش هتطلب منك تخرجها ولا تأكلها ف مطعم غالي كل اللي هي محتاجاه إنها تتسلطن وتسمع حاجات تنعشها وتفرفشها من فترة للتانية.. وبما إن مهمتنا هي إسعاد ودان كوكب الأرض.. ف قررنا نفضي نفسنا كل يوم حبة عشان بس ننقيلك الحاجات اللي تفرفشها وتنعشها..

وكل المزيكا الجميلة دي هتلاقوها بكل الأذواق والمقاسات ف أكتر من بلاي ليست ف قسم المزيكا عندنا.. وأكيد هتلاقي اللي يناسب ودنك ومزاجك

النهاردة هناخد ودانكم ف مشوار صغير لعالم الهضبة عمرو دياب.. هنرجع معاه بالزمن للبدايات وتحديدا لسنة 1990 وسنة 1991 إللى قدم فيهم عمرو دياب ألبومين من أجمل ألبوماته هما ألبوم متخافيش وألبوم حبيبي 

المميز ف حياة عمرو دياب ف الفترة دي بجانب شهرته ونجاحه الفني هي علاقتة بالفنانة شيرين رضا إللي إتجوزوا سنة 1990.. وكانت دي أول مرة يدخل فيها الهضية القفص الدهبي.. لكن للأسف الجواز مستمرش كتير وإنفصلوا وإللي فضل من العلاقة دي هي بنتهم نور.. 

وخلال فترة جوازهم كان مابينهم مشاريع فنيه مشتركة.. ودة لأن شيرين رضا ف الأصل كانت موديل للإعلانات والفيديو كليب.. عشان كدة لاقيناها بتظهر ف كليبات لعمرو دياب زي مثلا كليب "متخافيش".. إللى طلعت شيرين رضا ف برنامج صاحبة السعادة بتتكلم عنه وبتقول إنه كان متصور ف مطبخ بيتهم.. وإن مخرج الكليب عرض عليها تشارك فيه بالصدفة

بالرغم من أن علاقة عمرو دياب وشيرين رضا كانت مميزة وحلوة إلا أن الحياة بينهم مكنتش زي ما بتظهر على صفحات الجرايد والمجلات.. ودة يخلينا مننخدعش ديما ف السعادة إللي بنشوفها على وشوش المشاهير.. وعشان منقلبش الموضوع دراما اوي خلينا نركز ف الأغاني.. ف لو إنتا من هواة النوسالچيا وبتحب الفترة دي لعمرو دياب.. ف إحنا بنرشحلك تسمع أغاني مختافيش ونندم وإيه بس إللي رماك..إستمتعوا