حرصت الفنانة نشوى مصطفى على تعزية الشعب المصري في حادث رفح الأليم.

ونشرت نشوى صوره لأحد شهداء حادث اليوم في رفح وكتبت تعليق على الصورة قائلة:" الله اكبر، بطل وراجل وجدع ومش هايب الموت واقف قدام الموت بيقول مش حنفرط، الشهيد البطل ابن مصر استشهد علشان مايفرطش، فى الجنة ونعيمها ياحبيب مصر، ربنا يصبر قلب أمك".

وتابعت نشوى:" حد يصحى العيال المخنثين اللي نايمين فى بيوتهم اللي بيتريقوا على الجيش المصرى جيش الكحك والمكرونة يقول لهم قوموا اتعلموا الرجولة فيه شهدا النهارده وقفوا قدام الرصاص وقالوا مش بنفرط".

وأضافت:" الأمل في الأجيال الجديدة اللي اتولدوا في آخركام سنة سمعوا ولادكم آخر تسجيل صوتي للبطل الشهيد آخر كلامه قبل ما يموت بكام دقيقه، خليهم يحسوا الشجاعة في نبرة صوته والموت مستنيه بره جدران أوضة القيادة بينه وبين الموت أمتار، فهموهم إن فيه رجالة بيدافعوا عننا وبيضحوا بحياتهم فداء لتراب مصر وبحياتهم علشان نعيش، سيبكم من اللي مليانين انهزامية وإحباط وولولة زي النسوان دول للأسف الحوار معاهم تضييع وقت وطاقة، الله يسعد الأبطال بنولهم الشهادة، الله يصبر قلب امهاتكم وزوجاتكم وأبهاتكم، الله يحمي أطفالكم اللي اتيتموا بدري، إحنا اقزام وصغيرين قوي جنبكم، عاش الجيش المصري حامي الأرض والعرض، تحيا مصر".