18 إبريل 1930.. اليوم اللي استبدلت فيه الـ BBC الأخبار بالموسيقى والروقان

مرة واحد صاحبي قال " إحنا خلاص بقينا عايشين في الشارع " .. كان يقصد بالتعبير ده إننا بقينا مكشوفين زيادة عن اللزوم .. وانه خلاص.. كل تفاصيل حياتنا بقت منشورة على مواقع السوشيال ميديا .. وكله عارف كل حاجة عن كله ..

فكرة الإخبار مبقتش بس متعلقة بالأحداث الكبيرة اللي بتحصل في البلد أو في العالم ..دي بقت من أول صورتك في المصيف لحد إعلان حالة الطوارئ ف جزر القمر .. كله بيجيلك لحد عندك ..

محدش يقدر ينكر حقك في المعرفة ..لإنه المفروض لما تعرف أكتر .. هتعرف تحل مشاكلك  وبالتالي تعرف تظبط حياتك .. لكن مش ده اللي بيحصل .. اللي بيحصل إننا بنحس بالعجز عشان مش عارفين نصيّف في أوروبا زي فلانة ولا نعمل فرح اوت دور في فندق خمس نجوم زي عِلانة .. أو حتى  نقدر ننقذ ضحايا الحروب في العالم .. عشان كده الموضوع بيقلب بإحباط  وبدل ما كانت المعرفة بتساوي التوعية بقت بتساوي اليأس ف بعض الاحيان

و الغريب إنه بدل ما الناس تبعد عن الأخبار ووجع الدماغ ادمنت الموضوع ..  وبقوا يتصبّحوا و يتمسّوا بيها .. وكأنه هيحصل كارثة لو فاتهم خبر من الأخبار الكئيبة دي ..

وده اللي خلّاني اسأل ايه اللي هيحصل مثلا لو الناس دي صحيت على موسيقى بدل الأخبار والنكد على الصبح .. ويبقى بدل جاءنا البيان التالي ..يبقى جاءنا الروّقان التالي..

وعشان  الراديو كان وسيلة الترفيه الوحيدة في الوقت ده - مش زي دلوقتي عندك سبعتلاف حاجة بتبسطك وبرضو زهقان - ف كانت الحياة كلها بتظبط مواعيدها على مواعيد البرامج وخصوصا نشرات الأخبار .. لكن في يوم ده  18 إبريل 1930.. حصلت حاجة غريبة جدا .. ف بدل ما يطلع مذيع ال BBC عشان يقول نشرة المساء .. قال إن الإذاعة معندهاش أي اخبار تذيعها النهاردة ..  وبتدعوهم  لسماع الموسيقى الهادئة بدل النشرة  .. وفعلا بدأت مقاطع موسيقى البيانو في البث..

لكن إيه اللي خلاّهم يعملوا كده .. هل فعلا مكنش في أي أخبار تتذاع ؟

طبعا أكيد مكنش الهدف إنهم مثلا يريّحوا الناس من الأخبار في يومين الإجازة .. إلا إنك لو بصيت للفكرة  هتلاقيها حلوة لأن الموسيقى لايقة على موود الأعياد أكتر .. مع إن الحكاية دي مش هتفرق أوي مع ناس الزمن ده .. لإنهم كده كده رايقين وبيعرفوا يفصلوا ويتبسطوا ف مش هيأثر فيهم نشرة أخبار .. مش زينا بننخل الهم ونغربله ليل نهار ..

طبعا موقف المذيع ده حول اليوم من يوم اجازة عادي ليوم لا ينسى في تاريخ الbbc وف تاريخ الإعلام عموما .. ومش عشان بس منع بس الأخبار .. لأ ده عشان موقف الbbc من وكالات الأنباء اللي قررت تتحرر منها نهائيا ..فعملت أيه بقى؟

ف يومها كان من المفترض إنه يتم عمل حديث مع وزير الداخلية البريطانية ..وكان المفروض إن الإذاعة هي اللي هتعمل اللقاء ده بدل الصحف.. فإمتنعت الإذاعة عن عمل الإنترفيو ده .. ومنعت نشر سيل الأخبار اللي كانت بتضخه وكالات الأنباء بتاعتها كمان..

لأن في الفترة دي مكنش لل bbc  سلطة إذاعة الأخبار إلا من خلال وكالات الإنباء .. واللي أغلبها تابع للحكومة ..وده اللي خلى الحكومة تحول الإذاعة

- وخصوصا في وقت إجازة الصحف - لمنصة لإذاعة الإعلانات الرسمية للحكومة وتقديم المشورات أوقات الأعياد .. والتوعية المرورية ..وده اللي ازعج المسؤليين في الإذاعة ومن هنا جت رغبتهم في الإنفصال عن الوكالات .. والتفرغ لنقل الأخبار الحقيقة .. 

عشان كده بدأت الإذاعة في تدريب العاملين فيها على تحرير وإنتاج الأخبار مع الإعتماد شوية على وكالة إنباء زي رويتز لمدّها ببعض الاخبار .. فضاعفت عدد الموظفين وسيطرت سيطرة كاملة على مضمون الأخبار اللي بتتقدم فيها .. ده غير إنه بقى عندها خدمة إخبارية كاملة مزودة بكل الأدوات والمعدات الموجودة في غرفة الأخبار في سافوي هيل..   

واضح إنك عشان تسيطر لازم تاخد موقف حاسم مهما كلفك الأمر .. وده اللي عملته الBBC .. انت كمان محتاج تحسم حاجات كتير متعلقة في حياتك عشان تعرف تكمل على مزاجك.. وبالنسبة لمزاجك بنهديله البلاي ليست دي يمكن تروق وتنبسط.